Төрийн жинхэнэ албыг намын тавиулууд, авилгач нараас салгаж, өндөр ёс зүйтэй, мэргэжлийн хүмүүсээр удирдуулна гэх Ерөнхий сайдын ам тангараг ажил хэрэг болж чадсангүй.
Зам тээвэр, хөгжлийн яамны Төрийн захиргааны удирдлагын газрын дарга Б.Махбал, амиа алдсан тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэн нарыг хууль зөрчин газрын даргаар томилсон болохыг Төрийн албаны зөвлөл мэдэгдлээ.
Хуульд зааснаар, яамны газрын даргыг төрийн жинхэнэ албан хаагчийн статустай хүн хаших ёстой ч хэн нь ч төрийн албаны мэргэжлийн шалгалт өгөөгүй байсан аж.
Яамны газрын даргыг томилж, чөлөөлөх эрх гагцхүү Төрийн нарийн бичгийн даргад бий. Харин Төрийн нарийн бичгийн дарга мэргэжлийн томилгоо хийсэн үү, мэргэжлийн бус томилгоо хийсэн үү гэдгийг хянах газар нь Төрийн албаны зөвлөл, цаашлаад салбар хариуцсан сайд. Гэтэл найран дундаа явсан болж таараад байгаа. Эцсийн дүнд нь энэ хууль бус томилгооноос болж хүний амь эрсэдлээ.
Харин ийм том хэрэг үүсчихээд байхад хариуцлагыг албан тушаалаас нь чөлөөлснөөр хүлээлгэлээ гэвэл дэндүү өрөөсгөл юм. Учир нь хууль бус томилгоог таслан зогсоож чадсан бол энэ аймшигт хэрэг гарахаас сэргийлэх бүрэн боломж байсан.
Дээр нь МАН-ын гишүүн Т.Сайнжаргалын твиттер хуудсандаа бичсэнээр бол Б.Махбал нь Т.Гомбосүрэнг хэрцгийгээр зодож байхад Зам тээвэр, хөгжлийн яамны газрын дарга нар хараад зогсож байсан гэх. Энэ ямар ёс зүй вэ?.
Гудамжинд танихгүй нэгнийг зодож байвал захын иргэн өмөөрч хашгирч, ноцолдож, цагдаа дуудна. Автобусны жолоочийг өөр нэг автобусны жолооч зодоход зорчигч нь өмөөрөөд дундуур нь орж, цагдаа дуудах тохиолдол гарч л байсан.
Гэтэл төрийн яамны газрын дарга нар согтлоо, согтлоо гэхэд ийм ёс зүйгүй, хэрцгий байж болох уу. Хэрэв энэ мэдээлэл баттай бол эл үйлдлийг хараад зогсож байсан хүмүүс ч хариуцлага хүлээх ёстой.
Мөн Т.Сайнжаргалын бичсэн зүйлд бас нэг ноцтой зүйл бий. Б.Махбал нь өмнө нь Зам тээврийн яаманд ажиллаж байхдаа нэг хүний чих тас хазаж, дараа нь Уул уурхай, хүнд үйлдвэрийн яаманд байхдаа нэг хүнийг хэвтэрт ортол нь зодсон.
Ийм хүнийг ямар шалгуураар Зам тээвэр, хөгжлийн яам газрын даргаар авав?. Ямар шалгуур гэхээр бусдын биед халддаг хүнийг ажилд авдаг юм бэ?. Чухамдаа бол газрын дарга битгий хэл төрийн алба хаших ч эрхгүй хүн бус уу. Хувийн хэвшил ч ажилд хүнийг авахдаа урьд өмнө гэмт хэрэгт холбогдож байсан уу гэдгээс эхлээд олон зүйлийг нь нягталж, сонголт хийдэг.
Уг нь ёс зүйг хамгийн их ярьсан Засгийн газар бол У.Хүрэлсүхийн танхим. Байгуулагдсан үеэсээ л төрийн томилгоо хундагны ард, хувийн компанийн байранд шийдэгддэг болсныг таслан зогсоож, өндөр ёс суртахуунтай, мэргэжлийн хүмүүсээр төрийн албыг бүрдүүлэхээ амласан. Гэтэл амлалт биеллээ олж хэрэгжиж чадсангүй.
Зам тээвэр, хөгжлийн яам бол Монголын тулгуур яамдын нэг. Мэргэжлийн хүмүүс хагас цэргийн зохион байгуулалттайгаар ажилладаг яам ч гэж яригдаж явсан үе бий. Харамсалтай нь, мэргэжлийн хүмүүсийг нь халж, намын тавиулууд тавьсны харгайгаар өнөөдөр ийм байдалд хүрэв.
Энэ үг зөвхөн Зам тээвэр хөгжлийн яаманд хамаатай бус бусад яамдад ч хамаатай. Намын даргын, сайдын захиасаар ажилд орсон хүмүүс яам, агентлагт хэдэн арваараа бий. Одоо энэ яамдад бүрэн цэвэрлэгээ хэрэгтэй. Хэн нэгний халаасанд багтсан, нэр хаяг, шошготой хүмүүсээ бүгдийг чөлөөл. Мэргэжилтэй, чадвартай хүмүүсээр төрийн албыг мэргэжлийн төвшинд авч явах цаг хэдийнэ боллоо. Сайд даргын захиасаар намын тавиулуудыг төрийн албанаас явуулаагүй цагт төр мэргэжлийн болж чадахгүй.
