"Apple " компани өчигдөр Брүүклинд зохион байгуулсан арга хэмжээний үеэр шинээр гаргаж буй зөөврийн компьютерүүд, "iPad" болон бусад шинэ бүтээгдэхүүнүүдээ танилцуулсан байна. Өнгөрөгч есдүгээр сард тус компани шинэ "iPhone"-уудаа танилцуулсан бол энэ удаа ажил сургалтын хэрэгцээнд зориулагдсан тооцоолох хэрэгслүүд, компьютерүүдэд анхаарлаа хандуулжээ. Ингээд тэдний шинээр гаргасан онцлох бүтээгдэхүүнүүдийг танилцуулъя.

1 Macbook Air

Шинэ "Macbook Air" зөөврийн компьютер нь 4 сая пиксель бүхий 13.3 инчийн "Retina" дэлгэцтэй болсон бөгөөд цайвар хүрээ нь хар болж солигджээ. Өмнөх загвараасаа 17 хувиар бага эзэлхүүнтэй, мөн хурууны хээ уншдаг "TouchID" гэх мэт шинэ зүйлсээр тоноглогджээ.

Хүчин чадлын хувьд найм дахь үеийн "dual-core" процессортой, 16 гигабайт хэмжээ бүхий шуурхай санах ойтой байх аж. Мөн 1.5 терабайтын багтаамжтай хатуу диск нь өмнөх загвараасаа 60 хувиар хурдан ажиллах юм байна. Цэнэг барих хугацаа сайжирсан бөгөөд 13 цагийн турш тасралтгүй кино үзэхэд асуудалгүй ажээ.

Уг загвар нь мөнгөлөг, саарал (space gray), ягаан (rose gold) гэсэн гурван өнгөний сонголттойгоор ирэх бөгөөд үнийн хувьд 1199 ам. доллараас эхлэх юм байна.

2 Mac Mini

Сүүлд 2014 онд гаргаж байсан бичил хэмжээний ширээний компьютер "Mac Mini"-ийн шинэ загварыг "Apple" энэ удаа танилцууллаа. Тус компьютер ирэх арваннэгдүгээр сарын 7-ноос худалдаанд гарах бөгөөд урьдчилсан захиалгын үнэ 799 ам.доллараас эхэлж байна. 

Худалдан авагчид найм дахь үеийн дөрвөн цөмт эсвэл зургаан цөмт процессор, 8 гигабайтаас 64 гигабайт хүртэлх шуурхай санах ой, 2 терабайт хүртэлх хатуу дискний багтаамж бүхий хувилбаруудаас сонголтоо хийх боломжтой юм.

3 iPad Pro

Шинэ "iPad Pro" нь USB-C оролттой, "Home" товчлуургүй, оронд нь "Face ID" системтэй болсноороо онцлог. Мөн 11 инчийн болон 12.9 инчийн хэмжээ бүхий "шингэн Ретина"  дэлгэцтэй хоёр хувилбараар гарсан байна. 

Тус загварыг дагалдан хоёр дахь үеийн "Apple Pencil" ирэх ажээ. Шинэчлэгдсэн тус харандаа нь автоматаар холбогдож утасгүйгээр цэнэглэгдэхээс гадна "iPad" дээрээ соронзлогдон тогтдог ажээ. Үнийн хувьд 11 инч дэлгэцтэй хувилбар нь 799 ам.доллараас, 12.9 инчийнх нь 999 ам.доллараас эхэлж байна.

Эдгээр шинэ гарсан "MacBook Air", "Mac Mini", "iPad Pro" загварууд нь бүгд 100 хувь дахин боловсруулсан хөнгөн цагаанаар хийгдсэн ажээ.