Гадаад хэл сурч эхэлсэн нас түүний үр дүнд чухал нөлөөтэй.  Тиймдээ ч нас ахих тусам хүний гадаад хэл сурах чадвар буурдаг гэдгийг хүн бүр мэднэ. Харин яг хэдэн насанд  хоёрдогч хэлийг эх хэл шигээ эзэмших чадвар, боломжгүй болдог вэ?

Үүний хариултыг олохоор Бостоны их сургуулийн судлаачид, сэтгэл судлаач Стивен Пинкертэй (Steven Pinker) хамтран гадаад хэл сурч буй хүмүүсийн нас, хэлний ур чадвар, зарцуулсан цаг хугацаа зэргийг харьцуулан судалгаа хийсэн байна. Тэд судалгаандаа хүний гадаад хэлийг өндөр түвшинд сурах боломжтой насны хязгаарыг үнэн зөв тодорхойлохын тулд доод тал нь сая орчим хүнийг судлах хэрэгтэй гэж үзсэн тул хамгийн олон хүн хамруулах боломжтой интернэт сүлжээг ашиглажээ.

Интернэтэд нэр үг, үйл үг, төлөөний үг, угтвар үг зэргийг агуулсан богино хэмжээний дүрмийн асуултууд үүсгэн явуулсан уг судалгаанд 38 өөр хэл, аялгатай хүмүүс оролцжээ.

Судлаачид дүрмийн шалгалтад авсан оноо болон тэдний англи хэлийг хэзээ, хэрхэн сурсан талаарх мэдээлэл дээр үндэслэн дараах дүгнэлтийг хийжээ.

Гадаад хэл сурах чадвар 18 наснаас хойш огцом буурдаг нь гурван том шалтгаантай ажээ.

Үүнд нийгмийн өөрчлөлт, төрөлх хэлний нөлөө болон тархины үйл явцын байнгын өөрчлөлт зэрэг нөлөөлдөг байна.  

Нийгмийн өөрчлөлт гэдгийг юунд хамааруулж авч үзсэн бэ гэвэл ихэнх хүн 18 насандаа сургуулиа төгсөж, их сургууль, коллежид элсэж эсвэл бүтэн цагаар ажилладаг тул хоёрдогч хэлийг сурах боломж, нөхцөл, цаг зав зэрэг нь өмнөх үеийнхээс хомс болдог байна. 

Харин үндсэн хэлний нөлөө гэдэг нь тухайн суралцагчийн эзэмшсэн төрөлх хэл нь хоёрдогч хэлийг сурахад саад болдог байна.

Гурав дахь шалтгаан нь 20 насны эхэн үеэс тархины үйл ажиллагаа өөрчлөгддөг нь зарим талаар хэл сурахад хүндрэл учруулдаг аж. Гэвч энэ нь 20 гарсан хүн гадаад хэл сурах боломжгүй гэсэн үг биш юм.  Харин ихэнх тохиолдолд тухайн улс орны хүмүүсийн хэмжээнд хэлний дүрмийг сурч чаддаггүйг харуулж буй хэрэг юм.

Магадгүй танд гадаад хэлийг хэзээ сурахаас илүү яаж сурах нь чухал байж болох юм. Тэгвэл англи хэлийг орчинд нь сурсан хүмүүс анги танхимд заалгасан хүмүүсээс илүү сурдаг нь тогтоогджээ.

Энэхүү судалгаанаас үзэхэд насны хувьд арван наснаас өмнө гадаад хэл сурч эхлэх нь дүрмийн тал дээр ч тухайн хэлийг төгс эзэмшихэд нөлөөлдөг бол тус хэлээр ярьдаг хүмүүсийн дунд, орчинд нь хэлийг судалбал өндөр үр дүн гардаг байна.

Эх сурвалж: Businessinsider