Хятадад бүртгэлтэй компаниудад стратегийн багц авах хүсэлтэй гаднынхныг худалдааны яамны шинэ журмын дагуу үндэсний аюулгүй байдлын үүднээс өргөн хүрээнд шалгахаар шийдвэрлэжээ.
Энэ нь Хятадууд эмзэг технологи худалдан авч буйг хязгаарлах өрнөдийн хүчин чармайлтад Бээжин хариу барихаар бэлтгэж буйн илрэл юм. Өнөөгийн хөрөнгө оруулалтын журамд оруулах өөрчлөлтийг даваа гарагт нийтэлснээс үзэхэд хятад дахь гаднын хөрөнгө оруулалтыг хянах цар хүрээг өргөтгөх аж. Үүний өмнөхөн АНУ, Их Британи, Герман улсууд гаднын группүүд дотоодын компанийг өөртөө нэгтгэх боломжийг хумих арга хэмжээ авсан. Уг алхам Хятадын худалдан авагчдыг онилсон нь илэрхий байв. Бээжин АНУ-тай худалдааны дайн хурцдаж байгаа үед нэгдэх үйл явцын хяналтыг хөшүүрэг болгон ашиглах бодолтой байна. АНУ-ын гаднын хөрөнгө оруулалтын хороо сүүлийн үед үндэсний аюулгүй байдал гэх шалтгаанаар Хятадын компаниудын Америк дахь хэд хэдэн худалдан авах хүсэлтийг батлахаас татгалзсан. Гэвч Бээжин гаднын хөрөнгө оруулалтад тавих бусад саад хоригийг бууруулах хуулийн төсөл санаачлаад буй.
Тухайлбал Хятадад бүртгэлтэй компанийн стратегийн багцыг худалдан авахын тулд гаднын хөрөнгө оруулагч доод тал нь 100 сая ам.долларын хөрөнгөтэй байх ёстой гэсэн босгыг доошлуулж 50 сая болгосон байна. Түүнчлэн худалдан авсан хувьцааг цоожлох хугацаа гурван жил байсныг хоёр жилээр багасган тогтоожээ. Нэмэлтийн талаар олон нийтийн саналыг наймдугаар сарын 29-н хүртэл авах аж. Бээжин дэх Trivium зөвлөх фирмийн шинжээч Эндрю Полк “Уг алхам хятадын хоёр хандлагыг тусгаж байна. Санхүүгийн нээлттэй байдлыг нэмэгдүүлэх болон эдийн засгийн аюулгүй байдал. Коммунист нам гаднын хөрөнгө оруулалтад юуг зөвшөөрөх, юуг эс зөвшөөрөх талаар тодорхой шугам татахыг зорьж буй бололтой” гэжээ. Ерөнхийлөгч Д.Трамп Хятадын хөрөнгө оруулалтад шинэ хатуу дэглэм тогтоохыг хойшлуулсан боловч АНУ-ын хууль тогтоогчид үндэсний аюулгүй байдлын хяналтын журмыг чангатгасаар байгаа. Ноён Д.Трамп Хятадыг оюуны өмчийн хулгайд буруутгаж, экспортод нь нэмэлт тариф тогтоохоор заналхийлэхийнсацуу Хятадын Засгийн газар гадаадаас илүү хөрөнгө оруулалт татахыг эрмэлзэж байна.
Нэрээ хэлэхийг хүсээгүй Хятадын хөрөнгийн менежер гаднын хөрөнгө оруулагчдын хувьцаагаа хадгалах хугацааг багасгах саналыг шүүмжлэв. Тэрбээр “12 сар гэдэг бол стратегийн хөрөнгө оруулалтын хувьд маш богино хугацаа. Энэ нь гаднын хөрөнгө оруулагчдад хялбархан гарч явах боломж олгоно” гэжээ. Трампын засаг захиргаа одоогийн байдлаар Хятадаас ирэх 34 тэрбум ам.долларын өртөгтэй импортод шийтгэх тариф ногдуулаад байгаа. Зуны эцсээр дахиад 16 тэрбум ам.долларын барааны тарифыг өсгөхөөр төлөвлөжээ. Ноён Д.Трамп Хятадаас ирдэг жилийн нийт импорт болох 500 тэрбум ам.долларын бараанд тариф ногдуулна хэмээн сүрдүүлсэн. Дөрөвдүгээр сард хоёр худалдааны зөрчлийг намжаах асуудлаар хэлэлцээ хийсний дараа санхүү болон автомашины салбарт гаднын хөрөнгө оруулалтын саадыг багасгана хэмээн мэдэгдсэн. Уг асуудлаар Хятадын гадаад хэргийн сайд Ван И ярихдаа “Хятад улс худалдааны дайныг хүсэхгүй байна. Харилцан яриа, хэлэлцээнд манай үүд хаалга үргэлж нээлттэй” гэсэн юм.
