Ээжийн амин үр, хамгаас үнэтэй эрдэнэ чи минь удахгүй сургуульд ороод үүнийг өөрөө олж унших байх, тэр үед ээж нь хамт байх ч гэлээ магадгүй энэ мөчид юу мэдэрч байснаа яг энэ хэвээр нь чамдаа илэрхийлж, үгээр тайлбарлаж чадахгүй байж магад гэж бодсон учраас бичээд үлдээчихье гэж шийдлээ. Ээж нь одоохондоо охиныхоо дэргэж байхгүй, хүссэн үедээ тэврээд, үнсээд, хамтдаа тоглоод, хайраа бүрэн дүүрэн илэрхийлж, эрхлүүлэх боломжгүй хол байгаа ч гэсэн зөвхөн охиноо хайрлаж, чинийхээ ирээдүйг илүү гэрэлтэй гэгээтэй сайхан байлгахын тулд ийм шийдвэр гаргасан юм шүү гэдгийг миний охин өшөө жаахааан том болоод ойлгох байхаа.
Өнөөдөр ээж нь охинтойгоо яриад ямар сайхан энерги авсныг чи минь даан ч гадарлахгүй. Тэр хөөрхөн инээд, ээжээ гэж ирээд дотночлон ярих ярианаас нь ээж нь маш их аз жаргал мэдэрч, миний амьдралдаа бий болгосон хамгийн агуу, сайхан уран бүтээл гэдгийг бахархалтайгаар харж сууснаа яг энэ мөчид бичээд ч болтугай үлдээхийг хүслээ.
Энэ их гоё газрууд, сонин содон мэдээллүүд, өөр өөрийн үзэл бодолтой хүмүүстэй танилцаж, хорвоо ертөнц хичнээн уудам болохыг ээж нь бага багаар мэдрэх тусмаа чамдаа бас үзүүлэхсэн гэж дэндүү их яарах юм.
Чамайгаа боловсролтой, ухаалаг, хүнлэг сайхан бүсгүй болгож хүмүүжүүлж чадвал ээжийнх нь энэ яваа насны минь зорилго биеллээ гэсэн үг, тэгээд л хангалттай, илүү зүйл хүсэхгүй. Түүний төлөө ээж нь бүхнийг хийнэ.
Одоо яахав дээ, тусдаа байгаа хугацаа минь хэдийгээр удаан мэт санагдаж байгаа ч ээжид нь зөндөө их зүйл ойлгуулсан он сарууд болж байна. Охиныхоо төлөө илүү их хичээх ёстойгоо, чамайгаа илүү их хайрлах ёстойгоо алхам бүртээ мэдэрч байгаа. Утсаар ярих тоолонд том болж байгааг нь мэдэрч, хэрэглэж буй үгийн сонголт, өгүүлбэрийн бүтэц, асуудлыг харж байгаа өнцгийг нь ээж нь хараад хааяа дуу алдан л сууна. Өдөр бүр шинэ зүйл сурч, дуу бүжиг, балет, шатар, даам, төгөлдөр хуур гээд өчнөөн зүйлсээр өөрөө сонирхон суралцаж байгаад нь ээж нь хажууд нь байхгүй ч гэсэн хүн бүхэнд ярьж, гайхуулж, бас бахархаж яваа, охиноороо.
Чамайг ээжийнхээ гэдсэнд байхад анх хүйсийг нь охин гэж мэдчихээд, яг адилхан хувцас өмсөөд хөтлөлцөөд алхах юмсан гэсэн бодол хамгийн түрүүнд бууж билээ. Энийг хар даа, ийм хөөрхөн гутал авсан, хоёулаа хөтлөлцөөд алхаж байгаа минь бүр нүдэнд харагдаад байгаа юм ккк. Аягүй бол өшөө жаахан том болоод ирэхээр нь охинтойгоо хамт шоудчихсан явж байх байлгүй.
Хэн бүхнээс илүү зөвхөн чамдаа л ээж нь хайртайгаа дахин дахин хэлье, өөрөөсөө ч илүү. Миний өөдөсхөн үр гэрлийн хурдаар өсч байгаатай зэрэгцээд ээж нь бас том хүн болох гээд л үзэж явна даа.
Эх сурвалж: Фейсбүүк
