Энэ талаар Монгол Улсын Гавьяат эмч, доктор, профессор И.Пүрэвдорж хэлэхдээ, "Би 44 жилийн турш АШУҮИС-д багшилж байна. намайг багшилж байх хугацаанд түүхэнд ийм зарчимгүй томилгоо өмнө нь гарч байгаагүй. Тус томилгоо нь "Юм хийсэн" хүнийг халдаг жишгийг тогтоодог болоод байна. Захирлын албыг хашиж байсан Г.Батбаатар анагаахынхны түүхэнд хүсэж мөрөөдөж байсан сургуулийн эмнэлэг барьж гүйцэтгэх ажлын хөөцөлдсөн хүн. Сургуулийг хоёр тэрбум төгрөгийн орлоготой байхад хүлээн авч байсан, бол одоо 20 тэрбум төгрөгийн санхүүжилттэй болсон" гэлээ.

Ж.Цолмон АШУҮИС-ийн захирлын албан тушаалд томилогдсоны дараа сургуулийн хэд хэдэн газрын дарга нарыг ажлаас нь чөлөөлж, өөрийн хүмүүсийг томилж байгаа аж. Энэ нь ажил нь нэгэнт цэгцэрсэн, урагштай явж байсан төсөл, бүтээн байгуулалтууд зогсонги байдалд оруулаад байгаа талаар мэдээлэв. Үүний тод жишээ бол АШУҮИС өөрийн санхүүжилтээр барьж буй хотхоны бүтээн байгуулалтын ажил энэ асуудлаас болж зогсонги байдалд орсон гэв.   

Мөн Анагаах Ухааны доктор Т.Баясгалан хэлэхдээ "Төрийн үйлчилгээний удирдах албан тушаалтныг томилох, сонгон шалгаруулалт явуулах журам"-д тодорхой албан тушаалын сул орон зай гарсан тохиолдолд сонгон шалгаруулалтыг заавал явуулна мөн үр дүнг олон нийтэд зарлана гэж заасан байдаг. Гэтэл хууль, эрх зүйн журмаар зохицуулагдсан энэхүү журмыг алгасч, удирдлагыг томилсонд эсэргүүцэж байна. Хэрэв тус сонгон шалгаруулалт хууль ёсны дагуу болж, нэр дэвшигч сонгон шалгаруулалтад тэнцсэн бол эсэргүүцэл илэрхийлэхгүй байсан" гэлээ.