МАН-ын зовлон төрийн зовлон боллоо. Засгийн газрыг огцруулах бичиг өргөн барьсантай холбогдуулан Ерөнхий сайдыг дэмжигч талынхан парламентын үйл ажиллагааг гацаалаа. УИХ-ын чуулганы нэгд сэн хуралдаанаар улсын төсөвт бүхэлд нь тавьсан Ерөнхийлөгчийн хоригийг хэлэлцэх байсан ч, тэд орж ирсэнгүй. Харин чуулганы хуралдааны өмнөхөн Т.Аюурсайхан, Л.Оюун-Эрдэнэ, Л.Болд, Ж.Батзандан нарын гишүүн хэвлэлийн бага хурал хийн, “УИХ-ын нэр бүхий 40 гишүүн спикер М.Энхболдыг огцортол чуулганы хуралдаанд орохгүй байхаар тохиролцсон”-ыг дуулгав. Энэ талаар УИХ-ын дарга М.Энхболд “Чуулганы хуралдаанд оролцохгүй байгаа гишүүд төрийн эрхийг хууль бусаар авах оролдлого хийж байгаа юм уу.
Хууль тогтоох дээд байгууллагыг тараах оролдлого юм уу. Ингэж таарахгүй. Бүх зүйл хуулийн хүрээнд байх ёстой. Тийм учраас одоо чуулганы хуралдаанаа эхэлнэ. Хурал дээр ярих зүйлээ ярина" гэв. Хэдийгээр УИХ-ын дарга М.Энхболд чуулганы хурал-дааныг эхлүүлсэн ч, хэлэлцэх асууд лыг нь танилцуулах ёстой Ерөнхийлөгчийн тамгын газрын дарга З.Энхболд мөн орж ирсэнгүй. Харин Ард-чилсан намын бүлэг уг асууд-лаас завсарлага авч байгааг мэдээлснээр чуулганы хуралдааныг завсарлуулав. Ийн УИХ-ын чуулган үдээс өмнө хэвийн үргэлжлэх боломж гүй болсон тул зарим гишүүн зарчмын байр суурь илэрхийлснийг хүргэе.
О.Баасанхүү: Ерөнхийлөгчийн тавьсан хоригийг хэлэлцэх гэж байхад Ерөнхийлөгч хоригоо танилцуулахаас татгалзаж байна. Хоригоо танилцуулахаас татгалзаж байгаа учраас хоригоосоо татгалзаж байна гэж үзнэ. Ерөнхийлөгч хориг тавьснаар төсвийн тухай хууль хүчингүй болсон гэсэн үг. Хэрвээ энэ хууль хүчингүй болбол Монголын төр цаашид чадамжгүй болно. Сайн дураараа хориг тавьснаасаа татгалзлаа гэж үзэх горимын санал оруулж байна.
Спикер М.Энхболдыг огцортол 40 гишүүн чуулганы хуралдаанд орохгүй
Д.Хаянхярваа: Тэвчээр үнэхээр барагдаж байна. Бид ямар ч ажил хийсэн хуулийн хүрээнд хийх ёстой. Яагаад Засгийн газрыг огцруулах тухай асуудал тавьсан бэ гэхээр Ерөнхийлөгч, Ерөнхий сайд хоёрын үгсэн хуйвалдаж байгаа үйлдлээс үүссэн юм. Ерөнхийлөгчийн засаглал руу гулган орж парламентын засаглалыг таслах гэсэн оролдлогыг зогсоох хамгийн
сүүлчийн боломж бол энэ Засгийн газрыг унагаах явдал. Энэ боломжийг ашиглаж чадахгүй бол Ерөнхийлөгчийн засаглал руу орно. Засгийн газар Ерөнхийлөгчийн засаглал хоёр нийлээд парламент руу дайрч байна. Энэ бол Монголын тусгаар тогтнол, аюулгүй байдалд хамгийн ноцтой аюул занал учруулах явдал. Ард түмэн үүнийг анхааралтай ажиглаж байгаа байх. Би намын жижиг эрх ашгийн төлөө бус Монгол Улсын том эрх ашгийн төлөө ийм санал гаргаж энэ Засгийн газрыг огцруулах ёстой гэсэн үндэслэл тавьсан. Ерөнхийлөгч, Ерөнхий сайд хоёр нийлж Монголын төр, Монголын ард түмнийг бойкотолж байна.
Д.Эрдэнэбат: АН-ын бүлэг парламентын үйл ажиллагаа тасралтгүй явах ёстой гэсэн байр суурьтай байна.
Л.Энх-Амгалан: Монгол Улсад хуулийн засаглал байна уу. Эдийн засаг чинь хоригтой болчихлоо. Монгол Улс төсөвгүй болсон. Ирэх оны нэгдүгээр сарын 1-нээс жинхэнэ утгаараа эмх замбараагүй байдал үүснэ. Ерөнхий сайд өөрөө эмх замбараагүй байдал руу турхирч болдог юм уу. Ингэж улс орныхоо эрх ашгийг бойкотолж болдог юм уу. Ерөнхий сайд намынхаа байранд 300 гаруй офицер цуглуулаад зэвсэгт жагсаал хийнэ гэж болдог юм уу. Засгийн газрууд огцроод л явж байсан. Ингэж бойкот хийж байгаагүй. Энэ хүн үндсэн хуульд халдаж байна.
Д.Оюунхорол: Монголын төр ингэж доройтож, дампуурлын ирмэгт ирж байсан цаг үеийг санахгүй байна. Монголчууд ардчилсан сонгуулиар төрөө байгуулсан. Энэ 76 гишүүн ард түмний дуу хоолой болж ирсэн. Энэ парламент үйл ажиллагаа явуулахыг үндсэн хуулийн бус аргаар зогсоохоор оролдож байна. 2019 оны төсвийг баталъя. Төсвийн хориг хэлэлцэж байхад Сангийн сайд нь орж ирэхгүй. Одоо сүүлдээ Засгийн газрын гишүүн орж ирэхгүй байгаа нь үнэхээр харамсалтай байна. Ө.Энхтүвшин, Ц.Нямдорж, Ч.Улаан сайд нараас ичиж байна. Олон жил албан тушаалын бялуу хүртэж ирсэн хүмүүс шүү.
З.Нарантуяа: АН-ын гишүүд чуулганы хуралдааныг гацаахгүй явуулах байр суурьтай байгаа. Ерөнхийлөгчийн хориг хэлэлцэж байгаа асуудлаар завсарлага авъя. Төсвийн хоригийг хэлэлцэхэд Засгийн газрын гишүүд байхгүй байгаа учир Ерөнхийлөгчийн тамгын газрын дарга орж ирэхгүй байгаа юм байна. Энэ бол танай намын дотоод асуудал болохоос төрийн асуудал биш. Тиймээс завсарлага аваад танай нам бүлэг дээрээ асуудлаа шийдэж, үйл ажиллагааг хэвийн явуулахыг хүсч байна. Үдээс хойших хуралдаанаар Ерөнхийлөгчийн тамгын газрын дарга З.Энхболд орж ирсэн ч, хоригтоо өөрчлөлт оруулж байгаагаа бичгээр ирүүлснээ танилцуулав. харин үүнээс МАН-ын бүлэг завсарлага авснаар, уг асуудлыг хаасан юм.
