Финландын иргэдийн мэдээллийн сангаас гаргасан статистик 2016 онд нийт орон гэргүй иргэдийн тоо 7000 байсан бол энэ он гарсаар дээрх тоо 100-аас бага болсон байна. Үүнтэй харьцуулбал 1987 онд тус оронд нийт 18 мянган иргэн орон гэргүй байсан аж.

Энэ бүхнээс харвал тус улс орон үгээгүйчүүдийн асуудлаа бүрэн шийдэж чаджээ. Анх 1980-аад оны сүүлчээр тус улсын засгийн газар орон гэргүйчүүдэд зориулж олон тооны хорогдох газар байгуулж байсан юм. түүний ачаар олон тэнэмэл хүмүүс хорогдох газартай болж байсан ч олон тооны хүндрэлээс болоод ажил олж чадахгүй байжээ.

Харин 2008 оноос эхлэн тухайн үеийн Финландын Ерөнхийлөгч Тарха Харлонений санаачилж эхэлсэн "Орон байр нэгт" хэмээх хөтөлбөрийн дагуу дээрх асуудлыг шийдвэрлэх боломжтой болсон юм.

"Орон байр нэгт" хөтөлбөрийн хүрээнд төрийн албан хаагчид тэнэмэл иргэдийг ажлын байранд зуучилсан байна. Үүний дараагаар тэдгээр иргэдэд засгийн газраас тусгайлан барьж өгсөн байрны зээлийг ямар нэг урьдчилгаа нөхцөлгүйгээр олгож эхэлсэн аж.

"Хүнд амьдрах байр хэрэгтэй, энэ бол хүний наад захын эрхийн асуудал дараа нь мэргэжлийн хүмүүсийн тусламжтайгаар бусад асуудлаа шийдэж болно" гэж дээрх хөтөлбөрийн ахлагч Юуха Каакинэн ярилаа. Тус орон дээрх хөтөлбөрийн тусламжтай орон байрныхаа тоог ихээр нэмэгдүүлснээр барахгүй гудамж талбайд амьдардаг иргэдийн тоог бууруулахын тулд төрөөс хөнгөлөлт ч үзүүлдэг бол орон гэргүй иргэдийг түр байрлуулах газруудын тоог ч бууруулжээ. 2008 онд Хэлсинки хотод 558 түр байрлах газар байсан бол 2019 онд 15 болж буурсан байна.

Мөн энэ хугацаанд орон байр болон түрээсийн байрны тоо 2585-аас 3742 болж өссөн байна. Юуха Каакинэн мөн "Финланд улс үндэсний хэмжээний арга хэмжээ авсан. Манай улсын яамд, том хотууд болон төрийн бус байгууллагууд бүгд хамтран орон гэргүй иргэдийн тоог бууруулахаар ажилласан. Гэвч олон оронд ийм нэгдмэл байдал дутагдсан хэвээр" гэж мэдэгдсэн байна.