Ардын дунд "Шорон санаа"-тай гэж муу санаа нь дийлсэн, насаараа орон шоронгоор явсан хүмүүсийг хэлдэг билээ. Үүнтэй адил Төрд олон жил болсон хүмүүс бас "Илжирсэн өмхий санаа"-тнууд болдог нь нууц биш. Тэдний бодож, сэтгэж байгаа гэж нарсны атамануудаас хол илүү гээд л бод. Эхнэр хүүхдээсээ мөнгө нууна, нуусан мөнгөө оффшорт аваачиж хийнэ, илүү авгай хүүхэд, нууц амраг, нялх амраг за тэгээд тэр бүгдийг дурдах хэрэггүй биз. 

Өөрсдийгөө илүү заяатай, бараг хаан гэж бодоцгоодог хүмүүс. Хамгийн хөгийн нь олон нийтэд сайн хүмүүс болж жүжиглэдэг, юу ч болоогүй юм шиг царайлдаг нь үнэхээр дургүй хүргэм. Дональд Трампын хэлсэн "Улстөр бол хаалттай хөшигний цаадах чацга" гэдэг шиг ийм заваан зүйлд холилдож хутгалдсан нэр төрөө хамгаалах гэж үхэн хатан зүтгэцгээнэ.

Манайд төрөөс хулгай хийгээд хилийн чанад руу зугтсан нөхөд хэдэн зуугаараа тоологдоно. Шалгаж баривчлах, Интерполд хандах гэхээр Төрийн 3 өндөрлөг, Ерөнхий прокурор, Авлигатай тэмцэх газрын даргад захидал бичнэ.

Захидалдаа:

Намайг хэлмэгдүүлж байна, би хилс хэрэгт орж байна. Улстөрийн гүтгэлгэ, явуургүй арга. Миний өрсөлдөгчийн хийж буй ажил. Би удахгүй очиж шалгуулна, нэр төрөө цэвэрлэж авна гээд сүр сүр юм бичнэ. 

...Түүхийн гашуун үе, хэлмэгдүүлэлт, хилс хэрэг, ээдрээтэй хүнд нөхцөл байдлаас шалтгаалан Ерөнхий сайдаар ажиллаж байсан таван эрхэм харийн нутагт амиа тавьж байсан тэр түүх мартагдаагүй байна. Тэдний хэн нь ч хүслээрээ харьд очоогүй. Хэн нь ч эх орноосоо оргон зайлж байсангүй. Ерөнхий сайдын сэнтийд суусан хэн ч Монгол төр, эх орон, ард түмнийхээ төлөө хоёргүй сэтгэлээр зүтгэдэг... гэх зэргээр бичжээ. Монгол Төрийн төлөө цусаа урсгаж, махаа тасдуулж байсан ариун өвгөд дээдсийн нэрийг одоогийн зарим хулгайч улстөрчид өмнөө барьж, ясыг нь өндөлзүүлэхгүй байвал зүгээрсэн.

"Компьютерийн цаанаас хий сүржигнэлгүй зүгээр л ирээд жагс" гэдэг зүгээр л ирээд хууль дүрмийнх нь дагуу шалгуулалдаа. Өчигдөрхөн Ерөнхий сайд Ч.Сайханбилэг Улсын Ерөнхий прокурор М.Энх-Амгалан, Авлигатай тэмцэх газрын дарга Х.Энхжаргал нарт хаягласан захидал бичжээ.

Үүнээс өмнө Ц.Элбэгдоржоос шагналын албан тушаал болоод удаж буй Шведийн вант улсын Элчин сайдын албыг хашиж буй М.Энхсайхан захидал бичсэн байна лээ. Төмөр замын хэрэгт холбогдсон "Либерти Партнерс"-ийн захирал Ч.Ганбат ч гэсэн бичиж л байсан.

Ирээд шалгуулсан нь нэгээхэн ч үгүй. Тэгсэн атал дуулиан шуугиан намдах, сонгууль дөхөх үеэр юм уу хэн нэгэн ойрын холбоотон нь албан тушаал эрх мэдэлтэй болонгуут муур шиг Монгол руу сэм гэтдэг нь нууц биш.

Төрд ажиллаж байгаад гадагшаа гарсан хүмүүсээс одоогийн байдлаар Ц.Элбэгдорж, С.Баяр, Ч.Сайханбилэг, Д.Зоригт, Н.Золжаргал нарын нөхөд хамгийн танил байгаа ба Ч.Сайханбилэг хилийн чанадаас захидал бичих болсон шалтгаан нь түүнийг Интерполоор эрэн сурвалжлуулах гэж байсантай холбоотой аж. 

Аалзны тор мэт хэлхэлдсэн манай хулгайч улстөрчид Төсвийн хөрөнгөнөөс хулгай хийж гадагшаа зугтсан нөхдүүдэд Монголд ямар шийдвэр гарч байгааг яг минут, секундтэй нь мэдээлдэг учраас хилийн чанадад байгаа хүмүүс мань мэтээсээ түрүүлээд мэдээлэлтэй болчихсон байдаг. Тэгээд газар орноо сольдог. Америк руу оргон зайлсан "Либерти Партнерс"-ийн захирал Ч.Ганбатыг АНУ-ын засаг захиргаатай хамтраад барих гэтэл тэр нь аль хэдийнэ мэдээлэл авч Англи руу зугтсан байх жишээтэй.

Ерөнхий сайд асан Ч.Сайханбилэгийн хувьд АНУ-ын Денвер хотод амьдарч байгаа бөгөөд Монголд ирэнгүүт нь баривчилж, байцаалт авна гэж албаныхан хэлсэн. Хэрвээ түүнийг Монголд ирэхгүй бол Олон улсын цагдаагийн байгууллага буюу Интерполд хандаж, хүчээр авчруулахаар болоод байжээ. Тиймээс л Ч.Сайханбилэг цаг хугацааны хайчинд ороод захидал бичсэн нь энэ бололтой.

Эр хүн шиг ирээд шалгуулдаг л байгаа даа. Бас Дубайд хийсэн Оюутолгойн гэрээний гол хүн өөрийгөө буруугүй, энэ гэрээ Монголын ард түмэнд ашигтай гэдгийг баталдаг л байгаа даа. 

Ерөнхийлөгчийн зөвлөх Г.Уянга нэгэнтээ "Хэрвээ би эр хүн байсан бол Ч.Сайханбилэгийг шанаадчихмаар байна" гэж түүнийг Дубайд хийсэн гэрээг шүүмжилж байсан удаатай. Ямартай ч Ч.Сайханбилэг удахгүй ирээд шалгуулах байх аа. 

Түүний захидлыг бүрэн эхээр нь уншихийг хүсвэл ЭНД дарна уу