УИХ-ын гишүүн Ж.Мөнхбатын зөвлөхийн биед халдаж, аминд нь хүрэхийг завдсан тухай эрхэм гишүүн цахим сүлжээгээр дамжуулан мэдэгдлээ.
Тэрбээр "Албан тушаал, эрх мэдэл, хүний амь нас, эрүүл мэндээс үнэтэй гэж үү. Өчигдөр шөнө /11 сарын 17/ миний зөвлөхийг гэртээ орох гэж байхад нь орцонд үл таних хоёр хүн халдаж, төмрөөр толгойг нь хага цохиж, тархинд нь хүнд гэмтэл учруулж, араас нь боож, нүүр амыг нь гэмтээсэн байна.
Орцонд болсон энэ дуу чимээнээр нэг давхрын айлаас хүн гарч ирэхэд хоёр хүн зугтжээ. Хариуцлага алдсан Засгийн газар огцор, УИХ-ыг тараах гарын үсэг цуглуулна гэж хэлсний төлөө миний хэвлэл хариуцсан зөвлөхийн амь нас, эрүүл ммэндэд ноцтойгоор халдсан байна. Энэ асуудлаар цагдаа, тагнуул, хууль хяналтын байгууллагад албан ёсоор хандана" хэмээжээ.
УИХ-ын гишүүн Ж.Мөнхбат өнгөрсөн бямба гаригийн чуулганы хуралдаанд " Үнэн үг хэлсэн нэгнийхээ захиалгатайгаар хэвлэлээр гүтгэж байна. Үүндээ хүрэх юм бол Засгийн газар нь ч огцрооч, УИХ нь ч тарах ёстой. Ер нь хуулийн дагуу УИХ-ын гишүүд нь санаачлага гаргаад "УИХ-аа тараая". Би УИХ-ыг тараах гарын үсэг цуглуулж эхэлнэ. Одоо болъё. Намайг дэмжиж байгаа гишүүд гарын үсэг зураарай" хэмээж байсан. Тэрбээр УИХ дахь МАН-ын бүлэгтээ аль нэг талын бүлэглэлд хамаарагдаад байдаггүй, хэлэх гэснээ хэлчихдэг нэгэн гэж нөхөд нь хэлдэг. Сүүлийн үед түүнийг гадуур явахад мөрдөх, дагах, тагнах болсон гэсэн сураг ч гарсан юм.
