Өчигдөр орой 21:00 цагийн үед Ерөнхий сайд асан С.Баяр, Ч.Сайханбилэг нарыг Авлигатай тэмцэх газраас саатуулж, цагдан хорих 461 дүгээр ангид хорьсон юм.

Ингэснээр Оюутолгойн гэрээнд гарын үсэг зурсан тухайн үеийн удирдах албан тушаалтнууд буюу сайд, дарга бараг бүгд баривчлагдаад байна.

Харин Оюутолгойгоос хүртсэн хувиараа тансаглаж, Европт амьдарч байгаа гэх Эрчим хүч, эрдэс баялгийн сайд асан Д.Зоригт болон “Нүүрс хөтөлбөр”-өөр нэлээд хэдэн жилийн ял авч, түүнийгээ эдэлсэн Л.Гансүх нар л дутуу байна.

Л.Гансүхийн хувьд 2009 онд Байгаль орчны сайдын албан тушаалыг хашиж байсан ба Н.Алтанхуягийн сайн найз. Тийм болохоороо Ц.Элбэгдоржид олзлогдож, Л.Гансүхээр дамжуулан Н.Алтанхуягийг унагах ажиллагаа амжилттай хэрэгжсэн. АН-д чамгүй өндөр рейтингтэй байсан Л.Гансүхийн хувьд Нүүрс хөтөлбөрөөр яллагдаж ерөнхийдөө улстөрийн карьер нь дууссан. Тиймээс түүнийг шийтгэлээ хүлээсэн гэж улстөрийн хүрээнийхэн ярих юм билээ.

Харин Санхүүгийн зохицуулах хорооны даргаар ажиллаж байгаад бусдад алуулсан Д.Бадраа агсны ах Д.Зоригтыг дүүгийнхээ оршуулгын ёслол дээр нулимс дуслуулан үг хэлж байхад өрөвдөж “Энэ мундаг залуу, энэ залууг дэмжье” гэж 30 дөнгөж гарч яваа түүнд өндөр албан тушаалуудыг хайр гамгүй өгсөн. Гэвч тэрээр Эрдэс баялаг, эрчим хүчний сайдын албан тушаал хашиж байхдаа Монголын ард түмэнд ашиггүй Оюутолгойн гэрээнд гарын үсэг зурж, түүнээсээ хувь хүртэн хилийн чанад руу арилсан гэдэг.  

Оюутолгойн асуудал яригдахад хамгийн их пээдийсэн хариулт өгдөг, өөрийгөө өмгөөлдөг улстөрчид нь С.Баяр, Ч.Сайханбилэг нар бөгөөд тэднийг өчигдөр орой баривчилж, урьдчилан хорих газарт аваачиж хорьсон нь 10-аад жил яригдсан ч шалгагдаж байгаагүй Оюутолгойн гэрээнд салхи орж буйн илрэл юм.

Ч.Сайханбилэгийн хувьд түүнийг АНУ-аас ирж, байцаалт өгөхийг шаардсан зарлах дуудах хуудас хүргүүлсэн бөгөөд тэрээр “Би очиж байцаалт өгнө. Би ямар ч буруугүй” гэж ил захидал хүргүүлсэн. Хэлсэн амандаа хүрч байгаа нь буруугүй гэдгээ нотлох гэсэн үйлдэл бололтой.

Тэгвэл С.Баяр “Ямар ч байсан Элчин сайдын албан тушаалаа өгөөдхье. Тэгж байгаад тухтай үзнэ” гэж байсанчлан Элчин сайдын албан тушаалаа өгч, тухтай шалгуулахаар болсон нь энэ аж. Тэрээр УИХ-ын гишүүн Ж.Батзандантай шүүхээр “үзэлцэж” байгаа ба өөрийгөө Оюутолгойгоос авлига аваагүй гэж мэдэгдэж буй.

С.Баяр, Ч.Сайханбилэг нарыг Оюутолгойн гэрээнээс гадна бас нэгэн том хэргээр шалгаж байгаа.

Тухайлбал, С.Баярыг “Жаст”-ын Ш.Батхүүгийн “Эрдэнэт” үйлдвэрийг Өмнөд Африкийн Стандарт банкинд барьцаанд тавьсан хэргээр давхар шалгаж байгаа бол Ч.Сайханбилэгийг “Эрдэнэт” үйлдвэрийн 49 хувийг хууль зөрчин хувийн компанид шилжүүлсэн хэргээр шалгаж байна.  

Дашрамд дурдахад, С.Баяр, Ч.Сайханбилэг нараас өмнө Оюутолгойн гэрээний асуудлаар Сангийн сайд асан С.Баярцогт, “Эрдэнэс Монгол” ХХК-ийн Гүйцэтгэх захирал асан Б.Бямбасайхан, Татварын ерөнхий газрын дарга асан Б.Ариунсан нарыг баривчилж, одоог хүртэл хорьсоор байгаа юм.

Харин Стандарт банктай холбоотой хэргээр ганцхан “Жаст”-ын Ш.Батхүүг л баривчилсан. Түүнчлэн “Эрдэнэт”-ийн 49 хувьтай холбоотой хэргээр хэнийг ч баривчилж хориогүй байна.