Авлигатай тэмцэх газар (АТГ)-ын Мөрдөн шалгах хэлтэс “Жаст групп” ХХК-ийн “Стандарт” банкнаас авсан зээлд “Эрдэнэт үйлдвэр” баталгаа гаргасан асуудлыг шалгаж байна.  

Шалгалтын явцад хэргийн цар хүрээ нэмэгдэж байгаа тул Ажлын хэсэг томилогдож нарийвчилсан мөрдөн шалгах ажиллагааг явуулж байна. “Жаст групп”-ийн ерөнхийлөгч асан Ш.Батхүү нарын нэр бүхий хүмүүст холбогдуулан шалгаж байгаа хэргийн хөөн хэлэлцэх хугацаа дуусах болоогүй бөгөөд гэм буруутай этгээдүүд ял завших боломжгүй.

Уг хэргийн мөрдөн шалгах ажиллагааг прокурорын хяналтан дор явуулж байна гэж албаны мэдээлэлд дурдлаа.

Тэгвэл "Жаст групп"-ийн эзэн асан Ш.Батхүү нарын холбогдсон энэ хэрэгт тухайн үеийн Ерөнхий сайд, МАН-ын дарга асан Санжийн Баяр оролцсон нь тодорхой байгаа юм. Үүнээс гадна дээрээ Мөнх хөх тэнгэрээс өөр юунд ч захирагдахгүй гэгддэг Үндсэн хуулийн цэцийн Их суудлын гишүүн Д.Сугар, "Эрдэнэт үйлдвэр"-ийн ерөнхий захирал асан Ч.Ганзориг, УБТЗ-ын дарга асан Д.Очирхүү нарын хүмүүс холбогдсон.  

Энэ хэрэгт холбогдсон хамгийн том хүн нь АНУ руу гэр бүлээрээ гарч, одоо Англид Элчин сайдаар сууж буй С.Баяр бол хамгийн доод хүн нь "Монголын тэргүүн баян хүн байсан" Ш.Батхүү болоод байгаа юм. 

Улстөрчдийн тоглоом болж, бизнесээ дампууруулсан Ш.Батхүү өдгөө харамсаад ч барахгүй байгаа нь ойлгомжтой. 

Харин бусад нөхдүүдийн хувьд оффшорт мөнгөө нууж, АНУ-д 7 хаус худалдан авч янз бүрийн аргаар мөнгөө нууж байгаа нь илэрсэн. 

УИХ-ын гишүүн Г.Тэмүүлэнгийн аав Ч.Ганзоригийн хувьд өөрийн төрсөн дүү Ч.Батзоригийн нэр дээр оффшорт 6 данстай болохыг олон улсын эрэн сурвалжлах сэтгүүлчид тогтоосон.

Панамын оффшор бүсэд 6 данстай Ч.Батзориг хэмээх Монголын хамгийн баян нууц оффшортон хэн болохыг тодруулах аяны хүрээнд тэрээр ГОК-ийн ерөнхий захирал асан Ч.Ганзоригийн төрсөн дүү болох нь илэрсэн. 

Харин Д.Сугарын сууж буй Үндсэн хуулийн цэц бүх ард түмний өмч болсон "Эрдэнэт үйлдвэр"-ийн 49 хувийг хувийн компанид шилжүүлж, цөөн хэдэн хүний идэш болгосон явдлыг зөв гэж хэн ч бодсон буруу шийдвэр гаргаад байж  байна. 

Тэгвэл 1 сая ам.долларт хүрсэн Улаанбаатар төмөр замын даргын албан тушаалаас буусан Д.Очирхүүгийн хувьд сураг алдарсаар...

Үнэндээ эдгээр хүмүүсийн "толгойлогч", нэгэн цагт Монголын улстөрийн ертөнцийн "бэрс" явсан С.Баяр тийм ч амархан буруугаа хүлээгээд буугаад өгчих хүн биш гэдгийг учир мэдэх хүмүүс мэднэ.

С.Баярын хувьд бүхий л арга хэмжээгээ авах нь дамжиггүй. Өөртөө ч итгэлтэй байгаа нь харагдаж байна лээ. Ямар сайндаа л улстөрийн эрх мэдэлгүй болчихоод УИХ-ын гишүүн Ж.Батзандангийн өөдөөс томорч байхав. С.Баяр одоо ч улстөрийн хүрээнд эрх мэдэлтэй, танил талтай байж болох ч ингэж хийсэн хэргээ хүртэл хаацайлан их хурлын гишүүнийг намайг гүтгэлээ гэхийг бодоход үнэхээр сайн ар талтай, түүндээ ч итгэлтэй байгаагийн шинж.

Хэдий тийм ч "үнэнээр явбал үхэр тэргээр туулай гүйцнэ" гэгчээр цаг хугацааны эрхээр С.Баяр үнэнд гүйцэгдэн гарах гарцгүй боллоо. 

Буланд шахагдан "амь гарах" боломжгүй болсон хулгана муурын өөдөөс дайрдаг нь гэм биш зан. 

С.Баярын хувьд энэ нь юу юм бол доо. Тэр л сонин байна.