Муслим шашны хатуу дэглэмийг баримталдаг Саудын Араб гадаадын жуулчдын тоог нэмэгдүүлэх зорилгоор аяллын визнийхээ нөхцөлийг нэлээд уян хатан болгоод байгаа юм. Тус улсад аяллаар очсон гадаадын хосууд буудалд нэг өрөөнд орж байгаа тохиолдолд гэрлэлтийн батламжаа заавал үзүүлэх журамтай байсан юм. Тэгвэл энэ журамд өөрчлөлт оруулж, Саудын Арабын зочид буудлууд гадаадын хосуудаас гэрлэлтийн баталгааг цаашид шаардахгүй юм байна.  

Саудын Арабын Аялал Жуулчлал, Үндэсний Өв Соёлын Комиссоос  баасан гарагт  аяллын визний нөхцөлд  олон өөрчлөлт  орж байгааг мэдээлжээ.  Саудын Арабд аялаж байгаа гадаад улсын эмэгтэй, эрэгтэй хоёр буудалд нэг өрөөнд орох тохиолдолд гэрлэлтийн батламж хардаг байсан журамыг хүчингүй болгож байгааг мэдээлжээ. Гэхдээ энэ өөрчлөлт тус улсад аялж буй гаднын иргэдэд хүчинтэй юм.

Харин Саудын Арабын хосууд буудалд хамтдаа орох тохиолдолд хууль ёсны харилцаатай гэдгээ батлах бичиг баримтыг заавал үзүүлдэг байдал хэвээр үргэлжлэх юм.  Үүнээс гадна  шаардлагатай баримт бичгийг шалгуулснаар буудалд  ганцаараа байрлах эрх Саудын Арабын эмэгтэйчүүдэд нээлттэй болсон байна. Өмнө нь эмэгтэйчүүд  ганцаараа буудалд орохыг хориглодог байжээ. Ийм өөрчлөлт  бий болсноор Саудын Арабын эмэгтэйчүүд ганцаараа болон найз охид, бүсгүйчүүдтэйгээ аялал хийх боломж нээлттэй болж байгаа юм.

Өнгөрсөн долоо хоногт Саудын Араб 50 орчим орны иргэдийн аяллын визний нөхцөлийг эрс цөөрүүлж байгаагаа зарласан юм. Энэ нь тус улс аяллын жуулчлалын салбарыг хөгжүүлж, газрын тосны экспортоос хэт хамааралтай эдийн засгаа солонгоруулах зорилготой холбоотой юм. Тус улс 2030 он гэхэд жилд 100 сая жуулчин хүлээн авах зорилго тавиад байна. Ер нь Саудын Араб эмэгтэйчүүдийн эрх хамгийн ихээр хаагдмал орон гэх шүүмжлэлд байнга өртөж ирсэн юм.

Гэвч сүүлийн үед  эмэгтэйчүүдийн нийгэмд болон улс төрд гүйцэтгэх эрх, үүргийг сайжруулах, дэмжих алхмуудыг авч эхлээд байна. Өнгөрсөн жил л гэхэд Саудын Араб улсад эмэгтэйчүүдийн жолоо барихыг хүлээн зөвшөөрсөн юм. Үүнээс гадна Саудын Арабын эмэгтэйчүүд гаднын оронд аялахдаа нөхөр эсвэл сүйт залуугаасаа тусгай зөвшөөрөл авдаг байсан дэгийг хүчингүй болгоод байна. Эдгээр өөрчлөлт нь угсаа залгамжлах Хунтайж Мухаммед бин Салманы Саудын Арабын эдийн засаг  болон нийгэмд  томоохон шинэчлэлийг явуулах бодлогын нэг хэсэг юм байна.