Эдийн засаг, нийгмийн өнөөгийн байдлын талаар нийслэлийн Статистикийн газрын дарга Ц.Заяхүү, Ахлах мэргэжилтэн Т.Алтансүх, Тээвэр, холбооны салбарын мэдээлэл хариуцсан мэргэжилтэн Н.Байгалмаа нар өнөөдөр хэвлэлийнхэнд мэдээллээ.

2017 оны эцсийн байдлаар:

- Улаанбаатар хотын хүн ам 1 сая 417.4 мянга гэсэн бүртгэлтэй байгаа бол нийслэлд байнга оршин суугаа хүн амын тоо 1 сая 462.9 мянга байна.

- Нийслэлийн 386 мянга 218 өрхийн 44.3 хувь нь орон сууцанд, 55.5 хувь нь гэр хороололд амьдарч байна.

- Нийслэлд 661 цэцэрлэг, 241 сургууль үйл ажиллагаа явуулдаг.

- Нийслэлд шилжин ирэгсдийн тоо 2017 оны байдлаар 10.3 мянга байгаа нь өмнөх оны мөн үеийнхээс 50 гаруй хувиар буурсан үзүүлэлт юм.

- Нийслэлд 2017 онд 10 мянга 399 хос гэрлэлтээ бүртгүүлсэн бол 2 мянга 448 хос гэрлэлтээ цуцлуулжээ.

Улаанбаатар хотын нийт ААН-ийн тоо 2017 оны байдлаар 114 мянга 671 байна. Үүнээс үйл ажиллагаа явуулж буй ААН-ийн тоо 50 мянга 467 юм. Энэ нь өнгөрсөн оны мөн үеийнхээс 4 мянга 314-өөр өссөн үзүүлэлт. Улаанбаатарт хөдөлмөрийн насны 901 мянга 122 хүн бий. Үүнээс 512.2 мянга нь ажилтай бол 41.4 мянга нь идэвхтэй ажил хайж байна.