АНУ хөгжиж буй орнуудад 60 тэрбум ам.долларын хөрөнгө оруулах зорилго бүхий агентлаг байгуулахаар төлөвлөж байна. Үүнийг Вашингтоны зарим албаныхан тайлбарлахдаа эдийн засгийн дайнд ялахын тулд Хятадын өр зээл ашиглаж буй бодлогыг сөрөх стратеги хэмээжээ. Ажиглагчид энэ алхмыг сүүлийн 50 жилд хөгжиж буй орнуудад арилжааны зээл олгоход хийгдэх хамгийн том шинэчлэл гэж үнэлэв. Гадаадын хувийн хөрөнгө оруулалтын корпорацыг (OPIC) шинэ агентлаг болгон зохион байгуулж, хувьцаанд хөрөнгө оруулах аж.
Өнөөгийн байдлаар OPIC зөвхөн өрийн бичиг худалдан авч байгаа нь Европын хөгжлийн санхүүжилтийн байгууллагуудтай харьцуулахад давуу талаа алдаж байна гэж үзсэн юм. OPIC-ын ерөнхий захирал Рей Вашборн Financial Times сонинд ярихдаа, Хятадууд зээлийг эзэмшил болгох хөтөлбөр хэрэгжүүлж, өрийн гинжинд оосорлуулсан улс орнуудыг бий болгож байгаа нь эдийн засгийн дайны хэлбэр хэмээн онцлов. OPIC-ын зээлдүүлэх хязгаарыг хоёр дахин нэмж, 60 тэрбум ам.долларт хүргэснээр хувьцаанд хөрөнгө оруулах боломжийг нээж, бусад хөгжлийн сангуудтай адил түвшинд ажиллах аж.
Шинэ зах зээлийн асуудлаар зөвлөдөг, Вашингтонд байрлалтай KRL фирмийн захирал Рива Левинсон уг төслийг 11 дүгээр сард болох Конгрессын завсрын сонгуулиас өмнө батална гэдэгт найдаж буйгаа мэдэгдэв. Тэрбээр “Энэ бол АНУ өөрийн компаниудаа хөгжиж буй орнууд дахь арилжааны байлдаанд дэмжих ёстойг хүлээн зөвшөөрсөн анхны бодит алхам. Учир нь Хятад улс бүгдийг хамчихаад байгаа” хэмээв. Хөрөнгө оруулалтыг хөгжилд ашиглах тухай хуулийг наймдугаар сард төлөөлөгчдийн танхимаар батлахад хоёр намын төлөөлөл хоёул дэмжсэн юм.
OPIC-ыг өөрчлөн олон улсын хөгжлийн санхүүжилтийн корпорац болгон зохион байгуулна. Уг хуулийн төслийг боловсруулахад оролцож байгаа хүмүүсийн ярьснаар энэ алхам хувийн салбарын хөрөнгө оруулалтыг дэмжих, Хятадын өрийн дипломат арга барилыг сөрөхийн сацуу АНУ-ын татвар төлөгчдөд орлого оруулах зорилготой гэнэ. Наймдугаар сард 16 сенатч хамтран Сангийн сайд Стивен Мнучинд илгээсэн захидалдаа “Олон улсын валютын сан Хятадын дэд бүтцийн гэгдэх мөлжигч зээлийн улмаас хүндрэлд орсон улсуудыг аврах ажиллагаа явуулж байна” хэмээн шүүмжилсэн.
Уг захидалд Хятадууд Африкийн Жибути улсын ачааны боомтыг эрхэндээ авсныг дурдсан. Өнгөрсөн онд Бээжин гадаад дахь анхны цэргийн баазаа Улаан тэнгисийн эрэгт Жибутийн нутагт байрлуулсан. Ноён Вашборн энэ талаар “Хятадын улсын компаниуд гадаад бодлогынх нь нэг хэсэг болж, Хятадын төрийн эрх ашгийн үүднээс ажиллаж, хяналтаа өргөжүүлж байна” хэмээн сэрэмжлүүлэв. Зарим улс Хятадын зээлийн арга барилд эргэлзэж эхэлсний дотор долдугаар сард Малайз 22 тэрбум ам.долларын өртөгтэй Хятадын дэмжлэгтэй төслийн санхүүжилтыг эргэн шалгахаар болсон.
Африкийн зарим орны иргэд Хятадын зээлийг улс орноос илүү авлигач түшмэдүүдэд ашигтай гэж шүүмжилдэг. Ганын ардчилсан хөгжлийн төвийн захирал Кваси Премпех “Хятадууд Африкийн улс төрийн дээдэстэй дотносдог ч ард түмэнд нь тэгж ханддаггүй. Африкийн элитүүд тэдэнтэй бизнес хийдэг ч ил тод байдал үзэгддэггүй. Хүн амын түвшинд Хятадууд өрнөдийнх шиг зөөлөн хүчний бодлогыг хэрэгжүүлэх чадваргүй” хэмээн өгүүлсэн юм.
