“Азийн эрч хүч, зүтгэл” (Energy of Asia) уриатай тус наадмын нээлтийн ёслол Индонезийн ард түмний түүх, үндэсний соёл, уламжлалыг нутгийн үзэсгэлэнт байгаль, далай, усны гайхамшигт үзүүлбэртэй хослуулан гайхалтай чадварлаг толилуулснаар дэлхий дахины анхаарлыг татав.

 

Ази тивийн 45 орны тамирчид, төлөөлөгчдийг эгнээндээ нэгтгэсэн Азийн зуны XYIII наадмын нээлтийн ёслолд Индонез улсын Ерөнхийлөгч Жоко Видодо мотоцикльтэй орж ирэн мэндчилгээ дэвшүүлсэн нь нээлтийн ёслолын хамгийн оргил хэсгийн нэг байв.

Цэнгэлдэх хүрээлэнгийн хойморт зассан тайзан дээр 2200 ахлах сургуулийн бүжигчин сурагчид үндэсний соёл, уламжлалыг шингээсэн гайхамшигтай үзүүлбэр бүхий бүжгийн үзүүлбэр сонирхуулсан юм.

Энэхүү нээлтийн ёслолын шувууны далавчит хувцас загвар болон хөгжмийн найруулга, бүжгийн дэглэлтийг тус улсын Карнавалын алдартнууд болох хувцасны дизайнер Dynand Fariz, Rinaldy Yunardi, Addie MS, Ronald Steven, Denny Malik, Eko Syprriyanto нар урлажээ.

Азийн наадам нь тивийнхээ хамгийн том спортын тэмцээн бөгөөд Олимпийн наадмын дараа орох “Бага олимп” гэдгээрээ онцлогтой билээ. 1951 онд Энэтхэгийн Дели хотноо анх удаа зохион байгуулагдаж, 1954 онд Филиппин улсын Манилад, 1958 онд Японы Токиод болжээ.

Одоогоос 56 жилийн өмнө буюу 1962 оны наймдугаар сарын 24-нөөс есдүгээр сарын 4-нд

Индонез улсын Жакарта хотноо Азийн IY наадам болсон түүхтэй. Тус наадмаас Индонезийн шигшээ баг 11 алтан медаль /бадминтон 5, дугуй 3, хөнгөн атлетик 2, усанд үсрэлт төрөл 1/ хүртэж байжээ.

 

 

Олимп, ДАШТ-ий дараа, тивдээ хамгийн томд эрэмбэлэгддэг Азийн наадмын чөлөөт бөхийн барилдаан үргэлжилж буй юм. Монголын таван бөх барилдсанаас 57 кг-ын жинд зодоглож буй ДАШТ-ий хошой хүрэл медальт, Гавьяат тамирчин Э.Бэхбаяр алт, 65 кг-ын жинд Азийн АШТ-ий хошой хүрэл медальтай Б.Батмагнай, 86 кг-ын жинд Азийн АШТ-ий хошой мөнгө, хүрэл медальтай, армийн дэлхийн аварга О.Үйтүмэн хүрэл медалийн төлөө барилдахаар болсон билээ.

МУГТ Э.Бэхбаяр эхний тойргуудад Тажикистаны Х.Вохидовыг 7:0, БНСУ-ын Ким Сун Гвоныг цэвэр ялж, шөвгийн наймд Азийн АШТ-ий мөнгөн медальтай, Узбекистаны М.Шавкатовыг 5:4-өөр өвдөг шороодуулав. Хагас шигшээд Ираны Р.Атриг ялсан тэрбээр аваргын төлөө 23 хүртэлх насны ДАШТ болон энэ жилийн насанд хүрэгчдийн Азийн аварга, БНАСАУ-ын бөх Кан Кум Сонтой өрсөлдөв.

Тэмцээний 74 кг-ын жинд ДАШТ-ий хүрэл медальт, Гавьяат тамирчин Г.Мандахнаранг ялсан Японы бөх Ю.Фүжияма, 97 кг-д Ө.Батзулыг дийлсэн БНСУ-ын тамирчин Ким Жэ Ган нар хагас шигшээд ялагдсан тул манай бөхчүүд дагах барилдаан хийх боломжгүй болж, үзэгчдийн суудалд шилжсэн билээ.

 

Олимпийн наадмын хөтөлбөрт шинээр багтсан хийн урт бууны холимог багийн төрөлд манай улсаас хоёр хос өрсөлдөв. Монгол Улсын олон удаагийн аварга, цөөнгүй дээд амжилтыг эзэмшигч Э.Даваахүү, ОУХМ Т.Баярцэцэг нар урьдчилсан шатнаас шалгарч чадсангүй. “Рио-2016” олимпод цэц сорьсон Г.Нандинзаяа, ОУХМ Н.Баяраа нар 832.1 (417.7+414.4) оноогоор финалд өрсөлдөх эрх авч, шигшээд 346.6 оноо авч, V байрт шалгарчээ.

Монгол тамирчид Азийн наадмын усанд сэлэлтийн төрөлд өрсөлдөж, хэсгээсээ хараахан шалгарч чадаагүй ч улсынхаа хоёр дээд амжилтыг шинэчилсэн юм. 100 метрийн араар даллах сэлэлтийн төрөлд хурд сорьсон Э.Дэмүүл 1:03.80, 4х100 метрийн буухиа сэлэлтийнхэд А.Хэрлэн, Х.Энхзул, Б.Есүй, Б.Энххүслэн нар 4:14.58 секундээр Монгол Улсын дээд амжилтыг ахиулав. Мөн 200 метрийн өврөөр даллах төрөлд Б.Батмөнх 2:15.60, Г.Тэнгис 2:44.57, Б.Есүй 2:41.07, Э.Ариунтамир 2:47.80 цагийн амжилт үзүүлсэн юм.

Энэ төрөлд түрүүлсэн Тайваний тамирчид 494.1 оноогоор тус наадмын дээд амжилтыг шинэчилж, Азийн наадмаас алтан медаль авсан улсынхаа анхны мэргэн буучид болов. БНХАУ 492.5, Энэтхэгийн хос 429.9 оноогоор мөнгө, хүрэл медаль хүртжээ.