Өнгөрсөн жил буюу 2017-2018 оны хичээлийн жилд 227, төрийн бус 434 нийт 661 үйл ажиллагаа явуулж байснаас 36.671 хүүхэд хамрагдсан байна. Харин 2018-2019 оны хичээлийн жилд сургуулийн өмнөх боловсролд төрийн өмчийн 222, төрийн бус 450, нийт 672 цэцэрлэгт 114.252 хүүхэд хамрагдах төлөвтэй байгаа аж.

Гэвч цэцэрлэгийн хүрэлцээний асуудал, цэцэрлэгт хамрагдаж чаддаггүй хүүхдүүдийн асуудал жил бүр л яригддаг хэвээр. Тэр тусмаа хүүхдээ төрийн өмчийн цэцэрлэгт бүртгүүлнэ гэдэг асуудал жил бүрийн өдийд эцэг эхчүүдийн “шүдний өвчин” болсоор ирэв.

Энэ жил ч зарим дүүргийн цэцэрлэгүүд ачаалал ихтэй, хүүхдийн тоо их байгаагаас эцэг эхчүүд сугалаагаар азаа үзэж, хүүхдээ цэцэрлэгт сургах үгүйгээ шийдэж байгаа юм. Цэцэрлэгийн цахим бүртгэлд 85 мянга орчим хүүхэд хамрагдсан байна. Тодруулбал, цэцэрлэгт шинээр элсэхээр 35.127 хүүхэд, хуучин бүртгэлээ баталгаажуулахаар 49.315 хүүхэд цахим бүртгэлд хамрагджээ.

Төрийн өмчийн цэцэрлэгт 85 мянган хүүхэд бүртгүүлснээс 31.209 хүүхэд шалгараад байгаа аж. Харин хувийн хэвшлийн цэцэрлэгүүд бүртгэлээ үргэлжүүлэн хийсээр байна. 

Хувийн хэвшлийн цэцэрлэг Монгол иргэний хөрөнгө оруулалттай, хоёроос доошгүй жил тогтвортой үйл ажиллагаа явуулсан, өөрийн байранд үйл ажиллагаагаа явуулдаг байх гэсэн гурван шаардлага биелүүлсэн байх ёстой байдаг. Өнөөдрийн байдлаар:

-“Бяцхан сувд” цэцэрлэг- сарын төлбөр 250 мянгаас 300 мянган төгрөг

-“Бумбардай найзууд” цэцэрлэг -сарын төлбөр 280 мянган төгрөг

-“Хэрэмхэн”цэцэрлэг-сарын төлбөр 250 мянган төгрөг

-“Оргил жаалууд” цэцэрлэг- сарын төлбөр 1-2 нас 200 мянга, 3-5 нас 150 мянган төгрөг

-“Эрдэм” цэцэрлэг- сарын төлбөр 250 мянган төгрөг

-“Амила” цэцэрлэг- сарын төлбөр 350 мянган төгрөг

-“Гоё ертөнц” цэцэрлэг”- сарын төлбөр 230 мянган төгрөг, ясли 260-280 мянган төгрөг

-“Миний хүүхдүүд” цэцэрлэг-сарын төлбөр 2 нас хүртэлх 22 мянган төгрөг, 5-дээш насныхан 190 мянган төгрөг

-“Булган зул” цэцэрлэг – сарын төлбөр 1,8-2 настай хүүхдүүд 130 мянган төгрөг, 2-оос дээш настай бол 100 мянган төгрөг

-“Шинэ ирээдүй” цэцэрлэг- сарын төлбөр 2 хүртэлх настай бол 200-250, 2 дээш настай бол 180 мянган төгрөг

-“Энэрэл” цэцэрлэг- сарын төлбөр 280 мянган төгрөг

-“Бяцхан сондор” оюун ухааны академийн харьяа цэцэрлэг-сарын төлбөр 650 мянган төгрөгийн тус тус төлбөртэй байна.

Хувийн цэцэрлэгийн төлбөр байршил, ажиллах цаг, хүүхэд хөгжүүлэх хөтөлбөр зэргээсээ хамаараад сарын 100-650 мянган төгрөгийн хооронд хэлбэлзэж байгаа юм. Ямартаа ч, хүүхэд хөгжүүлэх хөтөлбөрүүд бүхий энгийн цэцэрлэгт гурван сар хамрагдах хэмжээний өртөгөөр хувийн хэвшлийн гэх тодотголтой цэцэрлэгт бяцхан жаалууд нэг сар л хичээллэх боломжтой.

Цэцэрлэгийн төлбөрийн дундаж нь 250-300 мянга буюу эцэг эхчүүд дунджаар гурван сая төгрөг төлөх шаардлага тулгарах юм байна. Өдрийн зургаан хоолтой, тансаг зэрэглэлийн цэцэрлэгт оруулахаар бол төлбөр 6.5 саяас эхэлж буй аж.

Бид хувийн хэвшлийн зарим цэцэрлэг хичнээн хүүхэд элсүүлэхээр ажиллаж байгааг сонирхлоо.

-“Энх бүүвэй” цэцэрлэг 20 хүүхэд элсүүлдэг бөгөөд шинээр нэмж цөөхөн хүүхэд бүртгэж байгаа аж.

-“Бөмбөөхөн” цэцэрлэгт энэ жил 150 хүүхэд бүртгүүлснээс 70 хүүхэд шалгараад буй юм байна. Тус цэцэрлэгийн хувьд хоёр нас хүрээгүй буюу ой таван сартай 15 хүүхэд элсүүлж авахаас найман хүүхэд бүртгүүлжээ. Мөн хоёр настай 25-30 хүүхэд элсүүлэн авах ажээ.

-“Нандин гурван эрдэнэ” цэцэрлэг нийт дөрвөн салбараар үйл ажиллагаагаа явуулдаг. Нэг салбартаа 40-50 хүүхэд элсүүлдэг байна. Нэг салбарын бага анги буюу хоёр гурван настнуудын ангид 15-20 хүүхэд элсүүлэн авдаг аж. Өөрөөр хэлбэл, тус сургуулийн дөрвөн салбарын бага ангид гэхэд л нийт 60 хүүхэд элсэх юм байна.

2017-2018 оны хичээлийн жилд 2016 онд батлагдаж мөрдөгдөж буй тогтоолоор хувьсах зардлыг бодож сургуульд нь олгосон байна. Тус тогтоол өөрчлөгдөөгүй цагт цэцэрлэгүүдэд олгох хувьсах зардал ингэж олгогдсоор байх юм байна. БСШУСЯ-наас өгсөн мэдэээллээр:

-Улаанбаатар хотод нэг хүүхдэд ногдох хувьсах зардал нь 807,8 төгрөг

-Аймгийн төвөөс бусад газар 998,2 төгрөг

-Аймгийн төвд 912,3 төгрөг байхаар тус тус боддог гэсэн мэдээлэл өгсөн юм.