Өнөөдөр “Багшийн цалин нэмүүлэх түр хороо”-ноос Засгийн газар болон МҮЭХ-нд хариуцлага тооцох талаар мэдээлэл хийлээ. ОУВС ирэхтэй холбогдуулан Төрийн гурван өндөрлөгт өнгөрөгч долдугаар сард хүсэлт хүргүүлсэн ч засгийн газрын хэрэг эрхлэх газраас Ерөнхий сайдад ханд гэдэг цаас өгсөн байна.
Жилийн хугацаанд цалин нэмэгдүүлээгүй, зөвхөн цаас өгснөөр өөрөөр дорвитой арга хэмжээ авахгүй байгаад эсэргүүцлээ илэрхийлж буй юм.
Тус хорооны Удирдах зөвлөлийн гишүүн н.Санжмятав хэлэхдээ, “ОУВС-ын төлөөлөгчид Монгол Улсад ирэхдээ “Засгийн газарт цалин нэмэх боломжийг олгосон. Тийм учраас цалин нэмэх асуудлыг шийдэх эрх нь Засгийн газарт үлдэж байгаа” хэмээсэн. Бид Засгийн газарт шаардлага хүргүүлсээр ирсэн. Хамгийн сүүлд энэ сарын 3-нд Ерөнхий сайдад шаардлага хүргүүлэхэд 50 хувь нэмэгдүүлэх асуудлыг судалж байгаа” гэдэг хариу ирсэн. Цалин нэмэх асуудлыг судалсаар байгаад хоёр засгийн газрын нүүрийг үзэж үзлээ.
Эдийн засаг өсөөд байгаа хэдий ч гар дээр авдаг цалин хүрэлцэхгүй өрийн дарамт үүсгээд байна. Өрийн дарамтаас болж авдаг цалин буурсаар байгаа. Гэтэл асуудлыг шийддэг дарга нар сандал ширээтэйгээ зууралдаад, ард түмний халаасны мөнгө, цалингийн асуудлыг яагаад шийдэхгүй байгаа юм бэ гэдэг асуудал эргэлзээтэй байсаар ирлээ. Тийм учраас өнөөдөр бодит байдалд тулгуурлан багш нарын цалин нэмээч ээ гэдэг шаардлагыг хүргүүлж байна.
МАН иргэн баян бол улс баян гэж ярьдаг шүү дээ. Гэтэл эсрэгээрээ төрийн эрхийг барьдаг хүмүүс баяжаад ард түмэн ядуураад байна. Тийм учраас цалин нэмэх асуудлыг шийдэж өгөөч ээ, чадахгүй бол чаддаг хүмүүст суудлаа тавьж өг гэдэг асуудлыг хурцаар тавьж байгаа юм” гэлээ.
Мөн тус хорооны удирдах зөвлөлийн гишүүн, багш н.Сарантуул хэлэхдээ “Бид төрийн гурван өндөрлөгт долдугаар сарын 23-нд шаардлага хүргүүлсэн. ЗГХЭГ-аас бидэнд бичиг ирсэн. Гэвч хөрсөн дээр буусан бодит ажил гараагүй байна. Багш нарын цалин нэмүүлэх түр хорооноос ажлын хэсэг гаргаж, тавдугаар сарын 1-нд ажилт хаялт зарлахаар ярьж байсан.
Гэтэл цалин нэмнэ гэсэн учраас ажил хаялтыг зогсоосон ч одоог хүртэл нам жим байна. Тиймээс бид бүхэн өнөөдөр дахин багш нарын цалин нэмэгдүүлэх шаардлагыг хүргүүлж байгаа юм. Хүүхдийн эрх ашгийн төлөө уул уурхай, архи тамхины орлогоос таван хувийг хүүхдэд зориулаач. Ард иргэдийн үгийг сонсож, амлалтаа биелүүлдэг байгаач гэдэг шаардлагыг бид тавьж байна. Багшийн цалинг нэмэхгүй бол хүүхдийн эрх зөрчигдсөөр байна” гэж байлаа.
Багш нарын үйлдвэрчний эвлэлийн байгууллагууд есдүгээр сарын 1-нд хичээл эхлүүлэхгүй гэсэн байр суурьтай байгаа төдийгүй гурван талт хэлэлцээр үр дүнгээ өгөхгүй бол ажил хаяна гэдгээ мэдэгдэж байлаа.
