Эрүүл Мэндийн Даатгалын Үндэсний Зөвлөлийн тогтоолоор “Өрх, сум, тосгоны эрүүл мэндийн төвөөс үзүүлэх зарим тусламж, үйлчилгээнд эрүүл мэндийн даатгалын сангаас зардлын төлбөрийг хариуцах журам”-ыг баталсан. Тус журам батласнаар ЭМД-ын шимтгэл төлсөн даатгуулагч иргэн харьяа нутаг дэвсгэрийн тусламж үйлчилгээ үзүүлж байгаа эрүүл мэндийн төвөөс зарим багц тусламж үйлчилгээг авах боломж нээгдэж байна.

Уг тогтоолын дагуу Засгийн Газрын хэрэгжүүлэгч агентлаг Эрүүл Мэндийн Даатгалын Ерөнхий Газар даатгуулагч иргэдэд стандарт, эмнэлзүйн удирдамж, зааврын дагуу чанартай тусламж, үйлчилгээг хүргэх зорилгоор ЭМД-ын сангаас зардлын төлбөрийг нь хариуцах тусламж, үйлчилгээ үзүүлэх нийслэл, орон нутгийн өрх, сум, тосгоны эрүүл мэндийн төвийн сонгон шалгаруулах үйл ажиллагааг улсын хэмжээнд явуулжээ.

Улсын хэмжээнд сум тосгоны 296, өрхийн эрүүл мэндийн 218, нийт 514 эрүүл мэндийн төв байдгаас магадлан итгэмжлэгдсэн 319 эрүүл мэндийн төв сонгон шалгаруулалтад орж, 280 гаруй эрүүл мэндийн төв тэнцжээ. Энэ нь сонгон шалгаруулалтад оролцсон нийт эрүүл мэндийн төвийн  90 орчим хувь болж байгаа юм.

ЭМТ-үүдийг сонгохдоо ЭМД-ын сангаас зардлын төлбөрийг нь хариуцах өрх, сум, тосгоны эрүүл мэндийн төвөөс үзүүлэх тусламж, үйлчилгээний  багц тус бүрээр шалгаруулсан бөгөөд аль багц тусламж, үйлчилгээг үзүүлэхээр тэнцсэнээс хамаарч эрүүл мэндийн төвүүд дараах тусламж үйлчилгээг харьяа нутаг дэвсгэртээ даатгуулагч иргэдэд үзүүлнэ.

*Сэргээн засах үйлчилгээний багцаар хөдөлгөөн засал болон физик эмчилгээний тусламж, үйлчилгээ үзүүлнэ.

*Гэрээр үзүүлэх тусламж, үйлчилгээний багцад удаан хугацаанд хэвтэрт байгаа өвчтөн, хөгжлийн бэрхшээлтэй хүнд үзүүлэх тусламж, үйлчилгээ багтана. Мөн гэр бүлийн гишүүдийг өвчтөн болон хөгжлийн бэрхшээлтэй хүнийг асрахад сургах зэрэг сувилахуйн тусламж, сэргээн засах тусламж үйлчилгээг үзүүлэхээр оруулсан байна..

*Өдрийн эмчилгээний багцаар зүрх, судасны болон  хоол боловсруулах замын эмгэг, мэдрэлийн эмгэг, үе мөчний үрэвсэл, холбох эдийн, амьсгалын замын, чих, хамар, хоолойн, бөөр, шээсний замын эмгэгтэй өвчтөнийг өдрөөр эмчлэх тусламж үйлчилгээ үзүүлэх юм.

*Оношилгоо, шинжилгээний багцад сахар, холестерин, хеликобактери илрүүлэх, хавдрын эс илрүүлэх, өөх тосны солилцоо үзэх зэрэг хурдавчилсан оношлуур, лабораторийн шинжилгээ  болон багажийн шинжилгээ зэрэг багтжээ.

ӨЭМТ-үүд ЭМД-ын сангаас зардлын төлбөр авч эдгээр тусламж үйлчилгээг үзүүлснээр даатгуулагчдад үзүүлэх анхан шатны тусламж үйлчилгээг тэдэнд ойртуулж, хүртээмжийг нэмэгдүүлэхэд ач тустай юм. Түүнчлэн анхан шатны тусламж үйлчилгээ үзүүлэгч эрүүл мэндийн байгууллагуудын чадавхи дээшилж, үзүүлж байгаа эмнэлгийн тусламж үйлчилгээний чанар сайжрах  аж.