М.Энхболд, Ц.Сандуй, А.Ганбаатар нарт хариуцлага тооцох тухай тогтоол ил боллоо
Өнөөдөр "60 тэрбумын" гэх асуудалд холбогдсон МАН-ын гишүүн Ц.Сандуй, А.Ганбаатар, М.Энхболд нарт ёс зүйн хариуцлага тооцож өгнө үү гэсэн МАН-ын нэр бүхий гишүүдээс ирүүлсэн хүсэлтийг хэлэлцсэн тус намын Хяналтын Ерөнхий Хорооны хурлын тогтоол ил боллоо.
Энэ сарын 3-ны өдөр үйлдэгдсэн, 13 дугаартай МАН-ын Хяналтын ерөнхий хорооны хуралдааны тогтоолд "2017 оны 09 дүгээр сарын 09-ний өдөр Нийслэлийн Монгол Ардын Намын хорооны дарга асан Ц.Сандуй болон нийслэлийн Монгол Ардын Намын хорооны тэргүүлэгч, намын хорооны даргын Санхүүгийн асуудал хариуцсан зөвлөх А.Ганбаатар нарын ярьсан гэх дүрс бичлэг 2016 оны 6 дугаар сарын сүүлчээс эхлэн хэвлэл мэдээлэл болон олон нийтийн сүлжээнд цацагдсан байна.
Дээрх бүх мэдээ, мэдээлэл, дүрс, дуу бичлэгийн гол агуулга нь 2016 оны сонгуулийн дараа Монгол Ардын Нам хэрхэн мөнгө босгох талаарх ярилцлага байсан гэх бөгөөд зөвхөн нийслэлийн төр захиргааны байгууллагын ажилтнуудын томилгооноос 60 тэрбум төгрөг босгох боломжийн талаар ярьсан гэжээ.
Нийслэлийн МАН-ын хорооны дарга асан Ц.Сандуй энэ талаар ярьсан нь үнэн, бичлэг алдагдсан гэж хэвлэл мэдээллийн хэрэгслээр мэдээлсэн, мөн Нийслэлийн Монгол Ардын Намын хорооны тэргүүлэгч, намын хорооны даргын санхүүгийн асуудал хариуцсан зөвлөх А.Ганбаатар дээрх яриа болсон талаар хариу тайлбар өгсөн зэргээс үзэхэд "60 тэрбум"-ын гэх яриа болсон нь батлагдаж байна.
Монгол Ардын намын гишүүн М.Энхболд "60 тэрбумын" гэх асуудлыг "Хууль хяналтын байгууллагаар шалгуулж, бодит байдалд ийм зүйл болоогүй гэдгээ удаа дараа олон нийтэд мэдээлж байсан төдийгүй Монгол Ардын Намын даргаар ажиллаж байхдаа болон өнөөдөр ч хэн нэгнээс мөнгө авч, албан тушаалд томилсон үйлдэл гаргаагүй. Энэ зохиомол хэрэгт нэр холбогдон намынхаа нэр хүндийн асуудалд холбогдуулсандаа харамсаж байна" гэж Хяналтын ерөнхий хороонд бичгээр илэрхийлсэн байна.
Дээрх нэр бүхий гурван гишүүний тайлбар, хүсэлт зэргийг авч үзэхэд Монгол Ардын Намын гишүүн Ц.Сандуй, А.Ганбаатар, М.Энхболд нар ёс зүйн алдаа гаргаж, монгол Ардын намын ёс зүйн дүрмийн 2 дугаар зүйлийн 2.4, 2.5, 2.7, 2.8 дахь заалтыг зөрчсөн байна. МАН-ын Удирдах зөвлөлийн гишүүн М.Энхболд ёс зүйн алдаагаа ухамсарлаж байгааг тэмдэглэв.
Монгол Ардын Намын дүрмийн 33 дугаар зүйлийн 33.1, 33.2, 33.8, 34 дүгээр зүйлийн 34.1.1, 34.1.4, 34.1.8 дахь заалт, 35 дугаар зүйлийг тус тус үндэслэн намын гишүүдээс ирүүлсэн хүсэлт болон 2018 оны 04 дүгээр сарын 18-ны өдрийн Хяналтын Ерөнхий хорооны дэргэдэх Ёс зүйн хорооноос гаргасан дүгнэлтийг хэлэлцээд Хяналтыг ерөнхий хорооны хуралдаанаас ТОГТООХ нь:
- Монгол Ардын Намын дүрмийн 4 дүгээр зүйлийн 4.2.5, 4.2.6, 4.2.8, 4.2.9 дэх заалтыг зөрчиж, ёс зүйн алдаа гаргасан Монгол Ардын НАмын гишүүн М.Энхболдын асуудлыг Монгол Ардын Намын Удирдах зөвлөлийн хуралдаанаар хэлэлцүүлж, хариуцлага тооцон, цаашид Монгол Ардын Намын гишүүдийн зүгээс энэ асуудлыг дэврээж хандахгүй байхыг намын бүх шатны байгууллагад чиглэл болгохыг Монгол Ардын намын Ерөнхий нарийн бичгийн дарга /Д.Амарбаясгалан/-д даалгасугай.
- Монгол Ардын Намын гишүүн Ц.Сандуй нь Монгол Ардын намын дүрмийн 4 дүгээр зүйлийн 4.2.5, 4.2.8, 4.2.9 дэх заалтыг зөрчиж, ёс зүйн алдаа гаргасан байх тул Монгол Ардын намын дүрмийн 4 дүгээр зүйлийн 4.4, 4.5 дахь заалтад заасан хариуцлагыг тооцож ажиллахыг Монгол Ардын НАмын Ерөнхий нарийн бичгийн дарга /Д.Амарбаясгалан/-д даалгасугай.
- Монгол Ардын НАмын гишүүн А.Ганбаатар нь Монгол Ардын Намын дүрмийн 4 дүгээр зүйлийн 4.2.5, 4.2.9 дэх заалтыг зөрчиж, алдаа гаргасан байх тул Монгол Ардын Намын дүрмийг 4 дүгээр зүйлийн 4.4., 4.5, 6 дугаар зүйлийн 6.6 дахь заалтад заасан хариуцлагыг тооцохоор Нийслэлийн намын хорооны Тэргүүлэгчдийн хуралд оруулж хэлэлцүүлэхийг Нийслэлийн Монгол Ардын Намын хороо /С.Батболд/-нд, Нийслэлийн Монгол Ардын Намын хяналтын хороо /О.Оюун/-д үүрэг болгосугай.
Энэхүү тогтоолын хэрэгжилтийг Монгол Ардын Намын хяналтын ерөнхий хороонд 2018 оны III улиралд багтаан танилцуулахыг Монгол АРдын намын Ерөнхий нарийн бичгийн дарга /Д.Амарбаясгалан/, Нийслэлийн Монгол Ардын Намын хороо /С.Батболд/-нд, Нийслэлийн Монгол Ардын Намын хяналтын хороо /О.Оюун/-д тус тус даалгасугай" хэмээгээд дарга Д.Батбаатар тэргүүтэй гишүүд гарын үсгээ зуржээ.
Монгол Ардын Намын Үндсэн дүрмийн 4 дүгээр зүйлд намын гишүүний үүргийг тодорхойлсон байдаг аж. Тухайлбал, дээр дурдагдсан тус намын дүрмийн
4.2.5. Намын эв нэгдлийг хамгаалах, намын нэр хүндийг гутаасан аливаа үйлдэл гаргахгүй байх;
4.2.6. намын эрх ашигт үл нийцэх улс төрийн үйл ажиллагааг шүүмжлэн няцаах;
4.2.8. Намын нэрийн өмнөөс сонгогдож, томилогдсон албан тушаалтан бүр хуулийг чандлан сахиж ашиг сонирхлын аливаа явцуу бүлэглэлийн нөлөөнд автахгүй байх;
4.2.9. Намын ёс зүйн хэм хэмжээг сахин биелүүлэх гэж заажээ.
4.4 Энэхүү дүрмийн 4.2.5, 4.2.8, 4.2.9-ийг зөрчсөн гишүүнд улс төрийн дараах дэмжлэг үзүүлэхээс тодорхой хугацаагаар татгалзана:
4.4.1. Намаас санал болгож сонгогдож, томилогддог аливаа албан тушаалд нэр дэвшүүлэх;
4.4.2. Хуульд өөрөөр заагаагүй бол одоо ажиллаж байгаа албан тушаалд нь үргэлжлүүлэн ажиллуулах;
4.4.3. Намын хүний нөөцийн санд бүртгэх.
4.5 Энэхүү дүрмийн 4.4-т заасан хариуцлагыг тооцохдоо намын Удирдах Зөвлөл болон тухайн гишүүнийг хүний нөөцдөө бүртгэсэн намын байгууллагын тэргүүлэгчид нь намын хяналтын байгууллагын дүгнэлтийг хэлэлцэн шийдвэрлэнэ. Гаргасан шийдвэрийг тухайн гишүүнд өөрт нь болон анхан шатны байгууллагад нь мэдэгдэнэ” гэж заажээ.
