Мөн осол гарсан өртөөг сэргээх засах ажил өрнөж байна. Цаг үеийн асуудлаар Засгийн газар шуурхай хуралдаж, хуралдаанаас гарсан шийдвэрийн талаар Ерөнхий сайд У.Хүрэлсүх дөнгөж сая мэдээлэл хийлээ. 

Ерөнхий сайд У.Хүрэлсүх хэлэхдээ  "Монгол Улсын Ерөнхий сайдын зүгээс ард иргэддээ хандаж хоёр асуудлаар мэдэгдэл хийх гэж байна.  
2018 оны наймдугаар сарын 9-ний 21.45 цагийн үед Зам тээвэр, хөгжлмйн яамны гадаа тус яамны Төрийн захиргаа, Удирдлагын газрын дарга М, Хяналт шинжилгээ, үнэлгээ, дотоод аудитын газрын дарга Г болон холбогдох албаны хүмүүс архи уусны улмаас Г-гийн амь насанд халдсан ноцтой гэмт хэрэг гарсныг ард иргэд мэдэж байгаа. Талийгаачийн ар гэр, үр хүүхдүүд, ах дүү хамаатан саданд МУ-ын ЗГ-ын нэрийн өмнөөс гүн эмгэнэл илэрхийлж байна. 

Мөн дээр нь Дорноговь аймгийн Айраг сумын Айраг өртөөнд байгалийн гамшиг, ус үерийн аюул болж 300 метр газарт төмөр замын суурь бүтэц эвдэрсний улмаас Сайншандаас Улаанбаатар руу явсан нэг зүтгүүр, тээшний хоёр вагон, зогчигчдын хоёр вагон замаас гарсан осол гарлаа. Уг вагонд 328 зорчигч байсан. Галт тэрэг саатахаас 20 минутын өмнө олон улсын чиглэлийн 33 дугаар галт тэрэг хэвийн явж өнгөрсөн. Үүнээс хойш 20 минутын дараа хүчтэй үер бууж, зам эвдэрсэн. Үүний араас галт тэрэг орж, осол гарсан. Вагонд явсан хүмүүсийн биеийн байдлыг аймаг орон нутгийн эмнэлгүүд, онцгой байдлын албаны хүмүүс ажиллаж 88 хүнд эмнэлгийн анхан шатны тусламж үзүүллээ. Хоёр хүний бие хүнд байна гэсэн мэдээлэл байна. 

Сэргээн босголтын ажил үргэлжилж байна. Улаанбаатар төмөр замын сэргээн засах анги, ОХУ-ын төмөр замын сэргээн засварлах техникийг авчирч үерийн улмаас бий болсон гэмтлийг арилгахаар ажиллаж байна. 

Бидэнд ийм эмгэнэлтэй явдал тохиолдсонд чин сэтгэлээсээ харамсаж, эрдэнэт хүний амь эрсэдсэнд Монгол Улсын ЗГ-ын тэргүүний хувьд Засгийн газрын нэрийн өмнөөс гүнээс харамсаж байгаагаа илэрхийлэн ард түмнээсээ уучлалт гуйж байна" хэмээн хэллээ.