Ирэх сард Японы Ерөнхий сайд АНУ-ын Ерөнхийлөгчтэй уулзана
Японы Ерөнхий сайд Шинзо Абэ 4 дүгээр сарын 18-нд АНУ-ын Ерөнхийлөгч Дональд Трамптай уулзаж, Хойд Солонгос болон АНУ-ын удирдагчдын дээд хэмжээний уулзалтын өмнөх стратегийг эцэслэн хэлэлцэх тухайгаа лхагва гарагт "Ройтерс" агентлагт өгсөн ярилцлагандаа дурдав.
Тэрээр ярилцлагынхаа үеэр Япон улсыг уул уурхайн гаралтай бүтээгдэхүүний тарифаас чөлөөлөхийг, Ерөнхийлөгч Трампаас хүснэ хэмээн мэдэгджээ.
Шинзо Абэ парламентийн хороонд үг хэлэх үеэрээ Японы уул уурхайн гаралтай бүтээгдэхүүнүүд нь АНУ-ын авто үйлдвэрлэгчдийг илүү өрсөлдөх чадвартай болгоод зогсохгүй, тус улсын хэрэглэгчдэд хямдаар тусахад нөлөөлсөн гэжээ.
"Татвараас чөлөөлөгдөх нь юуны түрүүнд зөвхөн чөлөөлөгдсөн улсад ашигтай мэт харагддаг ч энэ нь тийм биш. Япон улс нь чөлөөт худалдааг өргөжүүлэхэд ихээр анхаардаг бөгөөд энэ нь улс бүрт харилцан ашигтай” хэмээв.
Тус улсын сангийн сайд Таро Асо хэлэхдээ "АНУ худалдааны тэнцвэргүй байдалтай холбоотой зарим хариуцлагыг тооцолгүй орхисон. Би АНУ-ын нөхцөл байдал болон худалдааны алдагдал нь удаан үргэлжлэхгүй гэж ойлгож байгаа ч, тус улс энэ тал дээр өөрөө хүчин чармайлт гаргах ёстой” гэж хэлжээ.
Эх сурвалжийн үзэж буйгаар Шинзо Абэ болон АНУ-ын удирдагчийн уулзалт Флорида дахьТрампын Мар-а-Ларго хэмээх газар болох гэнэ.
Дашрамд дурдахад, Хойд Солонгосын удирдагч Ким Жонг Ун 4 дүгээр сард Өмнөд Солонгосын Ерөнхийлөгч Мүн Жэ Интэй, 5 дугаар сард Трамптай уулзах төлөвлөгөөтэй байгаа юм.
