Бид бүхэн “гээндээ ч бий, гоондоо ч бий” гэж ярьдаг. Энэ үгийг “Эрдэнэт үйлдвэр” дээр ярих хэрэгтэй болжээ. “Эрдэнэт үйлдвэр” бол бүх ард түмний өмч. Ард түмний өмчийг төлөөлж байгаа засаг захиргааны байгууллага нь л Төр юм. Түүнээс биш Төр өөрийн өмчөө захиран зарцуулж байгаа хэрэг биш.
Гэтэл ард түмний мэдлийн 51 хувийг болчимгүй этгээдүүд Өмнөд Африкийн “Стандарт” банкинд тавьж их хэмжээний зээл авсан . Энэ асуудалд нэгэн үе Монголын толгой компани явсан “Жаст” групп буюу түүний эзэн Ш.Батхүү болон тухайн үеийн Монгол Улсын Ерөнхий сайд, МАН-ын дарга С.Баяр нарын хүмүүс холбогдсон байдаг. Үүний хариуцлагыг Монголын төр, тэр дундаа эрх баригч МАН үүрч байгаа.
Нэг талаас энэ асуудалд МАН буруутай ч түүний толгойд байсан ганц хоёр хүний нууцаар хийсэн хууль бус үйлдэлд МАН-ыг тэр чигээр нь буруутгаж, өнөөгийн эрх баригчдад нялзааж боломгүй мэт. Нөгөө талаас МАН-ын одоогийн эрх баригчид өмнөхүүдийнхээ алдааны бүх хариуцлагыг үүрч, засч залруулахаар ажиллаж байгааг олон нийт анхааралтай ажиглаж байна. С.Баяр нартай нэг тогоонд харьяалагддагийн хувьд МАН экс удирдлагынхаа хууль бус үйлдлийн хариуцлагыг үүрэх нь зүй ёсны хэрэг. Ард түмэн ч МАН болон С.Баяр тэргүүтэнгээс Эрдэнэтийн 51 хувийг нэхэх нь зүй ёсны эрх .
Харин ОХУ өөрийн эзэмшиж байсан 49 хувийг Монголын талд шилжүүлэх болоход Ч.Сайханбилэг тэргүүтэй АН-ын Засгийн газар ард түмний өмчийг хувийн компанид шилжүүлсэн байдаг. Энэ асуудалд АН угшилтай Ерөнхийлөгч Ц.Элбэгдоржийг ч оролцсон гэдгийг эх сурвалжууд хэлдэг. Угтаа бол Монгол Улсын ганц “саалийн үнээ” болсон Эрдэнэт үйлдвэр бол бүх ард түмний өмч. Үүнийг хэн ч хувьдаа эзэмшиж, хувийн компанийн барьцаанд тавих ёсгүй.
Өдгөө Эрдэнэтийн 49 хувийн асуудал ярихад үүнийг худалдаж авсан хувийн хэвшлийнхэн “Та нар 51 хувийг гаднын банкинд тавьж алдаа биз дээ” гэж барьцаж байна. Эрдэнэтийн 49 хувийг Худалдаа хөгжлийн банк авсан бөгөөд тэдний ард АН байгаа гэдгийг бүгд мэднэ.
Тиймдээ ч АН, МАН-аараа 49, 51 хувь хэмээн маргалдаж, ард түмний толгойг эргүүлэх мөртлөө ард түмнээс дэмжлэг авахыг хүсч байна. Ард түмэн МАН-аас 51 хувиа авья, АН-аас ч 49 хувиа авья .
Хэрвээ асуудал хүндэрвэл С.Баяр нарын хүмүүсийг дуудаж авчраад хариуцлага тооцож тэднээс Эрдэнэтийн 51 хувийг барьцаалж авсан мөнгийг гаргуулья. Бас ард түмний өмчийг хувийн компанид зарсан АН-ын удирдлагуудыг ч дуудаж авчраад хариуцлагыг нь үүрүүлье.
Угаасаа Эрдэнэт үйлдвэр 100 хувь Монголын ард түмний өмч байх ёстой. Түүнийг хэн ч өмчлөх учиргүй, зүгээр л төрд гарсан нам л удирдаад яваг.
Уг нь Эрдэнэтийн 51 хувийг МАН хувьдаа өмчилж аваагүй. Гэтэл МАН-ыг авсан мэтээр олон нийтэд ойлгуулж байна. Засаг төрд аль нам гарахаас хамаарч 51 хувийг МАН, АН, МАХН ер нь бүх л нам удирдаад явж болно. Үүн дээр 49 хувийг нэмээд 100 хувь болговол бүх ард түмэнд л хэрэгтэй.
Гэтэл 49 хувийг хэдхэн хүмүүс өмчилж авчихаад, өөрсдөө л “таргалахыг” хүсч, 51 хувийг нь хулгайч нар гаднын банкны барьцаанд тавьчихсан. Энэ юу болж байна вэ??? Монголчууд бид шунаг сэтгэлтнүүдийн харгайгаар Эрдэнэт үйлдвэрээ 100 хувь алдана гэж үү? Яагаад бид ингэж амьдрах ёстой юм бэ? Үнэндээ бол тэд ард түмний өмчийг хулгайлсан. Эзэнд нь хэлэхгүйгээр нууцаар авахыг хулгай л гэдэг .
