УИХ-ын гишүүн О.Баасанхүү эрдэнэтчүүдээ төлөөлөн ЗГХЭГ-ын даргад албан бичиг хүргүүлж буйгаа мэдэгдэв. Тэрбээр “Эрдэнэт үйлдвэрийн 51 хувийг “Стандарт” банкинд барьцаалсан хэрэг удааширснаас өдөрт 100 сая төгрөгийн өрөнд орсоор байна. Бид энд шийдэх гэсээр байтал Монголын төлөх өр 126 сая ам.долларт хүрчихлээ. Жилд гурван тэрбум төгрөгийн торгуульд орсоор байна. Олон улсын шүүхээс “Стандарт” банкны өрийг төлөх ёстой гээд шийдчихсэн тул төлөхөөс гарцаагүй. Гэтэл энэ хооронд “Стандарт” банк Хятадад зарагдаж, хятадууд өнөөдрийг хүртэл шүүхийн шийдвэрийн хуудсыг ирүүлэхгүй байгаа нь учиртай. Хэрэв шийдвэрлэсэн хуудас ирвэл тоолуур зогсох ёстой. Тоолуураа зогсоохгүйгээр “Эрдэнэт” үйлдвэрээс авах өрөө нэмэх бодлого барьж байгаа нь ч учиртай. Тиймээс яаралтай зогсоох хэрэгтэй байгаа тул хэлэлцээрт зайлшгүй орох ёстой. Засгийн газраас хэлэлцээрт орох субъектээ тодорхойлох хэрэгтэй байна. Засгийн газар хэлэлцээрт орох юм уу, хувьцаа эзэмшигч хэлэлцээрт орох уу, байгууллага орох уу гэдгийг шийдээд төлбөрийг багасгаж, хэн төлөхийг шийдэх ёстой. Тиймээс би энэ асуудлаар ЗГХЭГ-ын дарга Л.Оюун-Эрдэнэд албан шаардлага хүргүүлж байна” гэсэн юм.

“Стандарт” банк 109 сая ам.доллар нэхэмжилж, Арбитрт хандан гурван удаагийн шүүх хуралд ялалт байгуулаад байгаа. Арбитрын шүүхээс зээл, зардал, үндсэн зээлийн хүү, торгуульд нийт 99 сая ам.долларыг “Эрдэнэт” үйлдвэр төлөх шийдвэр гаргасан. Гэтэл энэхүү мөнгө төлөгдөхгүй явсаар хүү, алдангитайгаа нийлээд 126 сая ам.доллар болж өсөөд буй юм. Асуудлыг шийдэхгүй дахин нэг жил болох юм бол сард 1.2 сая ам.доллараар нэмэгдэж, 140 сая ам.доллар төлөх ноцтой байдалд хүрч болзошгүй байна.

Мөн түүний тайлбарлаж буйгаар “Стандарт” банкийг худалдаж авсан хятадууд өрийн хэмжээг улам нэмэгдүүлж “Эрдэнэт” үйлдвэрт хувьцаа эзэмших зорилго агуулж байгаа аж.

“Стандарт” банкинд төлөх өр сард 1.2 сая ам.доллараар нэмэгдэж байна

Энэ талаар тэрбээр “Эрдэнэт үйлдвэрийн 49 хувь нь 450 сая ам.доллар юм бол “Стандарт” банкинд төлөх 126 сая ам.доллар нь тус үйлдвэрийн 12 орчим хувь болно гэж хятадууд тооцон хувьцаа эзэмшихээр зүтгэж байгаа юм билээ. Өөрөөр хэлбэл, өрөндөө “Эрдэнэт”-ийн хувьцааг авах санал тавина гэсэн үг. Тэгэхээр Эрдэнэт үйлдвэрийн 12-20 хувь нь хятадуудын мэдэлд очих магадлалтай байна. Тиймээс “Стандарт” банкны өрийн тоолуурыг яаралтай зогсоох, нэн даруй хэлэлцээрт орох шаардлагатай. Засгийн газар хэлэлцээрт орох субьектээ сонгож, тодорхой лимиттэй очих ёстой” гэсэн юм.

“Одоогоор “Стандарт” банкны хэрэгт холбоотой 180 хавтаст хэрэг нээсэн. Үүний нэг хавтаст хэрэг нь 250 хуудас гэж тооцохоор 50-60 мянган хуудас материалаас бүрдэнэ гэсэн үг. Хуулийн байгууллага үүнийг яаралтай шийдэх хэрэгтэй. Тэгэхгүй бол “Хан Ресурс”-ын шахаанд орж 70 сая ам.доллар төлсөн шиг зүйл болох гэж байна” хэмээн нэмж анхааруулав.

Дашрамд сануулахад, хэдхэн жилийн өмнө манай улс “Хан Ресурс” компанийн ашиглалтын лицензийг цуцалснаас болж Парисын арбитр дээр ялагдсан бөгөөд “Хан Ресурс”-т 300 сая ам.доллар төлөхгүй бол онгоцыг чинь буцаахгүй хэмээн Берлинд МИАТ-ын онгоцыг барьцаалсан явдал болж байв. Засгийн газар яаралтай хэлэлцээрт орон 70 сая ам.доллар төлж, барьцаагаа чөлөөлж байсан гашуун түүх бий.