Хонконгийн иргэд өчигдөр буюу долдугаар сарын 2-ны өдөр Их Британийн эзэмшлээс чөлөөлөгдсөний 21 жилийн ойд зориулан БНХАУ-ын хатуу бодлогыг эсэргүүцэн тайван жагсаал зохион байгуулсан талаар “Ройтерс” агентлаг мэдээллээ.

Энэхүү жагсаалд ойролцоогоор 10 мянган хүн оролцсон бөгөөд жагсагчдын дунд хөгжлийн бэрхшээлтэй иргэд нэгдэж, өөрсдийн дуу хоолойгоо удирдлагууддаа хүргэсэн байна. Цагдаагийнхан аюулгүй байдлын үүднээс жагсаал болсон бүс нутгийн хөдөлгөөнийг хязгаарласан аж.

Бээжин 1997 онд баталсан “Нэг улс, хоёр систем”-ийн бодлогын хүрээнд Хонконгийг алсаас захирах болжээ. Энэ оны арваннэгдүгээр сард “Greater Bay Area" төсөл буюу Хятадаас Хонконг хүртэл хурдны зам, гүүрийн нээлт болох юм.

“Энэ төслөөр Хонконгийг Хятадад уусгах зорилготой” хэмээн Ардчиллыг дэмжигч Мартин Ли өчигдрийн жагсаалын үеэр мэдэгджээ.  Хонконгчууд өнгөрсөн 2014 онд сонгуульд нэр дэвшигчдийг өөрсдөө сонгож, улмаар ардчилсан сонгууль явуулахыг шаардсан юм. Уг хүсэлтийг Бээжин хүлээн авахаас эрс татгалзсан учир Хонконгийн залуучууд болон хэвлэлийхэн “Шүхэрт хувьсгал”-ыг санаачлан, олон сар үргэлжилсэн жагсаал зохион байгуулж байсан билээ.