Энэ нь ОХУ-д шувууны томуу өвчин гарсантай холбоотой бөгөөд нүүдлийн шувуудаар дамжин орж ирэх магадлалтай учраас шувууны буцах нүүдлийн үеийг тааруулан энэхүү тандалт судалгааг хийж байгаа аж. Тандалт судалгааны хүрээнд Өгийнуур болон Дойтын цагаан нууранд шувууны тооллого хийж, зүйлийн бүрдлийг тогтооход 47 зүйлийн 3629 шувууг бүртгэсэн байна.

Мөн нууруудын эргэн тойрноос шувууны сангас цуглуулан, 120 дээжийг зааврын дагуу авч, лабораторийн шинжилгээнд явуулжээ. Судалгааны явцад шувууны томуугийн болон ямар нэгэн шалтгааны улмаас гэмтсэн болон үхсэн шувуу тааралдаагүй бөгөөд судалгаа үргэлжилж буй юм байна. Энэхүү судалгааг энэ жил гурав дахь удаагаа АНУ-ын Олон улсын хөгжлийн агентлагийн “Шинээр тархаж буй цар тахал хөтөлбөр”-өөс санхүүжилттэй PREDICT-2” төслийн хүрээнд төслийн багийнхантай хамтран хийж байгаа аж.

ОХУ-ын Курскийн бүс нутагт шувууны томуугийн А вирусын Н5 уургийн бүтэц бүхий хэв шинж илэрсэн талаар “РИА Новости” агентлаг мэдээллэжээ. Өнгөрсөн тавдугаар сард Приморийн талд шувууны томуугийн тохиолдолд бүртгэгдсэн байна. Аж ахуйн нэгжүүдэд Оросын Самар, Пенза, Курскийн бүс нутгаас шувууны мах, махан бүтээгдэхүүн оруулж ирэхийг хоригложээ. Казахстаны хөдөө аж ахуйн яам шувууны томуугийн дэгдэлтийн улмаас Оросын 36 шувууны аж ахуйгаас бүтээгдэхүүн импортлохыг хориглосон байна.

Шувууны томуу нь хөдөө аж ахуй, синантропик, зэрлэг шувуудад нөлөөлдөг вирусийн халдвар юм. Бүх төрлийн шувууд буюу тахиа, нугас, галуу, цацагт хяруул, бор шувуу, тагтаа зэрэг нь томуунд мэдрэмтгий байдаг ажээ. Шувууны томуугийн А вирус байгальд өргөн тархсан бөгөөд олон зүйлийн амьтад, түүний дотор усны шувуудын дунд усаар дамжин тархаж, гэдэсний халдвар үүсгэх буюу шинж тэмдгийн илрэлгүй вирусын халдвар тээгч болдог байна.

2003 оны сүүлчээр зүүн Азийн орнуудад гарч байсан бол удалгүй нүүдлийн шувуудаар дамжин Европ, Ойрхи Дорнодын орнуудад тархаж, шувуунаас хүнд халдварласнаар дэлхий нийтийг түгшээсэн халдварт өвчний түвшинд хүрчээ. Манай улсын хэмжээнд 10 аж ахуйн нэгжийн 90 мянга орчим шувуу байдаг хэмээн Шувууны томуугийн эрсдэлт байдалд хийсэн задлан шинжилгээ, үнэлгээний материалд дурджээ. Нийт 2000 гаруй айл өрх хоёр төрлийн 400 мянган шувуу (тахиа, галуу, нугас)-г нилээд өргөн газар нутагт задгай маллагаатай үржүүлэн аж ахуйн зориулалтаар тэжээдэг гэсэн тоон мэдээлэл байдаг ажээ.

Түүнчлэн казах үндэстэн ан авд ашиглах зорилгоор цармын бүргэдийг гаршуулан тэжээдэг ба гоёл, гэр ахуйн болон нийгмийн сонирхлын үүднээс тоть, тагтаа тэжээж буй өрх, айлууд ч олон байдаг байна. Монголд 19 багийн 60 овгийн 200 төрөлд хамаарах 466 зүйлийн шувуу бүртгэгдсэнээс орших хэлбэрийн хувьд 81 зүйл нь суурин, 385 зүйлийн шувуу нүүдлийн, тэдгээрээс 250 зүйлийн шувуу манай нутагт өндөглөдөг, 52 зүйл нь тохиолдлоор ирдэг байна. Эдгээрээс ус, намаг түүний ойролцоо амьдардаг буюу усны шувуу гэгддэг 170 зүйлийн шувуу байдгаас 105 зүйл нь мөн манайд өндөглөн зусдаг байна. Тэжээвэр шувууд нь зэрлэг шувуудтай тэжээл, ус, бэлчээрээр шууд харьцаж байдаг нь нүүдлийн шувуудаас тэжээвэр шувууд, мал, амьтдад, улмаар хүнд томуугийн халдвар дамжих магадлалтай ажээ.