Урт амралт урт наслуулдаг
Мюнхенд болсон Европын кардиологийн нийгэмлэгийн конгрессд илтгэл тавьсан эрдэмтэд амралтаа уртаар авдаг хүмүүс хэт ажилладаг буюу богино амардаг хүмүүсээс илүү насалдаг гэж танилцуулав. Хельсинкийн их сургуулийн профессор Тимо Страндберг “Эрүүл амьдрах дэглэм болон сайн хоол хүнсээр ажлын хэт ачаалал буюу амралтгүй ажилласнаа нөхөж болно гэж бодох хэрэггүй.
Амралт бол стрессээс ангижрах, зүрхний эрүүл мэндээ сайжруулах үр дүнтэй арга болохыг ялангуяа, эрчүүдийн байдлаас харж болно” гэжээ. ДЭМБ-ын судалгаанаас үзэхэд зүрхний шигдээс, цус харвах, зүрхний дутагдал зэрэг зүрх судасны өвчлөл дэлхийн хэмжээнд үхлийн нэгдүгээр шалтгаан болдог. Жил бүр энэ өвчнөөр 17 сая хүн нас бардаг аж. Ийм өвчлөлийн гол шалтгаан нь стресс, буруу хооллолт, хөдөлгөөнгүй амьдрал, муу зуршил зэргээс үүсдэг цусны даралт нэмэгдэх үзэгдэл юм.
Страндберг болон түүний хамтрагчид Финландын нийслэлд амьдардаг 1200 баян бизнесмений амьдралын хэв маягийг 50 орчим жил ажиглаж, зүрх судасны системийн эрүүл мэнд ба нас баралтын уялдааг нээсэн байна. Судлаачид туршилтад оролцогсдыг хоёр бүлэгт хувааж, нэг бүлэгт нь эрүүл амьдрахуйн зөвлөгөө болон холестерин, цусны даралтаас сэргийлэх эм өгчээ. Харин үлдсэн хэсэг нь хуучин хэвээр амьдарч байв.
Эхэндээ гаднын оролцоо эрүүл мэндэд сайнаар нөлөөлж буй үр дүн гарсан гэнэ. Зүрхтэй холбоотой асуудал 46 хувиар буурч, биеийн ерөнхий байдал мэдэгдэхүйц сайжирчээ. Гэтэл цаашдын ажиглалтаар санаандгүй уялдааг илрүүлж, хамгийн гол нь 30 жилийн турш тусламж авсан бүлгийнхний нас баралтын тоо хуучнаараа амьдрагсдынхаас давсан байна. Цаашлах тусам энэ ялгаа нэмэгдсэн тул эрдэмтэд хэвийн бус үзэгдлийн учрыг олохын тулд оролцогсдын амьдралын хэв маягийг судалж эхэлжээ.
Ингээд эхний бүлгийн бизнесменүүдийн дунд нас баралтын тоо өндөр байгаа шалтгаан нь тэд нийт оролцогчоос дунджаас бага хугацаагаар амарчээ гэж дүгнэсэн байна. Өөрөөр хэлбэл, хэт хөдөлмөрлөх тусам дундаж наслалт багасаж, зүрх судасны өвчлөлөөр нас барах түвшин нэмэгддэг аж. Жишээ нь, жилдээ гурван долоо хоног хүрэхгүй амардаг эрчүүдийн дунд бүтэн сар амрагсдаас нас баралтийн түвшин 37 хувь дээгүүр байжээ. доктор Страндберг “ажиглалтаас үзэхэд бага амарсан эрчүүд бусад оролцогсдоос бага унтаж, илүү ажиллаж байсан.
Өндөр стресс тэдний эрүүл амьдралын хэв маягийг үгүй хийсэн бололтой. Түүнээс гадна биеэ үргэлж хэвийн түвшинд барих чармайлт нь тэднийг стресстүүлж байсан байх” хэмээн тайлбарлав. “Гэхдээ хоолны дэглэм барьж, хорт зуршлаас татгалзах нь насыг богиносгоно гэсэн үг биш. Харин илүү амарч, стресстэй тэмцэх нь эрүүл амьдралын хэв маягийг улам үр дүнтэй болгоно” гэж тэрбээр зөвлөсөн байна.
