Энэ сарын 15-ны өдөр Говь-Алтай аймгийн Онцгой байдлын газарт тус аймгийн Хөхморьт сумын Сангийн далай нууранд олон тооны шувуу үхсэн тухай дуудлага ирсэн байдаг. Ажлын хэсгийнхэн ангир, цахлай, нугас, бор галуу, болжмор зэрэг нийт 3216 шувуу үхсэнийг тогтоож, хоёр ээлжээр цуглуулан, устгасан. Үхсэн шувуудын 63 хувь нь ангир, 11,4 хувь нь цахлай, 19,3 хувь нь нугас, зургаан хувь нь бор галуу, 0,2 хувь нь болжмор байсан тухай мэдээллийг бид хүргэсэн билээ.

Шувууд ямар шалтгааны улмаас ийн олноороо үхсэн талаар Байгаль орчин, аялал жуулчлалын яамнаас тодруулахад “Холбогдох байгууллагуудын мэдээллүүдийг нэгтгэж байна. Одоогоор яг ямар шалтгааны улмаас олон тооны шувуу үхсэн талаарх дүгнэлт гараагүй байна. 

Өнөөдөр Усны төв лабораториос хариу ирүүлнэ гэсэн боловч ирүүлээгүй байна. Яг энэ асуудлыг хариуцсан мэргэжилтэн маань томилолтоор явсан байгаа тул тодорхой мэдээлэл өгөх боломжгүй байна” гэсэн юм. Бид Говь-Алтай аймгийн Онцгой байдлын газрын мэргэжилтэн Ц.Лувсанжамцтай холбогдож, дараахь тодруулгыг авлаа.

-Олон тооны шувуу үхсэн тухай мэдээллийг анх хаанаас, хэн өгсөн бэ?

-Аймгийн Засаг даргын тамгын газраас манайд анх мэдээлэл ирсэн юм. Онцгой байдлын газраас тэр даруй ажлын хэсэг томилогдон, газар дээр нь очиж шувуудаас дээж аваад, Мал эмнэлгийн ариун цэврийн төв лабораторийн шинжилгээнд өгсөн. Тус шинжилгээгээр шувууд улсад хориотой халдварт өвчнөөр өвчлөөгүй болохыг тогтоосон юм.

-Та “Сангийн далай”-д очиж нөхцөл байдалтай танилцсан уу?

-Засаг даргын захирамжаар би эндээс ажлын хэсэг томилсон. Яг газар дээр нь өөрийн биеэр очиж ажиллаагүй.

-Шувууд үхсэн шалтгааныг тогтоосон уу?

-Шувууд халдварт өвчнөөс болж үхээгүй нь тогтоогдсон тул уснаас болсон байж болзошгүй гэх таамаг дэвшүүлээд байна. Тиймээс Улаанбаатар хотод байх Усны лаборатори руу “Сангийн далай” нуураас усны дээж авч явуулсан байгаа.

-Олон тооны шувуу үхсэн нь уул уурхайн компаниуд нуурын усыг цианитаар бохирдуулдагтай холбоотой гэсэн мэдээлэл бий. Та ямар хариулт өгөх вэ?

-“Сангийн далай” нуурын ойр орчимд уул уурхайн компани байхгүй. Нуурын хувьд усны эрдэсжилт ихтэй тул ойр хавьд нь уул уурхайн компани байдаггүй юм байна лээ.

-Шувуунаас бусад төрлийн амьтан болон мал хорогдсон тохиолдол гарсан уу?

-Сая “Сангийн далай” нууранд Онцгой байдлын ерөнхий газраас 30 орчим хүн очиж устгал хийсэн. Тэгэхэд ямар нэгэн хүн малын биед өөрчлөлт ажиглагдаагүй. Хэрэв усанд янз бүрийн химийн бодис байгаа бол шувуунаас шинжилгээ авахад давхар мэдэгдэх байсан байх. Одоо усны шинжилгээний хариу гарч байж тоймтой хариу хэлнэ.