Иран улс Семнан муж дахь Имам Хомейнийн нэрэмжит сансрын буудлаасаа пуужин хөөргөх гэж оролдоод бүтэлгүйтсэн талаар АНУ-ын Үндэсний олон нийтийн радио мэдээлжээ. Тус радио нь “Planet” хувийн хиймэл дагуулаас авсан зургийг үндэслэн ийм мэдэгдэл хийсэн байна.
Үүнээс удалгүй “Associated Press” агентлаг Ираныг пуужин харвах гээд бүтэлгүйтсэн тухай мэдээлсэн байна. “Planet” хиймэл дагуулаас авсан зургийг Америкийн Мидлбeрийн олон улсын судалгааны хүрээлэнгийн ажилтан тайлбарлахдаа “Пуужин хөөргөх талбар дээр тээвэрлэгч пуужин дэлбэрсэн бололтой байна. Яг юу болсон нь тодорхойгүй ч гэлээ тэнд харагдаж байгаа утаа савсуулсан үлдэгдлийг харвал нэг юм дэлбэрсэн нь гарцаагүй" гэжээ.
Хэрэв энэхүү тайлбар батлагдвал Иран нь энэ жил пуужин хөөргөх гурав дахь удаагийн бүтэлгүй оролдлого хийсэн болж таарах юм. Үүнээс өмнөхөн Иран нь пуужингийн хөтөлбөрөө хумих талаар АНУ-тай ямар нэг хэлэлцээ хийхээс эрс татгалзаад байсан билээ.
