Зимбабвегийн анхны ерөнхийлөгч Роберт Мугабе 95 настайдаа зүрхний шигдээсээр таалал төгслөө гэж тус улсын шинэ Ерөнхийлөгч Эммерсон Мнангава албан ёсны твиттер хуудсандаа мэдэгджээ. Тэрбээр "Зимбабвегийн үүсгэн байгуулагч эцэг, Ерөнхийлөгч асан Роберт Мугабег өнгөрсөнд маш их харамсаж байна." гэж бичсэн байна.
Өдгөө 15 сая хүн амтай энэ улсыг 37 жилийн өмнө Өмнөд Родези гэж нэрлэдэг байв. Тэр үед засгийн эрх хийгээд нийгмийн баялгийг 300 мянган цагаан арьстнууд эзэгнэж байлаа. Гэсэн хэдий ч ӨАБНУ-тай харьцуулахад энэ улсад арьсны өнгөөр ялгаварлан гадуурхах үзэл бараг байгаагүй бөгөөд хүн ардынх нь амьжиргааны төвшин Африк тивдээ дээгүүрт ордог байв.
Түүнчлэн 1980 онд тусгаар тогтнолоо олж авсан Зимбабве улс улам цэцэглэн хөгжинө гэж дэлхий нийтээрээ харж байлаа. Гэтэл засгийн эрхийг авсан Мугабе нэг намын тогтолцоог бий болгож, улс төрийн өрсөлдөгчдөө намнаж эхлэв. Улмаар шийдвэр гаргах бүх эрх мэдэл түүний гарт төвлөрлөө. Ерөнхийлөгч болонгуутаа Мугабе газрын шинэтгэл хийж, цагаан арьст фермерүүдийн газрыг ямар нэгэн нөхөн төлбөр өгөлгүйгээр хураан авч, газаргүй тариачид болон тусгаар тогтнолын төлөөх дайнд оролцсон ахмад дайчдад олгожээ.
Мугабе Европ гаралтай иргэдийг “уугуул иргэдээс газрыг нь булаан авсан ардын дайснууд” гэж нэрлэж байв. 2002 онд тэрбээр цагаан арьст 4000 фермерийг шоронд хорино гэж сүрдүүлэн улс орноосоо хөөн гаргасны хариуд Европын Холбоо Зимбабве улсын эсрэг эдийн засгийн хориг арга хэмжээ авсан юм. Гэвч цагаан арьстнууд Зимбабвегаас хөөгдөн гарснаас хойш хөдөө аж ахуйн салбар нь бүрэн сүйрчээ.
Үүний улмаас улс орон уруудах замдаа нэгэнт шуудран оржээ. Ингэж явсаар 2008 он гэхэд инфляцын төвшин 230 сая хувьд хүрч, нэг ширхэг талх 300 тэрбум Зимбабве долларын үнэтэй болов. Цөхрөнгөө барсан эрх баригчид үндэсний валютаасаа татгалзаж, оронд нь доллар, юаниар тооцоо хийхээс аргагүйд хүрчээ. Үүний зэрэгцээ авилга, ДОХ-ын халдвар, гэмт хэрэг, бэлгийн хүчирхийлэл газар авсан нь эдийн засгийн гүнзгий хямрал дээр улам нэрмээс болсон юм. Африкийн хамгийн аж үйлдвэржсэн улсуудын нэг гэгдэж байсан Өмнөд Родези өдгөө нэг хүнд ногдох ДНБ-ний хэмжээгээрээ дэлхийд сүүл мушгиж байна.
Харин Мугабегийн дарангуйллаас залхсан Зимбабвечууд 2017 онд түүнийг түлхэн унагасан билээ. Тайлбарлавал, Зимбабвегийн эрх баригч “ZANU-PF” намын удирдлага Ерөнхийлөгчид 24 цагийн хугацаа олгож, өөрийн хүсэлтээр огцрохыг тулган шаардсан юм. Энэ саналаас татгалзсан тохиолдолд Ерөнхийлөгчид итгэл хүлээлгэх асуудлаар парламентад санал хураалт явуулж , хүчээр огцруулах гэж байв.
Цэргийн эргэлт гарснаас хойших хэд хоногт Мугабе хугацаа хожих гэж янз бүрээр оролдон, өлсгөлөн хүртэл зарлаж байсан боловч хүчинд автан аргагүйн эрхэнд огцорсон байдаг.
