Афганистанд амиа алдсан иргэдийн тоо сүүлийн 20 жилд байгаагүй хэмжээнд хүрэв
Афганистан улсад удаан хугацааны турш үргэлжилж байгаа дайнд амь үрэгдсэн энгийн иргэдийн тоо энэ оны эхний зургаан сард эрс нэмэгджээ.
2018 оны эхний хагаст нийтдээ 1692 хүн амиа алдсанаас бөмбөгдөлт болон амиа хорлолт зэрэг нь үхлийн тэргүүлэх шалтгаан болж байна гэж хүний эрхийн "Amnesty international" байгууллага мэдэгджээ. Энэ нь сүүлийн 20 жилд тухайн бүс нутагт байгаагүй өндөр хохирол юм.
Афганистаны Хөгжлийн яамны мэдээлж байгаагаар өдөрт дор хаяж долоон хүн амиа алддаг ажээ.
Мөн "Талибан" болон "Исламын улс" бүлэглэлийн дайралтууд эрчимжиж байгаа нь энгийн иргэд амиа алдах гол шалтгаан болж байгаа гэнэ.
Өнгөрсөн сард Афганистаны аюулгүйн хүчнийхэн, талибанчууд гал зогсоох гэрээ байгуулах гэж оролдсон ч хоёр тал ямар нэг хэлцэлд хүрч чадаагүй байна.
Дэлхий дахин ЗХУ-ын 1979 онд эхлүүлсэн Афганистаны дайн 1989 онд дууссан гэж үздэгч уг мөргөлдөөний үед үүссэн алан хядах "Аль-Кайда" бүлэглэл тус улсын засгийн газартай хийж байсан иргэний дайнаа үргэлжлүүлсээр байсан юм.
Харин 2001 оны есдүгээр сарын 11-ний террорист халдлагуудтай холбоотойгоор "Манай оронд террорист халдлага үйлдсэн “Аль-Кайда” бүлэглэлийн толгойлогч Осама бин Ладен тэргүүтэй террористуудыг орогнуулж байна” гэх үндэслэлээр АНУ мөн оны аравдугаар сарын 7-ноос Афганистанд цэргийн ажиллагаа явуулж эхэлсэн бөгөөд дараа нь тус улсын эрх баригч Талибаны Засгийн газрыг түлхэн унагаасан.
АНУ тэргүүтэй олон улсын эвслийн хүчнийхний олонх нь дөрвөн жилийн өмнө Афганистанаас гарсан билээ. Тэр үеэс хойш Талибан дахин хүчээ авч, халдлага үйлдэх нь нэмэгдсэн байна. Мөн “Лалын улс” тэргүүтэй босогчдын бүлэглэл Афганистан руу нэвтрэх болжээ.
Афганистаны нийслэл Кабул хотын нэгэн оршин суугч саяхан “Ройтерс” агентлагт ярилцлага өгөхдөө “Манай улсын аюулгүй байдал 17 жилийн өмнөхөөс ч муудаад байна” гэж мэдэгдэв.
Афганистанд явуулж буй цэргийн ажиллагааг “АНУ-ын түүхэн дэх хамгийн урт дайн” гэж нэрлээд байгаа бөгөөд энэ дайн дуусах шинжгүй байна. Мөн Дональд Трампын засаг захиргаа Афганистан дахь АНУ-ын цэргүүдийн тоог нэмэгдүүлэхээр төлөвлөж байгаа юм.
