Ерөнхийлөгчийн Тамгын газрын дарга З.Энхболд АНУ-ын Инженерийн цэргийн корпусын төлөөлөгчдийг хүлээн авч уулзлаа
Ерөнхийлөгчийн Тамгын газрын дарга З.Энхболд АНУ-ын Инженерийн цэргийн корпусын төлөөлөгчдийг өнөөдөр хүлээн авч уулзаж, Монгол Улсын барилгын цэргийн болон АНУ-ын инженерийн цэргийн корпус буюу USACE хоорондын хамтын ажиллагааны талаар ярилцав.
Уулзалтад Монгол Улсын Ерөнхийлөгчийн Тамгын газрын дарга З.Энхболд, ЗХЖШ-ын дарга дэслэгч генерал Д.Даваа, АНУ-ын талаас АНУ-ын Номхон далайн командлалын хойд хэсгийн дэд командлагч генерал Рожер Нобел, АНУ-ын Инженерийн цэргийн корпусын Аюулгүй байдлын хамтын ажиллагааны хөтөлбөрийн ахлах менежер Эван Тинг болон албаны бусад хүмүүс байлцлаа.
АНУ-ын Инженерийн цэргийн корпусын төлөөлөгчид тус байгууллагынхаа бүтэц үйл ажиллагааны талаар дэлгэрэнгүй танилцуулж, Монголын талын сонирхсон асуултуудад хариулсан юм. Тус улсын Инженерийн цэргийн корпус нь инженер, эрдэмтэн судлаачид, удирдах цэргийн албан тушаалтнууд гэх мэт 35 000 орчим хүний бүрэлдэхүүнтэй бөгөөд өдөр тутамдаа ажилладаг барилгын 300 000 мэргэжилтнүүд, 5000 тусгай мэргэжилтнээс бүрддэг байна. Усан тээвэр, үерийн эрсдлийн менежмент, экосистемийн сэргээн босголт, дэд бүтэц, Усан цахилгаан станц, ус хангамж, эрчим хүч ба тогтвортой хөгжил, цэргийн барилга байгууламж, гадаад дахь цэргийн бүтээн байгуулалтын ажиллагаанууд зэргийг хариуцдаг байна. Мөн тэд байгууллагынхаа оролцсон бүтээн байгуулалт, улс орондоо болон олон улсад хэрэгжүүлсэн төсөл хөтөлбөрүүдийнхээ зарим жишээг танилцуулсан юм. Тус байгууллага нь дэлхийн 132 оронтой хамтын ажиллагаатай 43 улсад салбартай, АНУ-ыг тусгаар тогтнолоо зарлахаас нэг жилийн өмнө, хуурай замын армиас нь хоёр хоногийн дараа буюу 1775 онд байгуулагдсан арвин түүхтэй ажээ. АНУ-ын Инженерийн цэргийн корпус өнгөрсөн жил Монгол Улсад хоёр цэцэрлэг барьсны нэг нь Баянзүрх дүүрэг, нөгөө нь Дорноговь аймгийн Замын-Үүд суманд үйл ажиллагаагаа явуулж байна. Мөн манай улсын ОБЕГ-тай хамтран үерийн аюулгүй байдлын сургалт хийж байсан талаараа тэд дурдлаа.
Энэ тухай танилцуулгыг сонссон Ерөнхийлөгчийн Тамгын газрын дарга З.Энхболд манайхаар бол Барилгын цэрэг, Инженерийн цэрэг, Ус сувгийн удирдах газар, Тусгай хамгаалалттай газрын захиргаад, ОБЕГ-ын үерийн хамгаалалт, Геодези зураг зүйн газар, Усан цахилгаан станцууд гэх мэт олон аж ахуйн нэгж агентлагийн үйл ажиллагааг хариуцдаг байх нь хэмээн хэлээд тус улсын энэ байгууллагын талаархи дэлгэрэнгүй танилцуулгад талархаж байгаагаа илэрхийллээ.
Ерөнхийлөгчийн Тамгын газрын дарга АНУ-ын Инженерийн цэргийн корпус үерийн далан барьж байгаа болон ус хуримтлуулж, УЦС барьж байгаа туршлагыг нь Монгол Улс ихэд сонирхож байгаа бөгөөд Монголын барилгын цэргийн инженерүүдийг байгаль орчин хамгаалах болон үерийн усны далан барихад сургаж өгөх боломжтой эсэхийг асууж санал тавилаа.
