БНТУ АНУ-ын Холбооны нөөцийн санд хадгалуулж байсан бүх алтаа буцаан татахаар шийдвэрлэсэн тухай Туркийн хэвлэлүүдэд бичиж байна. Сүүлийн жилүүдэд тус улс хилийн чанадаас нийт 220 тонн алт буцаан татаад байгаа бөгөөд 2017 онд АНУ-аас 28.7 тонн алт буцаан авчирсан байна.
Туркийн “Yeni Safak” сонинд “тус улсын нийт алтны нөөц 564 тонн буюу 20 гаруй тэрбум ам.доллартай тэнцэнэ хэмээсэн бол Төв банкны мэдээлснээр 2018 оны 3 дугаар сарын байдлаар нийт 25.3 тэрбум ам.доллартай тэнцэх хэмжээний алтны нөөцтэй” гэжээ.
БНТУ-ын Ерөнхийлөгч Т.Эрдоган олон улсын зээлд ам.долларыг ашиглаж байгаад шүүмжлэлтэй хандах болсон. Тэрээр энэ оны 4 дүгээр сарын 16-нд Станбул хотноо болсон “Global Entrepreneurship Congress”-ын үеэр улс орнууд ам.доллараас бусад валют хэрэглэж ханшны арилжааны дарамтнаас салах хэрэгтэй, зээлийг алтаар олгож, төлөхийг санал болгосон юм. 4 дүгээр сарын 11-нд Туркийн лирийн ханш унаж, ам.доллартай харьцах ханш хамгийн доод түвшинд хүрсэн байна. Тиймээс Туркийн хувьд алтаа эргүүлэн татах шийдвэр нь санхүүгийн гэхээсээ илүү улс төрийн зорилготой хэмээн “RBC Wealth Management”-ийн захирал Ж.Жеро ярьжээ.
Гэхдээ Турк Улс ганц АНУ-аас алтныхаа нөөцийг буцаан татаж буй орон биш бөгөөд 2017 онд Герман Улс АНУ-ын Холбооны нөөцийн сан болон Франц Улсын Төв банкнаас 674 тонн алт эргүүлэн татсан агаад нийт алтны нөөцийн дийлэнх нь Франкфуртад хадгалагдаж буй талаар “Bundesbank” мэдээлж байсан.
Үүнээс гадна Нидерландын Вант улс 2014 онд АНУ-ын Холбооны нөөцийн сангаас 122.5 тонн алтаа эргүүлэн татсан.
Түүнчлэн Венесуэл улс 2012 онд 9 тэрбум ам.доллартай тэнцэх хэмжээний 160 тонн алтаа эргүүлэн татаж байсан удаатай.
