Хандив, тусламж нийгмийн халамжинд том нөлөө үзүүлдэг. Энэ утгаараа том хандивлагчид нийгэмд хүчтэй нөлөөлж чаддаг. Баян чинээлэг хүмүүс нийгэм дэх өөрсдийн нэр хүндээ өсгөхийн тулд, буян хураах зорилгоор хандив, тусламж өргөдөг. 

Гэхдээ олон нийтийн сайн сайхны төлөө хандив өргөж буй буянтнуудын буянаар эрүүл мэндийн салбарт олон хүн өвчин, зовлонгоосоо ангижирч, боловсролын салбарт олон хүн эрдэм мэдлэгтэй болж байна.

Учир нь, буяны хандив, тусламжийн дийлэнх нь энэ хоёр салбарт зориулагддаг. Ингээд та бүхэндээ дэлхий даяарх олон тооны хандивлагч, буяны байгууллагуудаас хамгийн их хөрөнгө хандивласан 10 хүнийг хандивын хэмжээтэй нь хамт хүргэе.

10 Чарльз Мунгер (хандив: 65 сая ам.доллар)

"Berkshire Hathaway" компанийн дэд тэргүүн, тэрбумтан Чарльз Мунгер Калифорнийн их сургуульд өөрийн хөрөнгөний гурван хувь буюу 65 сая ам.доллар хандивласан юм. 

Уг хандив тус сургуулийн Физикийн танхимын хөгжилд том тус болсон юм.  

Мунгер хандив өргөхдөө үргэлж өргөтгөл барих юм уу сургуулийнхаа барилгыг шинэчлэн засах зайлшгүй шаардлага тулгарсан боловсролын байгууллагуудыг сонгодог. 

9 Жон Моргриж (хандив: 100 сая ам.доллар)

"Cisco Systems" компанийн захирал, гүйцэтгэх захирал асан Жон Моргриж эхнэртэйгээ хамтран 2004 оноос хойш олон удаа хандив өргөсөн. Тэд "Giving Pledge" /Өглөгийн тангараг/ хэмээх нэр хүндтэй байгууллагад өөрсдийн хөрөнгөнийхөө талыг буяны үйлсэд зориулна гэж тангараглан гарын үсэг зурсан юм.  

Жон Моргриж, Ташиа Моргриж нар 100 сая ам.долларын хандив өргөсөн бөгөөд уг хандиваа Висконсины их сургуульд сургалтын хөтөлбөрийг сайжруулах болон сурах чин хүсэл эрмэлзэлтэй ч амьдралын боломжгүй оюутнуудад туслах зорилгоор өгсөн байна.  

8 Герт Бойл (хандив: 100 сая ам.доллар)

Германд төрсөн Америкийн иргэн Герт Бойл нь "Columbia" спорт хувцасны үйлдвэрийн эзэн бөгөөд өөрийн хөрөнгөнийхөө 16 хувьтай тэнцэх хэмжээний мөнгө буюу 100 сая ам.доллар хандивласан юм. Тэр энэ мөнгөө Орегоны эрүүл мэндийн шинжлэх ухааны их сургуульд өгсөн.

Зарим эх сурвалжийн мэдээллээр, тэр тархины хорт хавдраар нас барсан талийгаач эгч Хилдегард Ламфромоо хүндэтгэж энэ мөнгийг хандивлажээ.

Орегоны их сургууль нь хорт хавдрыг эрт илрүүлэх, хавдартай хүмүүсийн амь насыг аврахад чиглэсэн сүүлийн үеийн тоног төхөөрөмжтэй хамгийн шилдэг судалгааны төв байгуулахаар зорьж байсан юм.       

7 Кеннет Гриффин (хандив: 150 сая ам.доллар)

25 тэрбум ам.доллараар үнэлэгддэг "Citadel" компанийг үүсгэн байгуулагч, гүйцэтгэх захиал Кеннет Гриффин "Форбес" сэтгүүлд хамгийн амжилттай ажиллаж буй гүйцэтгэх захирлуудын нэгээр бичигддэг. 2015 оны гуравдугаар сард түүний хөрөнгө 6.6 тэрбум ам.доллараар хэмжигдэж байсан бөгөөд тэрбээр 2014 оноос эхлэн янз бүрийн чиглэлээр хандив тусламж үзүүлж иржээ. Тэрбээр нийтдээ 150 сая ам.доллар хандивласны ихэнхийг Харвардын их сургуулийн Санхүүгийн тусламжийн хөтөлбөрт өгчээ. 

6 Ронни Чан болон Жеральд Чан (хандив: 350 сая ам.доллар)

Хонконгийн үл хөдлөх хөрөнгийн магнат Ронни Чан дүү Жеральд Чантайгаа хамтран Харвардын их сургуульд 350 сая ам.доллар хандивласан юм. Үүгээрээ тэр Харвардын их сургуулийн түүхэн дэх хамгийн том хандивлагчийн нэгээр тодорсон юм. 

5 Жон болон Лора Арнольд (хандив: 423 сая ам.доллар)

Жон Арнольд бол Америкийн тэрбумтан. Тэр эхнэр Лора Арнольдтайгаа хамтран "Laura and John Arnold Foundation" сан байгуулсан.

Уг сан бага, дунд ангийн сурагчдыг гэмт хэрэгт орооцолдохоос урьдчилан сэргийлэх зорилготой ба энэ ажилд зориулж 423 сая ам.доллар хандивлажээ. Тэрбээр Билл Гейтс, Уоррен Баффет нарын санаачилсан "Өглөгийн тангараг" байгууллагад бүртгэлтэй. 

4 Ник Вудман (хандив: 500 сая ам.доллар)

"GoPro" компанийн үүсгэн байгуулагч, гүйцэтгэх захирал Ник Вудман 2014 онд "Цахиурын хөндийн олон нийтийн сан"-д 500 сая ам.доллар хандивлажээ. 

Түүний "GoPro" технологийн компани нь камер үйлдвэрлэлтээрээ алдартай бөгөөд 2013 онд Ник Вудманд шагнал, олз омгийн хур жинхэнэ утгаараа буусан юм. 

3 Марк Цукерберг (хандив: Нэг тэрбум ам.доллар)

Фэйсбүүкийн эзэн Марк Цукерберг эхнэр Присила Чантайгаа хамтран олон буяны ажил хийдэг. Тэр 2010 онд "Newark Public Schools" сургуульд 100 сая ам.доллар хандивласан. Мөн "Өглөгийн тангараг" байгууллагад элссэн. 

2013 онд тэрээр "Цахиурын хөндийн олон нийтийн сан"-г дэмжиж, Фэйсбүүкийнхээ 18 сая хувьцааг өгөхөөр шийдсэн бөгөөд энэ нь түүний хамгийн том буяны ажил болж байна. 

Түүнчлэн 2015 онд охин Максаа төрсний дараахан хожмын нэг өдөр Фэйсбүүкийн хувьцааныхаа 99 хувийг хандивлана гэдгээ мэдэгдсэн юм.     

2 Уоррен Баффет (хандив: 2.8 тэрбум ам.доллар)

"Berkshire Hathaway" компанийн тэргүүн, гүйцэтгэх захирал Уоррен Баффет 2006 онд "Билл Гейтс, Мелинда Гейтсийн сан"-д 37 тэрбум ам.доллар хандивлана гэдгээ мэдэгдсэн. Тэрбээр одоогийн байдлаар 2.8 тэрбумыг хандивлаад байна. 

1 Билл Гейтс (хандив: 28 тэрбум ам.доллар)

Дэлхийн хамгийн баян хүн, "Microsoft" компанийн эзэн Билл Гейтс эхнэр Мелиндатайгаа хамтран "Билл болон Мелинда Гейтсийн сан"-г байгуулсан.

Мөн "Өглөгийн тангараг" /Giving Pledge/ хэмээх байгууллагыг байгуулж томоохон хандивлагч нарыг элсүүлэх болсон. Билл Гейтс одоогийн байдлаар 28 тэрбум ам.доллар хандивлаад байгаа ч нийт хөрөнгөнийхөө 95 хувийг буяны үйлсэд зориулна гэдгээ илэрхийлсэн. Тэр энэ оны байдлаар 89 тэрбум ам.долларын хөрөнгөтэй байна.