Д.Сарангэрэл: Виферон лааны эмчилгээний үр дүнгийн талаар нотолгоо гаргуулах шаардлагатай гэж үзлээ
Эмийн асуудлаар мэргэжлийн зөвлөл, хүүхдийн эмч нар,ТББ, ЭМЯ, АХБ-ны төлөөлөл хуралджээ. Энэ үеэр виферон лааны эмчилгээний үр дүнгийн талаар нотолгоо гаргуулах шаардлагатай гэж үзсэн байна.
Энэ талаар ЭМ-ийн сайд Д.Сарангэрэл "Өнөөдөр эмийн асуудлаарх мэргэжлийн зөвлөл, хүүхдийн эмч нар,ТББ, ЭМЯ, АХБ-ны төлөөлөл хуралдаж Виферон лааны эмчилгээний үр дүнгийн талаар нотолгоо гаргуулах шаардлагатай гэж санал нэгтэй үзлээ. 2016-2018 онд ЭМЯ-ны хүсэлтээр АХБанк санхүүжүүлэн олон улсын болон үндэсний эксперт, зөвлөхүүд, мэргэжлийн багийг оролцуулан "Улсын эмнэлгийн эмийн хангамж, хүртээмжийг сайжруулах. . ." төсөл хэрэгжүүлэх явцдаа эмчилгээний үр дүн нь нотлогдоогүй эмэнд эрүүл мэндийн даатгалаас ихээхэн санхүүжилт хийж байгаа тухай дүгнэлт хийж ЭМЯ-ны Эмийн хэлтэст өгсөн болно.
Вирусийн эсрэг өргөн хэрэглэж буй энэ лаа нь хүүхдийн эмчилгээний удирдамжид ороогүй, ялангуяа томуугийн үед хэрэглэхгүй байх талаар хүүхдийн эмч нар, мэргэжилтнүүд бидэнд хэлж анхааруулсаар ирсэн. Энэ үед ЭМД-аас энэ лааны үнийг 80% хөнгөлүүлэх оролдлого хийгдсэн учраас сэрэмжлүүлэг мэдээллийг салбарын сайд ,ЭМДҮЗ-ийн даргын хувьд олон нийтэд өгсөн билээ.
Үүнийг хувийн ашиг сонирхлын үүднээс мэдээлэл хийсэн мэт мушгин гуйвуулж буйд харамсаж байна. Надад эмнэлэг, эмийн сан, эм хангамжийн чиглэлд бизнес үгүй бөгөөд миний том ашиг сонирхол бол ард иргэдээ,тэр дундаа үр хүүхдээ өвдсөн үед нь чанартай,аюулгүй,өндөр үйлчилгээтэй эмээр хангах боломжийг бүрдүүлэх явдал юм.
Энэ үүргээ биелүүлэхийн тулд мэргэжлийн баг хамт олонтойгоо бүхнийг хийх болно. Тэр дундаа эм ханган нийлүүлэх байгууллага, Эмийн холбоотой нягт хамтран ажиллана. Хүний эрүүл мэнд ,амь настай холбоотой эмийн асуудалд бид онцгой анхаарах учиртай. Цаашид эмийн бүртгэл, зөвшөөрөл, хяналтын асуудлыг бодлогын яам бус олон улсын жишиг, ДЭМБ-ын зөвлөмжийн дагуу бие даасан байгууллага эрхлэх шаардлагатай. Эм, эмнэлгийн хэрэгслийн тухай хуулийг УИХ-аар хэлэлцүүлэх бэлтгэл ажлыг ЭМЯ хийж дууслаа. Эцэст нь эцэг эхчүүд, хэвлэл мэдээллийнхэндээ хандъя. Эмийн чанар, аюулгүй байдалд бид хамтдаа хяналт тавьж баймааж нь үр хүүхдээ , өөрсдийгөө эрсдлээс хамгаална. Та бид хамтдаа зориглон хийхгүй бол өөр хэн нэгэн хийхгүй" гэжээ.
