Эхлээд тэр франц фермерийнд зарагдаж, өөртөө ахадсан хүнд ажилд нухлуулж байсан ч хар бор ажлын эв дүй сууж, ажлын амт, мөнгөний үнэ цэнийг мэдэрч, хоёр жилийн дараа өвөртөө мөнгөтэй, өөртөө туршлагатай, франц хэлтэй, бие өсгөлүүн чийрэг залуу болж гарсан байдаг. Цагдаа ирж, насанд хүрээгүй хүүхэд ажил хийх хориотойг сануулж, ямар нэг мэргэжлээр суралцвал эндээ үлдэж болно гэж шаардсаны дагуу тэр үедээ нэр хүнд муутай ч сургалтын тэтгэлэг олгодог талх нарийн боовчны мэргэжлээр сурсан гэдэг.

Мэргэжлээрээ сайн сурч, томоохон талхны цехэд ажиллаж эхэлсэн үедээ өөрөөсөө долоон насаар эгч, шаргал үст, цэнхэр нүдэт, гимназийн багш бүсгүйд сэтгэл алдаж, дагаж гүйсээр байгаад аваад суучихсан гэнэ. Хадам аав нь их сургуулийн профессор, жирийн нэг талхчинтай харьцуулахад тэднийх нийгмийн дээд давхаргад багтах айл байсан гэдэг. Хадам ээж нь өөрөө гэртээ суух ч "профессор" мэт давилуун зантай, хямсгар эмэгтэй усан үзмийг хутга сэрээгээр идэж хэчнээн соёлтой, дээд зиндааны мундаг амьтан болохоо харуулж, гайхуулдаг байж.

Хөөрхий бүсгүй хайр сэтгэлээ даган ядуу талхчинд бүх амьдрал, итгэл ирээдүйгээ даатгаад түүнийг дагаад гарсан байдаг. Рич өглөө эрт хүнсний дэлгүүр, цайны газар ресторануудад хийсэн шинэ талх болон бусад бүтээгдэхүүнээ хүргэх ёстой тул шөнө 03.00 цагаас ажил нь эхэлдэг байсан гэх. Тэр ажлынхаа хажуугаар оройгоор сурч, дараа нь дээд сургууль дүүргэж, цехийнхээ эзний итгэлийг олж, яваандаа цехийг нь зуун хувь толгой даан хариуцаж ажиллуулдаг болсон байна. Сүүлдээ хүнсний томоохон үйлдвэрээс Ричид ажлын санал тавьж, тэнд маркетингийн менежрээр ажиллаж, дараа нь илүү том компани ажлын санал тавьж... Гэхмэтчилэн шат шатаар ахиж салбарынхаа хүрээнд танигдаж эхэлжээ. Улмаар гэрлэснээс хойш 11 жилийн дараа тэр гурван хүүхдийн аав, хүнсний үйлдвэрлэл худалдаагаар дагнасан "Юзеко" нэртэй Швейцарийн хамгийн том группийн гүйцэтгэх захирал болсон байв.

Энэ тухай тэр дурсаж ярихдаа "Хадам ээж эхнэр рүү залгаад загнана, намайг элдвээр гутааж доромжилно, охиныхоо ухаан муутайг гайхна. Нэг удаа би тэсэлгүй утсыг нь шүүрч аваад "Та хоёроос гадна охиныг чинь чин сэтгэлээсээ хайрладаг хүн хорвоо дээр байгаад та баярла. Бидний амьдрал руу дахин бүү хошуугаа дүрээрэй" гэж хашгираад утсаа чулуудчихсан. Тэрнээс хойш хадам дахиж яриагүй. Би тэднийхээр шагайгаагүй. Харин захирал болсон хойноо тэднийг Зул сарын баяраар гэртээ урьж, хадам ээж 11 жилийн дараа надаас уучлалт гуйсан" гэж билээ. Харамсалтай нь гурван хүүхдийнх нь ээж шаргал үст, цэнхэр нүдэт хань нь хорт хавдраас болж хорвоог залуугаараа орхисон юм билээ. 

Өнөөдөр хаалгыг чинь тогшоод хүү, охины чинь гараас хөтлөөд орж ирж буй тэр залуусыг басаж голохоосоо өмнө тэдэнд ирээдүйд улс орноо авч явах асар том амбийц, үүрэг, хариуцлага бий гэдгийг бид мартаж болохгүй. Тэд та бидний хийгээгүйг хийж, амжаагүйг амжуулж, чадаагүйг чадаж, хүрээгүйд хүрч, хөгжлийг түүчээлж, түүхийг бүтээлцэнэ гэдгийг үргэлж санаж яваарай, хадам аав, ээжүүд ээ. Тиймээс эхлээд өөрийнхөө хүүхдийг хаана ч хэнд ч гологдохооргүй хүн болгож хүмүүжүүл. Үлдсэнийг нь амьдрал цаадуулд чинь заагаад өгнө. Швейцарийн хамгийн том групп "Юзеко"-гийн гүйцэтгэх захирал Марк Рич 2013 онд 78 настайдаа хорвоогийн мөнх бусыг үзүүлжээ.