Нэгдүгээр сарын 21-ний өдөр Венесуэлийн ерөнхийлөгч Николас Мадурогийн эсрэг олон нийтийн жагсаал эхэлсэн. Иргэд цагдаа нартай мөргөлдөж олон зуун хүн шархдсанаас хэд хэдэн хүн амиа алдаад байна.
Венесуэлийн сөрөг хүчний удирдагч, парламентын дарга Хуан Гуайдо энэ сарын 23-нд өөрийгөө төрийн тэргүүнээр зарлаж, АНУ тэр даруй Гуайдог хүлээн зөвшөөрснөө мэдэгдлээ. Мадуро өөрийгөө үндсэн хуулийн дагуу сонгогдсон ерөнхийлөгч гэдгээ мэдэгдэж, сөрөг хүчний парламентын дарга Гвайдог "АНУ-ын утсан хүүхэлдэй" гэж нэрлэжээ.
Хоёр удирдагчтай болоод байгаа Венесуэль улсын өнөөгийн байдал дотооддоо болон олон улсын хэмжээнд ихээхэн хурцадсан байдалтай хэд хоногийг өнгөрөөж байна. Өөрийгөө Ерөнхийлөгчийн үүрэг гүйцэтгэгчээр зарласан сөрөг хүчний удирдагч Хуан Гуайдог АНУ, Европын холбооны гол улсууд, Өмнөд Америкийн ихэнх улсууд хүлээн зөвшөөрөөд байна. Харин социалист удирдагч Николас Мадурог ОХУ, Хятад, Турк тэргүүтэй зарим орнууд Венесуэлийн Ерөнхийлөгч мөн гэж үзсэн хэвээр байна.
АНУ-ын сонирхол юу вэ?
Тэд Венесуэлийн баялгийг гартаа оруулж, хөрөнгө оруулахыг хүсэж байгаа. Венесуэлийн газрын тосны нөөц нь манай гаргийн хамгийн томд тооцогддог. Энэ үүднээс Гуайдог дэмжсэнээр АНУ, Венесуэлийн газрын тосны нөөцийг өөрийн болгож чадах юм.
ОХУ-ын сонирхол юу вэ?
Венесуэл гэх геополитикийн холбоотноо алдсанаар ОХУ дэлхийн хамгийн том нефть болон байгалийн хийн орд газруудад нэвтрэх эрхээ алдаж магадгүй болоод байна.
Хятадын сонирхол юу вэ?
Хятад улс 2014 оноос хойш Венесуэлийн газрын тосны салбарт 70 тэрбум ам.долларын хөрөнгө оруулалт хийгээд байгаа юм. Тэрхүү хөрөнгө оруулалтын гэрээг Мадуро хийсэн учраас Гуайдо төрийн эрхийг авсан тохиолдолд Хятад улс хөрөнгө оруулалтынхаа үр шимийг хүртэж чадахгүй болох эрсдэл үүсээд байна. Иймд Хятадад Мадурог дэмжихээс өөр сонголт байхгүй аж.
Венесуэлийн ерөнхийлөгч Николас Мадуро 2025 он дуусах хүртэл албан тушаалаа орхихгүй гэж мэдэгдсэн бөгөөд түүний талд улсынх нь арми бат зогсоно гэдгээ ч зарласан юм.
Сонирхуулахад 2018 оны 5-р сард Венесуэлийн ерөнхийлөгчийн сонгуулиар Николас Мадуро нь 65 хувийн саналаар үнэмлэхүй ялалт байгуулж байжээ.
2018 оны 10-р сарын байдлаар Венесуэлийн ДНБ өмнөх оны мөн үеэс 18 хувиар буурсан байна. Венесуэлийн парламент 2018 оны 12-р сард инфляци 1,700,000 хувьд хүрлээ гэж мэдэгдсэн бол ОУВС Венесуэл дахь инфляци 2019 оны эцэс гэхэд 10,000,000 хувь хүрэх боломжтой гэж таамаглаж байгаа юм.
Мөн Николас Мадуро АНУ-ын ард иргэдэд хандаж мэдэгдэл хийжээ. Англи, Испани хадмал орчуулгатай, дөрвөн минут үргэлжлэх уг мэдэгдэлд Венесуэлийн нутаг дэвсгэр дээр цэргийн үйл ажиллагаа явуулах Дональд Трампын үйл ажиллагааг таслан зогсоохыг АНУ-ын ард иргэдэд уриалсан байна. Хэрэв нөхцөл байдал өөрөөр эргэвэл Вьетнамын дайнтай адил зүйл болох болно гэдгийг Америкчуудад анхааруулжээ.
Тэрбээр “АНУ бол агуу үндэстэн шүү дээ. Та бүхэн Дональд Трампаас хүчирхэг. Венесуэл улсад хүндэтгэлтэй хандахыг би Америкийн ард түмнээс хүсэж байна. Манай улсад төрийн эргэлт хийж, нийгмийг турхирахын тулд АНУ-ын засгийн газар хэвлэл мэдээллийн хэрэгслээр албаар худал ташаа мэдээлэл тарааж байна. Үүнд итгэхгүйгээр асуудалд бодитоор хандаасай гэж хүсье. АНУ урьд, урьдын Ирак, Ливи зэрэг улсуудад хэрэглэж байсан аргаараа Венесуэл улсын баялагт гар дүрэхийг санаархаж байна. Аль ч улс оронд асуудал байдаг. Венесуэл улсад ч мөн байгаа. Гагцхүү тэдгээр асуудлуудыг бид хэн нэгний оролцоогүйгээр өөрсдөө шийдэж чадна. АНУ энэ дээрэнгүй байдлаа зогсоохгүй бол Вьетнамын дайн шиг зүйл болохыг үгүйсгэхгүй” хэмээн хэлсэн байна.
