“Эрдэнэт үйлдвэр” ХХК-ийн 49 хувийг эзэмшигч “Монголиан коппер корпорейшн” ХХК-иас олон нийтэд хандан мэдээлэл хийв. Тус компанийн гүйцэтгэх захирал Ц.Пүрэвтүвшин төрийн  өмчийн бодлого зохицуулалтын газарт хандан гурван зүйлийг тодруулахаар хүсэлт гаргажээ. Хүсэлтдээ төрийн өмчийн бодлого зохицуулалтын газраас “Эрдэнэт үйлдвэр”-ийн 49 хувь болон 51 хувь бүгд Монголын өмч байгаа эсэх, “Эрдэнэт үйлдвэр”-ийн ТУЗ-ийн долоон гишүүн бүгд төрөөс томилогдсон хүмүүс ажиллаж байгаа хэвээр эсэх, “Эрдэнэт үйлдвэр”-ийн Ерөнхий захирал төрөөс томилогдсон үгүйг тодруулахыг зорьсон аж. Тэрбээр хүсэлтийнхээ талаар “Төрийн өмчийн бодлого зохицуулалтын газар хүсэлтэд хариу өгснөөр “Эрдэнэт үйлдвэр”-ийн 49 хувь монголчуудын мэдэлд хэвээр байгааг батална. Мөн төрөөс томилогдсон ТУЗ, Гүйцэтгэх захиралтай байгаа нөхцөлд 49 хувийг эзэмшиж байгаа манай компани хувьцаагаа гадаад компанид худалдах ямар ч боломжгүй гэдгийг давхар батална” гэсэн юм.

Харин УИХ-ын нэр бүхий гишүүдийн дэлгэсэн баримт бичгийн талаар Ц.Пүрэвтүвшин тайлбарлахдаа “Бид Эрдэнэтийн 49 хувийг гадаадынханд зарах хэлцэл хийгээгүй. Манай компани 49 хувиа анхнаасаа худалдана гэж тооцоолоогүй. Үүнийг цаашдаа хөгжүүлж, ашиглаж, монголчууд үр шимийг нь хүртэнэ гэж боддог. Сингапурын компанид шилжүүлэх гэж байгаа гэдэг бол худлаа. УИХ-ын нэр бүхий гишүүдийн дэлгэсэн баримт гээд байгаа бичиг дээр Ц.Пүрэвтүвшин миний нэр дээрх компанийн нэр байгаа. Тэр компани руу шилжүүлэг хийх гэж байсан юм. Учир нь Стандарт банкны хэрэгтэй холбоотой. Стандарт банкинд төлөх өр 2016 онд 92 сая ам.доллар байсан бол одоо 120 сая ам.доллар буюу 300 гаруй тэрбум төгрөг болсон.

• Төрөөс томилогдсон ТУЗ, гүйцэтгэх захиралтай байгаа нөхцөлд “Эрдэнэт үйлдвэр”-ийн хувьцааг гадаадын компанид нууцаар зарах боломж байхгүй. 

• Л.Оюун-Эрдэнэ гишүүний хувьцаа шилжүүлсэн гээд байгаа Номуундарь гэдэг эмэгтэй манай компанийн ажилтан, албан бичиг хүргэж өгөхөөр итгэмжлэгдсэн л төлөөлөгч. 

• Сингапур дахь компанид шилжүүлэх гэсний зорилго нь тус улсад олон улсын томоохон Арбитр байршдаг тул Стандарт банкны хэргийг нааштай шийдвэрлэх боломжийг эрэлхийлсэн хэрэг.

Энэ мөнгийг татварт орох байсан орлогоос төлөхөөр байгаа. Арбитрын шийдвэр гарсан учраас өл төлбөр авах ажлыг албадан зохион байгуулах арга хэмжээ авна.

Энэ нөхцөлд “Эрдэнэт үйлдвэр”-ийн аль нэг хувьцаа эзэмшигч нь гаднын хөрөнгө оруулалттай компани буюу Сингапурын хөрөнгө оруулалттай компани байвал шинэ нөхцөл байдал илэрсэн гэдгээр маргааныг дахиж авч үзэх нөхцөл байдал үүсэх байсан. Тийм учраас 49 хувийг эзэмшигчийн зүгээс ийм арга хэмжээг авах гэж оролдсон. Мөн Сингапур дахь компанид шилжүүлэх гэсний цаад зорилго нь тус улсад олон улсын томоохон Арбитр байршдаг. Лондоны Арбитрийн шийдвэрийн эсрэг маргаан үүсгэх хамгийн боломжтой газар нь Сингапур гэж тооцсон. Нөгөөтэйгүүр Сингапурын албан ёсны компанид Эрдэнэтийн хувьцаа байгаа тохиолдолд эд хөрөнгийг нь хураах, битүүмжлэх, албадан гүйцэтгэх ажиллагаа хийхэд хүндрэлтэй болох байсан. Энэ бүгдийг тооцож манай талаас төлөх 300 гаруй тэрбум төгрөгийг бууруулах зорилготой байсан. Харамсалтай нь энэ ажиллагаа маань зогсох боллоо. Тиймээс Стандарт банкинд төлөх 300 гаруй тэрбум төгрөгийг мэдээлэл цацсан УИХ-ын гишүүдээс нэхэх хэрэгтэй. Стандарт банкны асуудлыг нааштай шийдвэрлэх боломж гарах мөчид улстөрчид энэ асуудлыг зориуд гацааж байгаа нь тодорхой зорилготой гэж харж байгаа” гэв.

Мөн тэрбээр Л.Оюун-Эрдэнэ гишүүний мэдээлэлдээ дурдсан Номуундарь гэх эмэгтэйрүү Эрдэнэтийн хувьцааг шилжүүлэх гэж байгаа гэж ярьсныг няцааж “Номиндарь гэдэг нь манай  компанийн ажилтан. Тэр хүн бол зүгээр л итгэмжлэгдсэн төлөөлөгч. Номуундарь гэж эмэгтэйг бичиг аваачиж өгөхөд томилсон. Итгэмжлэгдсэн төлөөлөгч гээд томилсон байхад “Эрдэнэтийн хувьцааг 1995 оны хүүхэд рүү шилжүүллээ” гэж ор үндэсгүй зүйл хэлж байгаад харамсаж байна. Төрийн түшээ, гадаадад боловсрол эзэмшсэн, залуусын төлөөлөл болсон хүн олон нийтийн анхааралд өртөхийн тулд давуу байдлаа ашиглаж төрийн ордноос худал мэдээлэл тарааж байгаад маш их харамсаж байна. “Эрдэнэт үйлдвэр”-ийн 49 хувийг манай компани зарахгүй гэдгээ дахин хэлье. Энэ ажиллагаа “Эрдэнэт үйлдвэр”-т л ашигтай байсан. Цаад утгаараа монголчуудад ашигтай байсан” гэсэн юм.

“Монголиан коппер корпорейшн” ХХК Эрдэнэтийн 49 хувийг зарахгүй

Харин “Монголиан коппер корпорейшн” ХХК-ийн ТУЗ-ийн дарга М.Мөнхбаатар “Өнөөдрийн үүссэн нөхцөл байдал Стандарт банкинд давуу байдал бий болгочихлоо. Гадаадад боловсрол эзэмшсэн, олон улсын эрх зүй мэдэх залуу гишүүд энэ үйл явдлыг Монгол Улсад ямар ч ашиггүй болгочихлоо. Эрдэнэт” үйлдвэрийн 51 хувь нь төрийн өмчит компани байгаа, 49 хувь нь манай компанийн өмч гэдэг шүүхийн шийдвэр гараад дөрөв, таван сар болчихоод байхад төрийн өмчийн бодлого зохицуулалтын газар улс төрийн зорилгоор шийдэхгүй байна. УИХ-ын гишүүн Л.ОюунЭрдэнийн дэлгэсэн баримтын нэг хувь нь манай компанид, нэг хувь нь улсын бүртгэлийн ерөнхий газар байсан. Тэгэхээр тус байгууллагаас байгууллагын нууцтай холбоотой мэдээллийг гаргасан гэж үзэж байна. Монгол Улсын иргэдийн мэдээллийг нууцлах ёстой байгууллага нь ил тод гаргаж байгааг юу гэж ойлгох вэ. Үүний үр дагавар нь Монгол Улс 300 гаруй тэрбум төгрөгийн өрөнд лавтай орж байна" гэсэн юм.