Дорноговь аймгийн Засаг даргын тамгын газраас Элсэлтийн ерөнхий шалгалт (ЭЕШ)-д 800 оноо авсан сурагчийг 1 сая, сурагчийг 800 оноо авахад бэлтгэсэн багшийг 500 мянган төгрөгөөр  шагнаж урамшуулахаар болж байгаагаа албан ёсоор мэдэгдлээ.

Учир нь, Дорноговь аймаг сүүлийн жилүүдэд ЭЕШ-ын дүнгээр улсад хамгийн муу үнэлгээтэй байсан бөгөөд жил бүр л сүүл мушгидаг энэ байдлыг аймгийн Засаг даргын тамгын газраас өөрчлөхөөр болсон нь энэ бололтой. Ингээд Дорноговь аймгийн Засаг даргын тамгын газрын цахим хуудаст байршсан албаны мэдээллийг хүргэе. 

Аймгийн Засаг даргын "Хөгжлийн төлөө хамтдаа" /2016-2020/ үйл ажиллагааны  хөтөлбөр, аймгийн Эдийн засаг, нийгмийг 2018 онд хөгжүүлэх үндсэн чиглэлийг хэрэгжүүлэх, “Хүний хөгжлийг дэмжих жил-2018”-ийн хүрээнд орон нутгийн онцлогт тохирсон оновчтой бодлогыг хэрэгжүүлэх замаар багшийг чадавхижуулах, багшийн тэргүүн туршлагыг түгээх, багшийн үнэлэмжийг нэмэгдүүлэх, мэргэжлээ зөв сонгох, сурагчдын сурлагын чанар, ур чадвар, ахиц амжилт, өрсөлдөх чадварыг нэмэгдүүлэх зорилгоор Ерөнхий боловсролын сургуулийн төгсөгч Элсэлтийн ерөнхий шалгалтад 800 оноо авсан сурагч, бэлтгэсэн багшийг тус тус урамшуулахаар аймгийн Засаг даргын 2018 оны 04 дүгээр сарын 04-ний А/291 дугаар захирамжаар баталлаа.
Элсэлтийн ерөнхий шалгалтад 800 оноо авсан сурагчийг 1,0 сая төгрөг, бэлтгэсэн багшийг 500,000 төгрөгөөр тус тус урамшуулах бөгөөд тус захирамжийг 2017-2018 оны хичээлийн жилээс эхлэн мөрдөх юм.