МУИС-ийн оюутнууд өнөөдөр хичээлийн нэгдүгээр байрныхаа гадна талбайд сургалтын төлбөр нэмэгдсэнийг эсэргүүцэн, жагсаал зохион байгууллаа. Жагсаал өдрийн 13:00 цагаас эхэлсэн бөгөөд 300 орчим оюутан оролцсон гэх мэдээллийг зохион байгуулагчдын зүгээс өгч байна. Сургалтын төлбөр нэмэгдсэн асуудлаар МУИС-ийн Оюутны холбооны Хяналтын зөвлөлийн дарга Г.Ариунзаяагаас тодруулга авлаа.

-Оюутнууд сургуульдаа сургалтын төлбөрийн асуудлаар яг ямар шаардлага тавьж байгаа вэ?

-Бид өнгөрөгч тавдугаар сарын сүүлээс эхлээд, дүнгийн наймааны асуудлаар олон нийтэд хандаж эхэлсэн. Зургадугаар сард МУИС-ийн ТУЗ-ийн хуралдаан болж, Азийн топ 100 сургуульд багтах зорилгын хүрээнд төлбөр нэмэх шийдвэр гаргасан байдаг. Ингэхдээ 12.5 хувиар нэмэгдүүлнэ гэсэн мэдээллийг бидэнд өгсөн юм. Гэтэл бодит байдал дээр 19.9-28 хувь нэмэгдчихээд байна. Үүнийг л бууруулж өгөхийг бид сургуулиасаа шаардаж байгаа.

-Сайдын өгсөн зөвлөмжөөр зөвшилцлийн хүрээнд 10 хувь хүртэл нэмж болно гэсэн байгаа?

-Инфляцийн түвшин өнөөдрийн байдлаар 8 хувьтай байна. Өнгөрсөн зургадугаар сард 6.3 хувь байсан. Уг нь төлбөрийг нэмэгдүүлэхдээ инфляцийн түвшинтэй уялдуулах бодлого барих ёстой. Сайдын зөвлөмж нь  зөвшилцөлд хүрсэн тохиолдолд 10 хүртэлх  хувиар нэмж болно гэсэн байгаа. Гэтэл МУИС үүнээс 2-3 дахин их нэмэх шийдвэрийг гаргасан. Сайдынхаа зөвлөмжийг дагадаггүй улсын сургууль гэж байдаг юм уу.

-Та бүхний асуудлыг сургуулийн захиргаа хүлээж авч, уулзсан уу?

-Бид энэ тогтсон төлбөрийн хэмжээг бууруулах хүсэлтэй байна. Нэгдүгээр ангиас төгсөх анги хүртлэх бүх оюутнуудын төлбөр сургуулийн хэмжээнд нэмэгдсэн. Тухайлбал, би төгсөх ангийн оюутан. Өмнөх жилийнхээс нэг кредит 21 мянган төгрөгөөр нэмэгдчихээд байна. Одоохондоо сургуулийн зүгээс бидэнд ямар ч хариу өгөөгүй. Бид салбар яам, ШӨХТГ-д хүртэл гомдол хүсэлтээ гаргасан. Өмнө нь сургуулийн удирдлагуудтай уулзсан хэдий ч бидэнд бодитой хариулт өгөөгүй.

МУИС-ийн хичээлийн нэгдүгээр байрны гадна жагсаж буй оюутнуудыг сургууль руу нэвтрэхийг хориглосон байдалтай байв. Хамгаалалтын алба нь сургуулийн хаалгыг дотроос нь түгжиж, зөвхөн албан ажлаар яваа оюутнуудыг нэвтрүүлж байсан юм. Улмаар жагсаалыг сурвалжлахаар очсон сэтгүүлчдийг дотогш нэвтрэх үеэр гаднах талбайд жагсаж байсан хэд хэдэн оюутан сургууль руугаа нэвтрэв.

Сургалтын төлбөрийн нэмэгдлийн тухайд, нэгж оюутан бүрд тодорхой байдлаар мэдэгдэхүйц нэмэгдсэн гэж оюутнууд тайлбарлаж байна. Тухайлахад, энэ жил гуравдугаар ангид элсэж буй  Хуулийн сургуулийн нэг кредитийн үнэ 120.800 төгрөг болсон байна. Өнгөрсөн жил гуравдугаар ангийн оюутнууд нэг кредит тутамдаа 104.000 төгрөг төлж байсан аж.

Түүнчлэн оюутнуудын зүгээс МУИС-ийн 75 жилийн ойд 750 сая төгрөг зарцуулсан. УИХ-ын нэр бүхий гишүүний томилолтын зардлыг МУИС төлсөн асуудлыг шүүмжилж байлаа. Энэ бүх хэрэглээ тойрсон зардлаа багасгахад төлбөр буурах боломжтой гэж тайлбарлаж буй юм.

Харин сургуулийн зүгээс  дотоод хэрэглээг хангах үүднээс төлбөр нэмэхээс өөр аргагүй байгаа. Зарим алдагдалтай ажилладаг салбар сургуулиа арай дөмөг эдийн засгийн үзүүлэлттэй хэд нь чирч явж байгаа. Хуучин горимоор сургалтын төлбөрийг тооцоход сургууль хэт их алдагдалтай ажиллах эрсдэлтэй гэсэн тайлбарыг өгч буй юм.

МУИС-ийн сургалтын төлбөрийн нэмэгдлийн асуудлаар Дотоод хамтын ажиллагаа, олон нийттэй харилцах хэлтсийн дарга П.Лхамсүрэнгээс сургалтын төлбөр тойрсон зарим асуудлаар мэдээлэл авлаа.

-Оюутнуудын хэлээд байгаачлан нэр бүхий УИХ-ын гишүүний томилолтын зардлыг МУИС гаргасан  нь үнэн юм уу?

-Нэр бүхий гишүүний томилолтын зардлыг даасан тухайд, физикч хүн билээ. Нийтдээ 20-иад оюутны сургалтын төлбөрийг ивээн тэтгэсэн юм билээ. Тухайн явсан ажил нь сургуулийн холбогдолтой ажил байсан. Тийм учраас  зардлыг сургуулиас гаргасан гэж би хувьдаа ойлгосон.

-Сургуулийн захиргааны зүгээс жагсаж буй оюутнуудын дуу хоолойг сонсох эрхийг нь яаж хангах вэ?

-Сургуулийн удирдлагуудтай уулзах асуудал нээлттэй байгаа шүү дээ.

-Сургууль руугаа нэвтрүүлэхгүй байна шүү дээ?

-Оруулж болно оо.

-Яг бодитоор сургалтын төлбөр энэ жил хэдэн хувиар нэмэгдсэн юм бэ?

-Сургалтын төлбөрийн нэмэгдэл 15.2 хувь гэсэн тоо надад ирсэн. Гэхдээ үүнээс буурсан үзүүлэлтүүд ч байгаа. Манай сургуулийн онцлогоос шалтгаалж, зарим салбар маань алдагдалтай ажилладаг. Тухайлбал, Физикийн анги гурван сурагч, 30 багштай. Гурван оюутны төлбөрөөр 30 багшийг цалинжуулж хүрэхгүй учраас  бусад сургуулийн  орлогоос ийш нь татах зэргээр нөхөж явдаг. Кредитийн мөнгө тооцолтод энэ жил өөрчлөлт оруулсан нь үнэн. Сургууль өөрөө маш өндөр  зардалтай ажилладаг учир төлбөрийн нэмэгдэл энэ чиглэлд л зарцуулагдана.