Технологийн салбарын гол арга хэмжээнүүдийн нэг болох "Amazon Hardware Event" Лас Вегас хотноо өнөөдөр болж өнгөрчээ.

Жил бүр уламжлал болгон зохион байгуулагдсаар ирсэн уг арга хэмжээнд  "Amazon" компани олон нийтэд хамгийн сүүлийн үеийн технологийн дэвшлүүдийг дэлгэдэг билээ. Харин бид энэ жилийн  "Amazon Hardware Event" үзэсгэлэн дээр танилцуулагдсан хамгийн сонирхолтой бүтээлүүдийг сонгон хүргэж байна.

1 Echo Loop - Ухаалаг бөгж

"Echo Loop" нь "Amazon"-ы цоо шинээр бүтээж байгаа ухаалаг бөгж юм. Титан хүрээ бүхий энэхүү ухаалаг төхөөрөмж нь өөр дээрээ микрофонтой бөгөөд түүгээр дамжуулж хэрэглэгч гэртээ байгаа бусад ухаалаг төхөөрөмжийг удирдах боломжтой аж. Одоогийн байдлаас тус бөгж 129 ам.доллараар худалдаалагдах төлөвтэй байна.

2 Echo Frames - Ухаалаг шил

"Echo Frames" хэмээх энэхүү ухаалаг шилэнд дэлгэц эсвэл камер байхгүй ч микрофон болон жижиг өсгөгчийн тусламжтай удирдагдах боломжтой аж. Үүгээр дамжуулж хэрэглэгч цахим орчноос мэдээлэл хайх, бусад ухаалаг төхөөрөмжийг удирдаж болох гэнэ. "Echo Frames" нь 129 ам.доллараар худалдаалагдах төлөвтэй байна.

3 Echo Buds - Утасгүй чихэвч

"Echo Buds" нь "Amazon"-ийн анхны утасгүй чихэвч юм. Энэхүү чихэвч нь нэг тасралтгүй хэрэглэх юм бол 5 цагийн турш цэнэгээ барьдаг аж. "Echo Buds" -ийг бүтээхдээ "Amazon" дуу чимээ тусгаарлахад ихээхэн анхаарал хандуулсан гэнэ.

Мэдээж энэхүү чихэвч "Alexa", "Google Assistant" эсвэл "Siri"-тэй шууд холбогдож чадах юм.  Одоогийн байдлаар "Echo Buds" 129 ам.доллараар худаалагдах төлөвтэй байна.

4 Alexa Smart Oven - Ухаалаг шарах шүүгээ

Өнгөрсөн жил "Amazon" компани шинээр ухаалаг шарах шүүгээ  бүтээж байгаа гэж мэдэгдсэн бол энэ жил түүнийгээ олонд танилцууллаа. Энэхүү ухаалаг технологийг алсын зайнаас удирдаж болох бөгөөд хүссэн хүнсний бүтээгдэхүүний баркодуудыг уншуулж тохирсон хэмийг тодорхойлж болох аж. "Alexa Smart Oven" нь 249.99 ам.доллараар зарагдаж эхлэх юм.

5 Ring

Шинэ "Ring" ухаалаг хяналтын камер яахын аргагүй олны анхаарлыг татжээ. Учир нь тус камер нь 59.99 ам.долларын үнэтэй байгаа нь өмнөх загвараас 100 ам.доллараар бага байгаа юм. "Amazon"-ийн хэлж байгаагаар энэхүү камерийг энгийн залгуурт залгаж ажиллуулж болох гэнэ. Энэхүү камер нь хөдөлгөөн мэдрэгчтэй бөгөөд тухайн өрөөнд хөдөлгөөн байхгүй бол өөрийгөө унтраадаг юм.