Х.Чинбатыг 18 дугаар сургуулийн захирлаар дахин томилохыг эсэргүүцэж байна гэв
Шүүх болон Авлигатай тэмцэх газрын буруу шийдвэрээс болж 2500 гаруй сурагч боловсрол хүмүүжлээрээ хохирч байгаа талаар Хан-Уул дүүргийн гадаад хэлний гүнзгийрүүлсэн сургалттай, Улсын тэргүүний 18 дугаар дунд сургуулийн сурагчдын эцэг эхийн төлөөлөл мэдээллээ.
Тус дүүргийн 51 дүгээр байрны иргэн “18 дугаар сургууль хамран сургах тойрогтоо хоёр байр хамааруулдаг байсан. Гэвч нэг л өглөө босоод ирэхэд өөрчлөгдсөн байсан. Тодруулбал 51, 53-р байр манай сургуулийн хамран сургах тойрогт багтдаг байсан. 51-р байрны оршин суугчид буюу “Мандал Алтай" СӨХ-ноос яагаад манай байрыг хассан талаар холбогдох байгууллагуудаас нь тодруулсан юм. Тэгэхэд Х.Чинбат захирал өөрөө танай байрыг хамарсан сургах тойргоос хасуулсан гэсэн.
Тус сургууль тэгш ой тохиох үеэр манай 51-р байрны Сууц өмчлөгчдийн холбоонд 14-17 сая төгрөгийн тохижилт хийж өгч байсан удаатай. Ямар шалтгаанаар тус захирал хасалт хийлгэсэн гэдгийг мэдэхгүй байна.
Энд ганцхан захирлын тухай яригдаагүй, үүний ард маш олон эцэг эх, сурагчийн эрх ашиг хөндөгдөж байгаа юм. Хэрэв бидний шаардлагыг биелүүлэхгүй бол Боловсролын газрын шат шатны байгууллагуудад албан бичиг хүргүүлнэ” гэв.
18 дугаар сургуулийн нягтлангаар ажиллаж байсан Т.Чимэг
“Миний хүү энэ 18 дугаар сургуулийг төгссөн. Одоо хоёр ач маань сурч байгаа юм. Би энэ сургуульд 1990-2012 оны хооронд 22 жил ажилласан. Х.Чинбат захирлыг сайн мэднэ. Чинбат захирал нь 2014 оны 10 сараас 2017 оны дөрөвдүгээр сар хүртэл ажиллахдаа өмч хөрөнгөтэй холбоотой асуудалд нэг бус удаа нэр холбогдсон. Тодруулбал, үдийн цайны мөнгө, биеийн тамирын заалын засварын мөнгийг завшсан.
Улаан шугамаас хойш, нэгдүгээр ангид элсэгчдээс хандив тусламж авсан нэрээр 150 гаруй хүүхдийг сургуульд элсүүлсэн. Үдийн цай, биеийн тамирын заалын мөнгийг завшсан хэргээр Нийслэлийн аудитын газраас шалгаад, акт тогтоочихсон байгаа юм. Мөн 20 сая төгрөгийн хөрөнгө бүхий “Байгалийн булан”, “Чингисийн булан” сурагчийн амжилтыг харуулдаг шилэн самбар зэргийг нураасан.
Манай сургуулийг удирдах хугацаандаа сургалт хүмүүжлийн ажлыг анхаарахгүй, зөвхөн аж ахуйн ажилтай зууралдаж ажилласан. 2017 оны дөрвөн сард ажлаасаа халагдсан юм. Түүнээс хойш шүүхээр явж сургуулийн захирлаар буцаж орох талаар хөөцөлдөж эхэлсэн. Бид Х.Чинбатыг дахин томилохыг эсэргүүцэж байна.
Мөн тэрээр 2016 онд Авлигатай тэмцэх газар шалгагдаж байсан удаатай учир бид дахин захирлаар томилуулахгүй байх тал дээр арга хэмжээ авна. Одоо байгаа шинэ захирлын хувьд Техникийн их сургуулийн гадаад хэлний багш хүн байсан гэсэн. Оюунцэцэг гэдэг юм. 18 дугаар сургуулийн захирлаар өнгөрсөн оны дөрөвдүгээр сараас өдий хүртэл маш сайн ажиллаж байгаад эцэг эхчүүд сэтгэл хангалуун байна“ гэв.
