1995 оноос хойш жил бүрийн оны сүүлчээр зохион байгуулагдаж ирсэн "Victoria’s Secret" дотуур хувцасны загварын шоуг албан ёсоор зогсоож байгааг тус брэндийг эзэмшигч "L Brands" компаниас зарласныг BBC агентлаг мэдээллээ.

Энэ нь "Сахиусан тэнгэр"-үүд хэмээн нэрлэгддэг дэлхийн шилдэг моделиудыг шалгаруулан оролцуулдаг тус шоуны үзэгчдийн тоо сүүлийн хэдэн жилд огцом буурсантай холбоотой аж. 

Жишээлбэл, өнгөрсөн жилийн шоуг 3.3 сая хүн үзэж байсан бол 2013 онд энэ тоо 9.7 сая байжээ.

Түүнчлэн үзэгчид өнгөрсөн жилийн шоуг хуучинсаг, уйтгартай болсон хэмээн шүүмжилж, "L Brands" компанийг шоундаа шинэчлэлт хийх ёстойг сануулж байв. 

Харин "L Brands" компанийн санхүүгийн албаны дарга Стюарт Бургдоерфер "Компани өөрийн маркетингийн бодлогоо өөрчлөх хэрэгтэй. Бид брэндийн байр суурийг хэрхэн яаж хөгжүүлэх талаар бодож байна" гэж хэлжээ. Мөн тэрбээр "Victoria's Secret" шоу нь өөрөө маркетингийн гайхамшигтай ололт юм" хэмээн нэмж дурдсан байна.

Өнгөрсөн тавдугаар сард "L Brands" компани уламжлалт шоугаа шинэчлэх талаар мэдэгдэж байсан бөгөөд тухайн үед компанийн гүйцэтгэх захирал Лес Векснер “Шоуг телевизээр цацах нь зөв арга зам биш” ярьж байв.

Гэвч "Victoria's Secret" брэндийн орлого дөрөвний нэгээр буурч, үзэгчдийн хүлээлтийг үүсгэж чадахаа больсон нь компанийн санхүүгийн асуудалд хүндрэл үүсгэсэн байна. Улмаар компанийн удирдлагууд албан ёсоор "Victoria's Secret" шоуг цуцалж байгаагаа зарлажээ.