Өнгөрсөн ням гарагт үдээс хойш Бахамын арлын тохой газарт хүчтэй шуурга шуурч, аадар бороо орсны улмаас Абако арлын бүс нутгуудад хүчтэй үер бууж, их хэмжээний хохирол учирчээ. Хар салхи даваа гарагт ч тус арлыг хамрах төлөвтэй байгаа ба даваа гарагийн оройноос эхэлж Флорида мужийн зүүн эргийг чиглэх хандлагатай байна гэж албаныхан мэдээллээ.

Үүний улмаас АНУ-ын Өмнөд Каролина муж улсын амбан захирагч Хенри Макмастер далайн догшин хар салхи “Дориан” ойртож буйтай холбогдуулан эрэг орчмын оршин суугчдыг эх газрын гүн рүү нүүлгэн шилжүүлэх захирамж гаргажээ. Мэдээнд өгүүлснээр нүүлгэн шилжүүлэх ажиллагаанд нэг сая орчим хүн хамрагдаж аюулгүй газар шилжин байрлах юм байна.

Бахамын Ерөнхий сайд Хуберт Миннис Гранд Бахама болон Абако арын зарим бүс нутгийн ард иргэдийг нүүлгэн шилжүүлж, жуулчдыг эдгээр арлыг орхин гарахыг хүссэн байна. Мөн тэрбээр өчигдөр болсон шуурхай хурлын үеэр "Энэ бол миний амьдралын хамгийн гунигтай, хамгийн муу өдөр байж магадгүй.  Бахамын арлын түүхэнд урьд өмнө хэзээ ч тохиож байгаагүй хар салхи болж байна" гэж хэлээд Дорианыг "Мангас шуурга" гэж нэрлэжээ. 

Өмнөд Каролинагаас гадна Хойд Каролина муж улс мөн “Дориан” хар салхи ойртож байгаатай холбогдуулан онцгой байдал зарлаад байгаа аж.

АНУ-ын Флорида, Өмнөд, Хойд Каролина мужийг нэрвэхээр ойртож буй “Дориан” хар салхины хүч Саффир-Симпсоны шаталбараар тавдугаар зэрэглэлд хүрч очоод байгаа аж. Энэ нь хамгийн хүчтэй ангилал бөгөөд цагт 160 миль буюу /257 км цаг/ 71.3 метр/секунд хурдтай салхилж байгаа гэсэн үг юм.      

Хар салхи нь дотроо таван зэрэглэлд хуваагддаг бөгөөд энэ удаагийнх хамгийн өндөр зэрэглэлд нь багтаж буйгаас гадна "Дориан" хар салхи нь Атлантын далайн түүхэн дэх хоёрт бичигдэхээр хүчтэй байгаа ажээ.