Өрсөлдөөнд ялах хоёр арга байна.

1. Хүний мууд ялах

2. Өөрийн сайндаа ялах.

Хятад бол бидний мөнхийн хөрш мөнхийн өрсөлдөгч. Гэхдээ энэ удаа бид уг өрсөлдөөнд Хятадын мууд ялах боломжгүй болжээ.

Өнөөдрийн Хятад морьтон Монголчуудын эсрэг хадуураас өр зэвсэггүй, хоёр хөлнөөсөө өөр унаагүй, Зүрчид, Алтан, Тангуд улсуудад шахагдсан улс биш болж.
Өнөөдрийн Хятад технологижсон Европын өмнө авилгач түшмэд, хар тамхичин ноёдоор удирдуулсан арчаагүй 1840-д оны улс биш болж.

Тиймээс бид энэ удаа Хятадтай өрсөлдөхдөө хүний мууд биш ӨӨРИЙН САЙНДАА ЯЛАХ-с өөр сонголтгүй байна.

Өөрийн сайндаа бусдыг ялах зам бол юун түрүүнд өөрийн үнэнтэйгээ нүүр тулж чадваргүй, үр бүтээлгүй, буруу бүхнээ хүлээн зөвшөөрч шүүх явдал юм. Монголчуудыг шүүх цорын ганц шударга шүүгч бол Монголчууд өөрөө. Хөгжих хийгээд тэмцэх процесс нь дотроосоо ургадаг жамтай. Өндөг дотроосоо хагардаг. Хүн чаддагтаа тулгуурладаг. Сэтгэл дотроосоо эвдэрч, эдгэрдэг. Улс үндэстэн өөрөөсөө бүтэж сэргэн манддаг.

Бидний өрсөлдөгч Хятад бол Юань гүрний дараах Мин, Чин гүрний дараах 1913 оны Дундад Иргэн улс гэж тоолвол сүүлийн 1000 жилд хоёрхон удаа тусгаар тогтносон төрт улсаа байгуулж чадсан туниа муутай том гүрэн. Хятадын түүх азийн соёлын түүх хэдий ч бидэн шиг баатарлаг өрнөлгүй.

Гэхдээ Хятад өнөөдөр дэлхийг цочроох хөгжил дэвшилд хүрч чадсан гэвэл үнэн. Хөгжиж чадсан энэ үнэнтэй тулахын тулд Хятад хөгжиж чадахгүй байгаа БОДИТ ҮНЭНТЭЙГЭЭ 1978 онд шударгаар нүүр тулжээ.

Энэ хүртэлээ Хятад Хаант, Бүгд найрамдах, Коммунист гээд гурван нийгмийн системд 150 жилийн турш нэг үсрэлтээр Европыг гүйцэх, амархан үйлдвэржих, хурдан баяжих гэдэг хуурамч төсөөллүүдээр өөрийгөө хуурсаар эцэстээ ядуу байгаагийн шалтгаанаа гадаадыханд чихэх, арчаагүй амьдралдаа өнгөрсөн, өрөөл хоёрыг буруутгах төдий ухамсартай байлаа.

Ингээд 1978 онд бол Дэн Сио Пин-ы шинэчлэл эхлэхэд Хятадын сэхээтэнүүд юун түрүүнд өнөөдөр бодитоор оршисоор байгаа ҮНЭН төрхтэйгөө шударгаар нүүр тулав. Үнэн бол би хүссэн ч, эс хүссэн ч байж л байдаг тэр зүйл. Дараад далдайдаг, нуугаад бүлтийдэг жамтай.

Ганц Хятад гэхгүй Өмнөд Солонгос, Сингапур, Тайван, Япон зэрэг орнууд бол зовлон дундаасаа өндийх цор ганц арга бол бодит ҮНЭНТЭЙ нүүр тулах явдал юм гэдгийг хүлээн зөвшөөрсөн улсууд.

Хувь хүн ч тэр ялгаагүй аргалж Англи хэл сурах гээд байгаа, аргацааж ажилд амжилт гаргах гээд байгаа, дасгал хийхгүй турах гээд байгаа, хүчээр бусдын хүндлэлийг авах гээд байгаагаа хүлээн зөвшөөрвөл, ҮНЭНТЭЙ НҮҮР тулж чадвал гайхамшиг. Ингэж чадсан хүн хуурамчаар амьдралаас ангижирч хөдөлмөрлөж, сурч, хамтарч, уучилж, багтааж урагшлаж эхэлнэ.

Өөрийн ҮНЭНТЭЙГЭЭ НҮҮР ТУЛСАН хүнд бусдаас уучлалт гуйх, хариуцлагаа шударгаар үүрэх, буруугаа өөртөө хүлээн зөвшөөрөх нь аз жаргал авчирч, амжилт гаргах дуусашгүй эрч хүчийг өгөх нь гарцаагүй.

Буддаг гэгээрсэн эсэхийг мэдэхгүй ч Буддаг гэгээрсэн гэдэгт итгэх замаар би өөрөө гэгээрч болно. Буддаг эгэл хүнээс бурхан болсон гэх итгэл намайг Бурхан болох магадлалтай амьтан болгож байна. Тиймээс би Будда шиг гэгээрэхийн тулд түүн шиг өөрийнхөө үнэн төрхтэй нүүр тулж уулзах ёстой. Будда өөрийгөө дур тачаал, уур хилэн, шунал хүсэлд автсан эрдэм мэдлэггүй зүгээр нэг амьтан гэж хүлээн зөвшөөрсөн учраас түүнд гэгээрэх, бясалгах, бусдын төлөө амьдрах шаардлага, орон зай гарч ирсэн. Хэрэв тэрээр өөрийгөө бурхан биш атал бурхан гэж тунхагласан бол түүнийгээ батлах гэж хаан аавынхаа цэргийг хөдөлгөж, олон түмнийг хүчирхийлж, өөрөө ч адгийн муугаар төгсөх байсан. Алдар нэр амжилт хувь хүний ҮНЭН ТӨРХ-г дагалдаж ирдэг.

ҮНЭНТЭЙГЭЭ нэгэнт нүүр тулсан тул одоо бидэнд өөрийгөө бусдаас, өөрөөсөө нууж гаднаа нэг, дотроо өөр хүн болох шаарлага үгүй. Ингэж чадсан багш нар боловсролын систем маань хэрхэн хүүхдүүдийг алж байгааг хүлээн зөвшөөрч, хуульчид хуулийн байгууллага авилгалд идэгдэж, дарга даамалд үйлчилдэгийг шударгаар хэлж, эмч нар эрүүл мэндийн систем дампуурч өвдсөн иргэд Солонгос явж байгааг, улс төрчид улс төрийн нам хүний нөөцийн дампуурлын туйлд хүрсэнийг шүүмжилж чадна. Юмыг муулж, өөрийгөө гэгээнтэн болгох гэсэндээ бус зүгээр л угаас оршин байгаа БОДИТ ҮНЭНГ хэлж чадна.

Хүчирхэг гүрэн гэдэг гагцхүү өөртөө шүүмжлэлтэй хандаж чаддаг улсыг хэлнэ.

Ийм оронд хөгжил аяндаа ирж, мөнгө гаднаас зутгаж ирнэ.
Ийм орон Хятадыг бүү хэл бүх дэлхийг ялж, алдар нэр нь цуурайтна.
Ийм оронд хүмүүс асуудлыг өнгөцөөр биш угаар нь шийдэх гэж хичээнэ.
Ийм оронд иргэд нь сонгуулийн саналаа шударга бусаар 20 мянгаар арилжчихаад шударга байдлыг улс төрчдөөс нэхэх увайгүй зангаасаа ичнэ.Ийм оронд улс төрчид бусдын итгэлийг авч сонгогдчихоод хар амиа хоохойлвол хоёр алхахгүйгээ мэдээд шударга ажиллана.

ҮНЭНТЭЙГЭЭ нүүр тулсан хүн хоёр хүний дүрд тоглох сэтгэлийн тарчлаангүй. Хийж бүтээх, бусдад өгөхийн тулд амьдрах тул Дорж даргын сайн муу хүн, Батаа, Цэцэгээгийн хүн чанарын тухай хэнд ч хэрэггүй шальдар булидар ярианд саатахгүй.
Бид өнөөдөр л энэ сэтгэлгээний өөрчлөлтийг хийхгүй бол хэзээ хийнэ гэж. Хятадын хөгжил өссөөр байтал 800 жилийн өмнөх өөрсдийн биш өвгөдийн түүхийн цаана нуугдсаар суух уу. Бодит үнэнтэйгээ нүүр тулахгүй бол хуурамчаар хөгжсөн орон гэж энэ дэлхийд байна уу.

Ер нь худлаагаасаа хөгжинө гэж байдаг юмуу. Хөдлөхгүйгээр турдаг, сурахгүйгээр боловсордог, гүйцэтгэлгүйгээр ажил амжуулдаг, хайрлахгүйгээр жаргадаг, сэтгэлгүйгээр агуу үйлсийг бүтээдэг юмуу.

Болохгүй бүтэхгүй үнэнг хүн өөрөөсөө битгий хэл бусдаас ч нууж чадахгүй.

Гэхдээ Монголчууд бид үнэнтэйгээ нүүр тулах гэж байна гэж Хятад шиг 80 сая хүнээ хэлмэгдүүлж, хар тамхинд хядуулж, авилгач түшмэлд дарамтлуулсан 150 жилийн доромжлол гутамшигийн туулах шаардлагагүй. Харин ухаант хүний ёсоор бодол, асуулт, ухамсарлал, эрүүл яриагаар оюун дүгнэлт хийж болохгүй бүхнээ засаж энэ үедээ өөрсдийгөө золиослоё л доо.

Тиймээ би бол үрээд байхад дундардаггүй мөнгөтэй, уулзаад байхад дуусдаггүй хүндэлсэн хүрээлэлтэй, идээд байхад жин нэмдэггүй, яваад байхад царай харалдаггүй, ажиллах болгонд тушаал дэвшсэн зэрэг бодит биш өчүүхэн төсөөлөлд дарлуулсан улцан нүдтэй, цусан биетэй амьтан байна.

Гэхдээ би амьтан чигээрээ байвал хэзээ ч сайн сайхан бүхэнд хүрэхгүйгээ хүлээн зөвшөөрч байна. Тиймээс би хувь хүний хөгжлийг дагаж мөнгө ирдэг, хүнд сэтгэл гаргаж байж сэтгэл авдаг, хөдөлж байж эрүүл байдаг, хөдөлмөрлөж байж бусдад үнэлэгддэг, бусдын сайн сайхны төлөө албан тушаал ахидаг бодит үнэнтэй нүүр тулна.

Өөрийгөө, бусдыг хуураад нэг хожиж болох ч өөрийгөө, бусдыг хууралгүй насаараа хожиж болох тэр сонголтыг сонгомоор байна.

Ийм сонголтыг хүн бүр хийж чадвал Монголын өрсөлдөгч Хятад бидний ялалтын тоосон дунд эрт оройгүй тамирдан унахыг мэдээд байна.

Чингис хаан дайны тактиктай, дипломат ухаантай, хааны удамтай байгаад дэлхийг эзэлсэн биш. Чингис хаан ҮНЭН амьдарсан учраас дэлхийг эзэлсэн. Тэрээр өөрөө худлаа амьдарвал өөртэй нь байгаа бүх хүн түүнтэй худлаа харилцаж, худлаа шүтэж, худлаа хүн чанар гаргана гэдгийг мэдэж байсан.

Дайнд худлаагаасаа ялахгүй. Армийг худлаагаасаа командлахгүй. Бусдын хайрыг худлаагаасаа татахгүй. Дэлхийг худлаагаасаа эзлэхгүй.

Үргэлжлэл бий ……

Буянаагийн Ган-Очир. Бээжин хот 2018.09.14