“Эмэгтэйчүүдийн Бриллиант клуб” ТТБ нь 2014 оноос эхлэн олон төрлийн үйл ажиллагаагаар дамжуулан эмэгтэйчүүд бие биеэсээ харилцан суралцаж, хөгжих боломжийг бүрдүүлэхийн төлөө эрмэлзэн ажилладаг, нийгэмд үйлчилдэг төрийн бус байгууллага юм.  

Монгол Улсын хэмжээнд мэргэжлийн, салбарын болон үндэсний хэмжээний манлайлагч эмэгтэйчүүдийг олноор төрүүлэх, нийгмийн сайн сайхны төлөө тэдний мэдлэг боловсрол, ур чадварыг хөгжүүлэх, эмэгтэйчүүд өөрсдийн эрх болон нийгмээс олж авах боломжийн тэгш байдлын төлөө ажиллах, насан туршийн боловсрол олж авахад чиглэсэн сургалт, судалгаа зэрэг нийт 380 орчим арга хэмжээнүүд зохион байгуулан ажилласан.

Үндэсний хэмжээнд амжилттай зохион байгуулсан томоохон арга хэмжээнүүдийн нэг нь Тэргэнцэртэй сайхан бүсгүй шалгаруулах үндэсний уралдаан юм. Бид 2014 онд Хөгжлийн бэрхшээлтэй иргэдийн Бид Чадна ТББ-тай хамтран анхны уралдаанаа зохион байгуулсан бөгөөд Монголын анхны Тэргэнцэртэй сайхан бүсгүйн титмийн эзнээр Д.Цолмон бүсгүй шалгарч, Итали улсын хөгжлийн бэрхшээлтэй залуусын Олон Улсын зусланд амраасан юм.

Хөгжлийн бэрхшээлтэй иргэд хийж бүтээж чаддаггүй, төрөөс халамж хүртэгсэд гэж үздэг хүмүүс  байхад, тэдний амьдрах, ажиллах орчны хэрэгцээ шаардлагын төлөө сайн жишээ ч бас байна. Хоёр дугуйт тэргэн дээрээ хорвоог  “үүрч“ яваа олон охид, бүсгүйчүүдэд ямар их хүсэл мөрөөдөл, авъяас билэг, тэсвэр тэвчээр байдгийг таниулж, тэдний дуу хоолойг илэрхийлж,  хөгжих боломжийг нэмэгдүүлэх  нь уралдааныг зохион байгуулагч бидний зорилго юм.  

Бид энэ удаа 2019 оны 11 дүгээр сарын 22 -ны өдөр “Тэргэнцэртэй сайхан бүсгүй үндэсний 2-р уралдаан”-аа зохион байгуулахаар төлөвлөн ажиллаж байна.