Цахим худалдааны "Amazon" группийн хувьцааны үнэ сүүлийн 12 сард хоёр дахин өссөний дүнд зах зээлийн үнэлгээ нь нэг их наяд ам.долларт хүрлээ. "Apple"-ийн үнэлгээ өнгөрсөн сард дэлхийд анх удаа нэг их наяд ам.доллар давж байв. "Apple"-ийн харьцангуй тогтвортой өсөлттэй харьцуулахад цахим худалдааны аваргын үнэлгээ толгой эргэм хурдтай дээшилснээрээ онцгой. "Amazon"-ы үнэт цаасны үнэ сүүлийн ганцхан жилийн дотор 520 тэрбум ам.доллараар нэмэгджээ.
Ердөө энэ өсөлт л дэлхийд зах зээлийн үнэлгээгээрээ тав, зургадугаарт ордог "Berkshire Hathaway", "Facebook" хоёрыг нийлүүлсэнтэй тэнцэнэ. Долдугаар сард улирлын цэвэр ашиг нь анх удаа хоёр тэрбум ам.доллар давсан "Amazon"-ын хувьцааны үнэ Уолл Стритэд эрчимтэй өссөөр байна. "Хедж" сангийн менежер асан, эдүгээ дэлхийн тэргүүн баян эрхэм Жефф Безос 1994 оны долдугаар сард Вашингтон муж улсын Беллевью дахь гарааштаа эхлүүлсэн бизнес нь номын онлайн худалдаа байлаа. Эдүгээ ноён Безос компанийнхаа хувьцаанаас эзэмшдэг 160 гаруй тэрбум ам.долларын үнэлгээтэй 16 хувь бол түүний хувийн хөрөнгийн гол цөм юм.
Тухайн үед буюу 1997 онд "Amazon" IPO-гоор 54 сая ам.долларын даруухан хөрөнгө төвлөрүүлсэн нь компанийн үнийг 438 сая ам.долларт хүргэжээ. Тэр цагаас хойш агуулах, төв байрны хөдөлмөрийн нөхцөлтэй холбоотой элдэв маргаан дунд "Amazon" эрчтэй өргөжсөөр айдас, бахархал зэрэг төрүүлдэг дэлхийн компанийн нэг болж хувирлаа. "Amazon" жижиглэн худалдааны үндсэн бизнесээ байнга өргөжүүлж, үр ашгийг нь сайжруулж ирсний үрээр хэрэглэгчдийн үнэт өгөгдлийг үлэмж хэмжээтэй цуглуулж чаджээ. Цуглуулсан өгөгдөлдөө тулгуурлан илүү орлоготой үүлэн тооцоолол, сурталчилгаа, онлайн видео зах зээлд нэвтэрч, хиймэл оюун ухаан, эрүүлийг хамгаалах зэрэг урт хугацаандаа өгөөжтэй салбарт хөрөнгө оруулж эхлэв. Мөн ачааны машин, нисэх онгоц, дроноор бараа бүтээгдэхүүн хүргэх түгээлтийн сүлжээ байгууллаа.
Эдүгээ ноён Безосын хил хязгааргүй амбиц Цахиурын хөндийгөөс хэдийнэ халиад байна. "Fire Phone" ухаалаг утас зах зээлд гаргаад жилийн дараа зогсоосон зэрэг “бүдэрсэн” түүх ч тус компанид бий. Гэхдээ л ноён Безос ажилтнуудаа эрсдэлтэй бизнест азаа үзэхийг хэзээд дэмждэг. “Би чинь олон тэрбум доллар бүтэлгүйтэж алдсан хүн” хэмээн тэрбээр 2014 онд тайлбарлаж байв. “Туршилт бол төрөлх чанараараа бүтэлгүйтэл мөн. Гэхдээ хэдхэн амжилт л бүтэлгүй өчнөөн зүйлсийг нөхөж өгнө”. "Amazon"-ы эхний 20 жил нь ирээдүйн үр дүнд чиглэсэн өчүүхэн ашиг бүхий дайчин шийдмэг хөрөнгө оруулалтын түүх.
Тус компанийн улирлын цэвэр ашиг өнгөрсөн оны сүүлийн улиралд нэг тэрбум ам.доллар ч хүрэхгүй байсан юм. Amazon нь дотком бүүмийн хөөс хагарахаас хэдхэн долоо хоногийн өмнө буюу 2000 оны хоёрдугаар сард хөрвөх бондын хэлцлээр 672 сая ам.доллар цугларуулж чадсаны ачаар дампууралгүй тэсэж үлдсэн юм.
