УИХ-ын сонгуулийн 42 дугаар тойрог буюу Хэнтий аймгийн нөхөн сонгуулиас улс төрийн акул намуудаас эхлээд магадлал бүхий өрсөлдөгчид ихээхэн бэргэж байгааг бид харж байна. Түүнээс бус Д.Гантулгыг бүрэн эрхээсээ түдгэлзэхтэй л дөрөө харшуулан “Би нэр дэвшинэ”, “Би бол нийгмийн захиалга болчихоод байна”, “Хэнтий намайг мэднэ” гээд хэвлэлээр цуурах ёстой ч энэ удаад ёстой л бэргэж байгаа нь анзаарагдаж байна. Харин юугаа ч мэдэхгүй, баруун зүүн үзлээ ч ойлгохгүй нөхөд л салхинд хийссэн хамхуул шиг "би би" хэмээн цээжээ дэлдэж байгаагаас өөр юу ч алга. Тэгэхээр яагаад нөхөн сонгуульд өрсөлдөх магадлал бүхий нөхөд энэ тойргоос нэг л зайгаа барьж бэргээд байгаа учрыг тодруулах гээд үзье.
Нэгдүгээрт,
УИХ-ын гишүүний бүрэн эрхийн хугацаа тал дундаасаа өнгөрч байхад “хөнгөнөө хүндээс өгөөд” яахав гэж хэн ч бодно. Нөгөө талд хөрөнгө хаяад ч тун бага хугацаа үлдсэн учраас УИХ-д орж учраа олох гэсээр байтал тойргоо услах ч хугацаа тун бага байна. Будилуухан нөхөрт бол хууль батлуулах нь бүү хэл санаачилж ч чадахгүй бүрэн эрхийн хугацаа дуусгах л цаг хугацаа үлдэж байна гэсэн үг.
Хоёрдугаарт,
Ямар ч цаг үед, ямар ч нам Төрийн эрх барьж байх дунд хугацаанд тэдний нэр хүнд маш муу байдаг бичигдээгүй хуультай. Үүнээс гадна энэ хугацаанд хийж амжуулсан ажил, эдийн засгийн байдал гээд бүхий л зүйл сайн байдаггүй. Үүн лугаа сонгогчдын дунд сайн нэр зүүж байсан түүх байхгүй учраас бэргэж байна.
Гуравдугаарт,
Улстөрийн гортигоны цаана олон жил шаналахдаа сонгогч түмэнд өрөвдүүлэх тактикийг арваад жил хэрэгжүүлсэн Н.Энхбаяр нөхөн сонгуульд хүч үзнэ гэдэг хамгийн том аюул учраас өрсөлдөгчид түүнээс бэргэж байгаа нь туйлын үнэн. Үүнийг нуух хэрэггүй. Тэгээд ч сонгогч олон энэ дунд хугацаанд улс төрийн хоёр том хүчинд биш гуравдагчдын мөрөөдөлд автсан байдаг.
Дөрөвдүгээрт,
Нөхөн сонгуульд 13 нам өрсөлдөхөөс битүү морьд олноор уралдана. Хаанахын ямар ч уяачийн ямар ч угшилтай зөв давхилтай уралдаанч ороод ирэх бол хэмээн хаширлаж байгаа. МАНАН бүлэглэл хэмээн 20 гаруй жил зүхүүлсэн хоёр том намынхаа эсрэг сурталчилгаа хийгээд гараанаас гарах битүү морьд олон бий.
Тавдугаарт,
УИХ-ын сонгуулийн 42 дугаар тойрог бол онцлогтой. Харьцангуй суурин иргэншлийн хүмүүс байх бөгөөд мэдээлэл харилцаа сайтар хөгжсөн газрууд багтана. Тухайлбал, Хэнтий аймгийн төв болох Хэрлэн сум хүн амаараа илүүрхэн оршино. Мөнхүү аймгийнхаа төвтэй хараа бараандаа Мөрөн сум байна. Үүнээс холгүй Жаргалтхаан сумууд багтдаг учраас баргийн нөхөд сонины тасархай, гоё ганган үгтэй, засвар хийсэн зурагтай сэтгүүлээр хуурах аргагүй ийм л сонгогчид багтаж байна.
