Энэтхэгийн үндэсний чөлөөлөх хөдөлгөөний удирдагч Махатма Гандийн чандар Энэтхэгийн дурсгалын цогцолбороос хулгайд алдагдлаа гэж “Индия Түдэй” сэтгүүлд мэдээлсэн байна.

Махатма Гандийг 1948 оны нэгдүгээр сард хөнөөснөөс хойш шарилыг нь чандарлаж хэдэн хэсэг болгон хувааж хадгалсны нэг хэсэг нь Мадхья-Прадеш мужийн дурсгалын цогцолборт хадгалагдаж байлаа.

Гэтэл Гандийн мэндэлсний 150 жилийн ойн өдөр түүний чандар хулгайд алдагджээ. Орон нутгийн зөвлөлийн тэргүүн Гурмит Сингх “Oндэсний эцэг”-т хүндэтгэл үзүүлэхээр ирээд хулгайн хэрэг гарсныг анзаарсан байна. Үүнээс гадна хорлон сүйтгэгчид дурсгалын байрны үүдэнд “Үндэсний урвагч” гэсэн үг бичээд үлдээжээ.

“Энэ бол Гандийг хөнөөсөн Натхурам Годсег дэмждэг хүмүүсийн хийсэн ажил бололтой. Энэ үзэн ядалтыг нэн даруй зогсоох ёстой. Цагдаагийн газар ч гэмт хэргийн мөрөөр явж, хэрэгтнүүдийг барьж авах ёстой” гэж Сингх мэдэгдсэн байна.

Махатма Ганди хэмээн алдаршсан Мохандас Карамчанд Ганди нь Энэтхэгийн тусгаар тогтнолын төлөө тэмцэгч, Ардын чөлөөлөх хөдөлгөөний суртлыг дэлгэрүүлэгч байсан юм. Тэрбээр энэтхэгчүүдийг тусгаар тогтнолынхоо тэмцлийн явцад хүчирхийллийн бус арга хэрэглэхийг уриалж байсан нь Британийн колоничлолоос улс орноо чөлөөлөх тэмцэлд олон сая энэтхэг түмнийг нэгдэхэд тус болсон юм.

Махатма Гандийг 1948 оны нэгдүгээр сарын 30-нд радикал үндсэрхэг үзэлтэн Натхурам Годсе хөнөөсөн. Тэрбээр Гандийг лалын шашинт хүн амын эрх ашгийн төлөө хиндү шашинтнуудын ашиг сонирхлыг золиосолсон гэж үздэг байжээ. Натхурам Годсед цаазын ял оноож, 1949 оны 11 дүгээр сард ялыг гүйцэтгэжээ.