Английн ВВС агентлаг долоо хоног бүр “The Boss” цувралаараа дамжуулан дэлхийн өнцөг булан бүр дэх бизнесийн санаачлагчдыг танилцуулдаг. Тэгвэл энэ удаагийн зочноор Канадын чихрийн бизнесийн эзэн Тара Бош уригдсан байна. Тэрээр чихрийн бага агууламжтай амттан бүтээх “Smart Sweets” санаагаа амьдрал дээр хэрэгжүүлж өдгөө 40 сая ам.долларын үнэлгээтэй бизнесээ удирдаж байна.

Тарагийн хэлснээр тэрээр өмнө нь “чихрийн мангас” байжээ. “Би чихэрт ухаангүй дуртай нэгэн байлаа. Өдөрт 7-11 ширхэг модон чихэр идэх нь энүүхэнд. Гэвч цаг хугацаа өнгөрөх тусам чихэр миний биед хэрхэн нөлөөлдгийг бодож эхэлсэн. Чихрийн агуулга өндөр байх тусам түүнийг дахин идэх хүсэл төрүүлж, өөрийгөө удирдах чадваргүй болж байгаагаа мэдэрсэн” хэмээн 25 настай босс ярьж байна.

 

Дөрвөн жилийн өмнө түүнд нэгэн хачин зүйл мэдрэгдэж эхэлжээ. Тэрээр чихэр идсэн ч аз жаргалтай болохгүй эрүүл мэнд нь улам дордож буйг анзаарчээ. Ингээд Тара чихэр идэхээ шууд зогсоосон байна. Ийнхүү чихэрнээс холдоход яг л цэвэр агаарт гарсан мэт нэг л тавтай, биед ч таатай байсан ч амттан идэх хүсэл нууц хэвээр түүнийг дагасаар байв. Энэ санаа нь түүнийг өөртөө зориулан чихрийн агууламж багатай амттан бүтээх анхны алхам байсан. Канадын Ванкувер дэх гэртээ гал тогоондоо яг л өөрийнх нь хүссэн тэр амттан бүтсэн билээ.

 

2015 оны зун энэ хүслээ зүгээр л ингээд орхих биш хүмүүсийн эрүүл мэндэд тустай амттан бүтээх, мөрөөдлөө бизнес болгохоор зориг шулуудав. Хэд хэдэн удаагийн амталгаа ч явуулж. Колумбын их сургуулийн уран зургийн ангийн гуравдугаар дамжааны оюутан байсан болохоор ч тэр үү түүнд бизнесээ хөрсөн дээр буулгах хүсэл улам бүр оргилж байв.

 

Харин өнөөдөр Ванкувер дэх түүний “ Smart Sweets” компанийг энэ оны орлого хэдийнэ 50 сая канад доллар буюу 40 сая ам.доллар даваад байна. Канад болон АНУ-д чихрийн бага агууламжтай амттаны эрэлт хурдтай өсч байгаа нь Тарагийн амжилтад бүр ч их хамаатай.